ਪੀ.ਆਰ.ਟੀ.ਸੀ. ਨੂੰ ਇਕ ਦਿਨ ਵਿਚ 40 ਲੱਖ ਰੁਪਏ ਦਾ ਘਾਟਾ ਪੈਣ ਲੱਗਾ ਹੈ
ਚੰਡੀਗੜ੍ਹ (ਗੁਰਉਪਦੇਸ਼ ਭੁੱਲਰ): ਪੰਜਾਬ ਸਰਕਾਰ ਵਲੋਂ ਚੋਣਾਂ ਦੇ ਨੇੜੇ ਆ ਕੇ ਸੂਬੇ ਵਿਚ ਸਰਕਾਰੀ ਬਸਾਂ ਵਿਚ ਔਰਤਾਂ ਨੂੰ ਦਿਤੀ ਮੁਫ਼ਤ ਸਹੂਲਤ ਕਾਰਨ ਵੱਡੇ ਅਦਾਰੇ ਪੀ.ਆਰ.ਟੀ.ਸੀ. ਨੂੰ ਇਕ ਦਿਨ ਵਿਚ 40 ਲੱਖ ਰੁਪਏ ਦਾ ਘਾਟਾ ਪੈਣ ਲੱਗਾ ਹੈ ਅਤੇ ਹਰ ਮਹੀਨੇ 15 ਕਰੋੜ ਰੁਪਏ ਦੇ ਕਰੀਬ ਘਾਟਾ ਹੋਵੇਗਾ। ਇਸ ਨਾਲ ਅਦਾਰੇ ਦੀ ਹਾਲਤ ਡਾਵਾਂਡੋਲ ਹੋਣ ਲੱਗੀ ਹੈ।
PRTC
ਪੂਰੇ ਸਾਲ ਦਾ ਹਿਸਾਬ ਲਾਈਏ ਤਾਂ ਇਹ ਘਾਟਾ 200 ਕਰੋੜ ਰੁਪਏ ਤਕ ਜਾਵੇਗਾ ਜਦ ਕਿ ਪੰਜਾਬ ਰੋਡਵੇਜ਼ ਅਤੇ ਪਨਬੱਸ ਦਾ ਘਾਟਾ ਇਸ ਤੋਂ ਵਖਰਾ ਹੈ। ਇਸ ਨਾਲ ਅਦਾਰੇ ਉਪਰ ਪੈਣ ਵਾਲੇ ਵਿੱਤੀ ਬੋਝ ਕਾਰਨ ਇਸ ਵਿਚ ਕੰਮ ਕਰਨ ਵਾਲੇ ਮੁਲਾਜ਼ਮਾਂ ਤੇ ਪੈਨਸ਼ਨਰਾਂ ਦੀ ਚਿੰਤਾ ਵੱਧ ਗਈ ਹੈ। ਪੈਨਸ਼ਨਰ ਤਾਂ ਅਪਣੀਆਂ ਬਕਾਇਆ ਅਦਾਇਗੀਆਂ ਲਈ ਪਹਿਲਾਂ ਹੀ ਕੋਰਟ ਵਿਚ ਕੇਸ ਲੜ ਰਹੇ ਹਨ।
prtc buses
ਜ਼ਿਕਰਯੋਗ ਹੈ ਕਿ ਹੋਰ ਵੱਖ ਵੱਖ ਵਰਗਾਂ ਨੂੰ ਰਿਆਇਤੀ ਤੇ ਮੁਫ਼ਤ ਬੱਸ ਸਫ਼ਰ ਦੀ ਪਹਿਲਾਂ ਦਿਤੀ ਹੋਈ ਸਹੂਲਤ ਕਾਰਨ ਵੀ ਪ੍ਰਤੀ ਮਹੀਨੇ 10 ਕਰੋੜ ਰੁਪਏ ਦਾ ਬਿਲ ਬਣਦਾ ਹੈ। ਭਾਵੇਂ ਸਰਕਾਰ ਨੇ ਪੀ.ਆਰ.ਟੀ.ਸੀ. ਨੂੰ ਇਸ ਦੀ ਭਰਪਾਈ ਲਈ ਅਦਾਇਗੀ ਕਰਨੀ ਹੁੰਦੀ ਹੈ ਪਰ ਲੰਮੇ ਸਮੇਂ ਤੋਂ ਕਰੋੜਾਂ ਰੁਪਏ ਸਰਕਾਰ ਸਿਰ ਖੜੇ ਹਨ। 150 ਕਰੋੜ ਰੁਪਏ ਦੀ ਬਕਾਇਆ ਅਦਾਇਗੀ ਲਟਕੀ ਹੋਈ ਹੈ। ਮਿਲੀ ਜਾਣਕਾਰੀ ਮੁਤਾਬਕ ਪਹਿਲਾਂ ਪੀ.ਆਰ.ਟੀ.ਸੀ. ਨੂੰ ਪ੍ਰਤੀ ਦਿਨ ਇਕ ਕਰੋੜ 25 ਲੱਖ ਦੀ ਆਮਦਨ ਹੁੰਦੀ ਸੀ ਜੋ ਹੁਣ ਕੁੱਝ ਹੀ ਦਿਨਾਂ ਅੰਦਰ ਔਰਤਾਂ ਨੂੰ ਮੁਫ਼ਤ ਸਹੂਲਤ ਦੇਣ ਨਾਲ ਘੱਟ ਕੇ 90 ਲੱਖ ਪ੍ਰਤੀ ਦਿਨ ਤੋਂ ਹੇਠਾਂ ਆ ਗਈ ਹੈ।
