ਭਾਰਤ ਸਰਕਾਰ ਹਾਂਗ ਕਾਂਗ ਕੋਲੋਂ ਬਹੁ ਚਰਚਿਤ ਨਾਭਾ ਜੇਲ ਬ੍ਰੇਕ ਕਾਂਡ ਦੇ ਮਾਸਟਰ ਮਾਈਂਡ ਮੰਨੇ ਜਾਂਦੇ ਰਮਨਜੀਤ ਰੋਮੀ ਦੀ ਆਰਜੀ ਸਪੁਰਦਗੀ ਲੈਣ ਦੀ ਤਿਆਰੀ ਕਰ ਰਹੀ ਹੈ
ਚੰਡੀਗੜ੍ਹ, ਭਾਰਤ ਸਰਕਾਰ ਹਾਂਗ ਕਾਂਗ ਕੋਲੋਂ ਬਹੁ ਚਰਚਿਤ ਨਾਭਾ ਜੇਲ ਬ੍ਰੇਕ ਕਾਂਡ ਦੇ ਮਾਸਟਰ ਮਾਈਂਡ ਮੰਨੇ ਜਾਂਦੇ ਰਮਨਜੀਤ ਰੋਮੀ ਦੀ ਆਰਜੀ ਸਪੁਰਦਗੀ ਲੈਣ ਦੀ ਤਿਆਰੀ ਕਰ ਰਹੀ ਹੈ। ਰੋਮੀ ਪੰਜਾਬ ਵਿਚ ਟਾਰਗੇਟ ਕਿਲਿੰਗ੍ਸ ਤੇ ਕਈ ਹੋਰ ਅਪਰਾਧਿਕ ਗਤੀਵਿਧੀਆਂ ਲਈ ਵੀ ਇੰਟਰਪੋਲ ਨੂੰ ਲੋੜੀਂਦਾ ਹੈ। ਸੂਤਰਾਂ ਦੀ ਮੰਨੀਏ ਤਾਂ ਰੋਮੀ ਕੋਲੋਂ ਰੈਫਰੈਂਡਮ 2020 ਦੇ ਸਬੰਧ ਵਿਚ ਪੁੱਛਗਿੱਛ ਕੀਤੀ ਜਾਣੀ ਹੈ। ਦੱਸ ਦਈਏ ਕਿ ਰੈਫਰੈਂਡਮ ਦੇ ਪ੍ਰਬੰਧਕਾਂ ਨਾਲ ਰੋਮੀ ਦੇ ਸਬੰਧ ਦੀ ਸੂਹ ਭਾਰਤੀ ਏਜੰਸੀ ਨੂੰ ਲੱਗੀ ਹੈ।
Ramanjit Singh Romi
ਇਹ ਵੀ ਜਾਣਕਾਰੀ ਮਿਲੀ ਹੈ ਕਿ ਭਾਰਤੀ ਸੁਰੱਖਿਆ ਏਜੰਸੀਆਂ ਦੇ ਹੱਥ ਜਰਮਨੀ ਇੰਗਲੈਂਡ ਤੇ ਕਨੇਡਾ ਨਾਲ ਸਬੰਧਤ ਰੈਫਰੈਂਡਮ ਪ੍ਰਬੰਧਕਾਂ ਤੇ ਗਰਮ ਦਲੀਆ ਦਾ ਪੰਜਾਬ ਵਿਚ ਸਰਗਰਮ ਗੈਂਗਸਟਰਾਂ ਨਾਲ ਵੀ ਕੋਈ ਕੜੀ ਜੁੜੀ ਹੋਣ ਤਕ ਵੀ ਪਹੁੰਚ ਗਏ ਹਨ। ਰੋਮੀ ਦੀ ਸਪੁਰਦਗੀ ਦੇਣ ਵਾਸਤੇ ਭਾਰਤੀ ਅਥਾਰਟੀਆਂ 17 ਅਗਸਤ ਤੋਂ ਪਹਿਲਾਂ ਪਹਿਲਾਂ ਲੋੜੀਂਦੇ ਦਸਤਾਵੇਜ਼ ਹਾਂਗ ਕਾਂਗ ਅਦਾਲਤ 'ਚ ਦਾਇਰ ਕਰਨ ਜਾ ਰਹੀਆਂ ਹਨ ਅਤੇ 23 ਅਗਸਤ ਨੂੰ ਹੋਣ ਵਾਲੀ ਸੁਣਵਾਈ 'ਚ ਫੈਸਲਾ ਆਉਣ ਦੀ ਸੰਭਾਵਨਾ ਹੈ। ਰੋਮੀ ਨੂੰ ਹਾਂਗ ਕਾਂਗ 'ਚ ਫਰਵਰੀ ਮਹੀਨੇ 32.6 ਮਿਲੀਅਨ ਹਾਂਗ ਕਾਂਗ ਡਾਲਰ ਦੀ ਡਕੈਤੀ ਦੇ ਮਾਮਲੇ ਚ ਗਿਰਫ਼ਤਾਰ ਕੀਤਾ ਗਿਆ ਸੀ।
Vicky Gounder
ਇਹ ਵੀ ਪਤਾ ਲੱਗਿਆ ਹੈ ਕਿ ਪੰਜਾਬ ਪੁਲਿਸ ਨੇ ਵੀ ਕਰੀਬ 1000 ਤੋਂ ਵੱਧ ਪੰਨਿਆਂ ਦਾ ਕੇਸ ਤਿਆਰ ਕੀਤਾ ਹੈ ਤਾਂ ਜੋ ਰੋਮੀ ਦੀ ਹਿਰਾਸਤ ਯਕੀਨੀ ਹੋ ਸਕੇ। ਇਸ ਸਬੰਧ ਵਿਚ ਪੰਜਾਬ ਅਤੇ ਕੇਂਦਰੀ ਏਜੰਸੀਆਂ ਨਾਲ ਸਬੰਧਤ ਕੁਝ ਸੀਨੀਅਰ ਇੰਟੈਲੀਜੈਂਸ ਅਫਸਰ ਰੋਮੀ ਦੀ ਸਪੁਰਦਗੀ ਲਈ ਦਬਾਅ ਬਣਾਉਣ ਵਾਸਤੇ ਹਾਂਗ ਕਾਂਗ ਵੀ ਜਾ ਕੇ ਆਏ ਹਨ। ਜਿਸ ਤਹਿਤ ਉਥੇ ਰੋਮੀ ਤੇ ਲੱਗੇ ਡਕੈਤੀ ਦੇ ਦੋਸ਼ਾਂ ਨੂੰ ਵੀ ਨਰਮ ਕੀਤਾ ਗਿਆ ਹੈ ਜਿਸ ਮਗਰੋਂ ਰੋਮੀ ਦੀ ਭਾਰਤ ਨੂੰ ਸਪੁਰਦਗੀ ਦਾ ਰਾਹ ਪੱਧਰ ਹੋ ਚੁੱਕਾ ਮੰਨਿਆ ਜਾ ਰਿਹਾ ਹੈ।
Prema Lahoria
ਦੱਸਣਯੋਗ ਹੈ ਕਿ ਜਨਵਰੀ ਮਹੀਨੇ ਰਾਜਸਥਾਨ ਵਿਚ ਪੰਜਾਬ ਪੁਲਿਸ ਨਾਲ ਮੁਕਾਬਲੇ ਵਿਚ ਮਾਰੇ ਗਏ ਗੈਂਗਸਟਰ ਵਿੱਕੀ ਗੌਂਡਰ ਤੇ ਪ੍ਰੇਮਾ ਲਾਹੌਰੀਆ ਨਾਲ ਵੀ ਰੋਮੀ ਦੇ ਸਬੰਧ ਰਹੇ ਹਨ। ਪੰਜਾਬ ਦੇ ਡੀਜੀਪੀ ਸੁਰੇਸ਼ ਅਰੋੜਾ ਨੇ ਵੀ ਦਾਅਵਾ ਕੀਤਾ ਹੈ ਕਿ ਰੋਮੀ ਨੇ ਗੌਂਡਰ ਨੂੰ ਹਥਿਆਰ ਮੁਹਈਆ ਕਰਵਾਉਣ ਵਿਚ ਮਦਦ ਕੀਤੀ ਸੀ ਤੇ ਨਾਭਾ ਜੇਲ੍ਹ ਤੋੜਨ ਲਈ ਵੀ ਗੈਂਗਸਟਰਾਂ ਨੂੰ ਪੈਸੇ ਮੁਹਈਆ ਕਰਵਾਏ ਸਨ।
