ਅਕਾਲੀ ਦਲ ਦੀ ਸਰਕਾਰ ਦੇ ਕਾਰਜਕਾਲ ਦੇ ਆਖ਼ਰੀ ਸਾਲਾਂ ਵਿਚ ਅੰਮ੍ਰਿਤਸਰ ਵਿਚ ਤਿਆਰ ਕਰਵਾਈ ਗਈ ਸੀ ਵਿਰਾਸਤੀ ਗਲੀ
ਅੰਮ੍ਰਿਤਸਰ: ਅਕਾਲੀ ਦਲ ਦੀ ਸਰਕਾਰ ਦੇ ਕਾਰਜਕਾਲ ਦੇ ਆਖ਼ਰੀ ਸਾਲਾਂ ਵਿਚ ਅੰਮ੍ਰਿਤਸਰ ਵਿਚ ਤਿਆਰ ਕਰਵਾਈ ਗਈ ਵਿਰਾਸਤੀ ਗਲੀ ਤੇ ਲੱਗੇ ਪੱਥਰਾਂ ਦੇ ਖ਼ਰਾਬ ਹੋਣ ਤੇ ਟੁਟ ਜਾਣ ਦੀਆਂ ਖ਼ਬਰਾਂ ਤਾਂ ਚਰਚਾ ਵਿਚ ਸਨ, ਹੁਣ ਵਿਰਾਸਤੀ ਗਲੀ ਵਿਚ ਲੱਗੇ ਗੁੰਬਦ ਵੀ ਡਿਗਣੇ ਸ਼ੁਰੂ ਹੋ ਗਏ ਹਨ।
photo
ਸ੍ਰੀ ਦਰਬਾਰ ਸਾਹਿਬ ਦੇ ਐਨ ਨੇੜੇ ਸ਼ਨੀ ਮੰਦਰ ਦੇ ਸਾਹਮਣੇ ਸਥਿਤ ਘੰਟਾਘਰ ਮਾਰਕੀਟ ਦੀ ਛੱਤ 'ਤੇ ਬਣਿਆ ਇਕ ਗੁੰਬਦ ਅਚਾਨਕ ਅਪਣੇ ਆਪ ਡਿੱਗ ਪਿਆ। ਸ੍ਰੀ ਦਰਬਾਰ ਸਾਹਿਬ ਦੇ ਸਾਹਮਣੇ ਬਣੀ ਵਿਰਾਸਤੀ ਗਲੀ ਵਿਚ ਸਥਿਤ ਇਸ ਮਾਰਕੀਟ ਵਿਚ 250 ਦੇ ਕਰੀਬ ਦੁਕਾਨਾਂ ਤੇ ਪੁਲਿਸ ਚੌਕੀ ਗਲਿਆਰਾ ਵੀ ਸਥਿਤ ਹੈ।
Darbar Sahib
ਅੱਜ ਸ਼ਾਮ ਕਰੀਬ 4 ਵਜੇ ਅਚਾਨਕ ਇਹ ਗੁੰਬਦ ਡਿੱਗ ਪੈਣ ਤੋਂ ਬਾਅਦ ਦੁਕਾਨਦਾਰਾਂ ਦੇ ਮਨਾਂ ਵਿਚ ਦਹਿਸ਼ਤ ਦਾ ਮਾਹੌਲ ਹੈ ਕਿਉਂਕਿ ਵਿਰਾਸਤੀ ਗਲੀ ਵਿਚ ਥਾਂ-ਥਾਂ ਬਣੇ ਬਾਕੀ ਗੁੰਬਦਾਂ ਦੇ ਹੇਠੋਂ ਹਰ ਰੋਜ਼ ਹਜ਼ਾਰਾਂ ਲੋਕ ਲੰਘਦੇ ਹਨ।
Sukhbir Badal
ਇਸ ਘਟਨਾ ਕਾਰਨ ਕਿਸੇ ਤਰ੍ਹਾਂ ਦਾ ਜਾਨੀ ਨੁਕਸਾਨ ਤਾਂ ਨਹੀਂ ਹੋਇਆ ਪਰ ਚਰਚਾ ਚਲ ਪਈ ਕਿ ਵਿਰਾਸਤੀ ਗਲੀ ਵਿਚ ਵਰਤਿਆ ਗਿਆ ਸਮਾਨ ਘਟੀਆ ਮਿਆਰ ਦਾ ਸੀ। ਕਿਹਾ ਜਾਂਦਾ ਹੈ ਕਿ ਵਿਰਾਸਤੀ ਗਲੀ ਵਿਚ ਜੋ ਸਮਾਨ ਵਰਤਿਆ ਗਿਆ ਹੈ ਉਹ ਗ਼ੈਰ ਮਿਆਰੀ ਤੇ ਸਰਕਾਰੀ ਮਾਪਦੰਡ ਪੂਰੇ ਨਹੀਂ ਕਰਦਾ।
ਇਸ ਨੂੰ ਲੈ ਕੇ ਵਿਰਾਸਤੀ ਗਲੀ ਦੇ ਨਿਰਮਾਣ ਸਮੇਂ ਵੀ ਰੌਲਾ ਪਿਆ ਸੀ ਪਰ ਕੋਈ ਸੁਣਵਾਈ ਨਹੀਂ ਹੋਈ। ਅਕਾਲੀ ਸਰਕਾਰ ਨੇ ਇਸ ਵਿਰਾਸਤੀ ਗਲੀ ਦਾ ਨਿਰਮਾਣ ਸਾਲ 2017 ਦੀਆਂ ਵਿਧਾਨ ਸਭਾ ਚੋਣਾਂ ਵਿਚ ਲਾਭ ਲੈਣ ਲਈ ਕਰਵਾਇਆ ਸੀ ਪਰ ਅਜਿਹਾ ਨਾ ਹੋ ਸਕਿਆ।
