ਪੰਜਾਬ 'ਚ ਸਰਕਾਰੀ ਬੈਂਕਾਂ ਵਲੋਂ ਲੋਨ ਲੈਣ ਵਾਲੇ ਆਮ ਲੋਕਾਂ ਨੂੰ ਰੱਜ ਕੇ ਖੱਜਲ ਖੁਆਰ ਕੀਤਾ ਜਾਂਦਾ ਹੈ।
ਮੁਕਤਸਰ : ਪੰਜਾਬ 'ਚ ਸਰਕਾਰੀ ਬੈਂਕਾਂ ਵਲੋਂ ਲੋਨ ਲੈਣ ਵਾਲੇ ਆਮ ਲੋਕਾਂ ਨੂੰ ਰੱਜ ਕੇ ਖੱਜਲ ਖੁਆਰ ਕੀਤਾ ਜਾਂਦਾ ਹੈ। ਜਿਸ ਤੋਂ ਬਚਣ ਲਈ ਆਮ ਲੋਕ ਪ੍ਰਾਈਵੇਟ ਫਾਇਨਾਂਸਰਾਂ ਦੇ ਮੱਕੜ ਜਾਲ ਵਿਚ ਫਸ ਜਾਂਦੇ ਹਨ। ਅਜਿਹਾ ਹੀ ਮਾਮਲਾ ਗਿੱਦੜਬਾਹਾ ਦੇ ਅਧਿਆਪਕ ਜੋੜੇ ਦਾ ਸਾਹਮਣੇ ਆਇਆ ਹੈ। ਜਿੱਥੇ ਕਮਰ ਕਿਸ਼ੋਰ ਬਾਂਸਲ ਨੇ ਆਪਣੀ ਦੁੱਖ ਭਰੀ ਕਹਾਣੀ ਸੁਣਾਉਦਿਆਂ ਦੱਸਿਆ ਕਿ ਉਹ ਦੋਵੇ ਪਤੀ –ਪਤਨੀ ਕੰਪਿਊਟਰ ਸਾਇੰਸ ਦੇ ਅਧਿਆਪਕ ਹਨ ਪਰ ਅਚਾਨਕ ਉਹਨਾਂ ਦਾ ਐਕਸੀਡੈਂਟ ਹੋ ਗਿਆ ਸੀ।
ਜਿਸ ਵਿਚ ਉਨ੍ਹਾਂ ਦੀ ਲੱਤ ਟੁੱਟ ਗਈ ਸੀ ਜਿਸ ਕਾਰਨ ਉਹਨਾਂ ਵੱਲੋਂ ਫਾਇਨਾਂਸਰ ਬਲਜਿੰਦਰ ਸ਼ਰਮਾ, ਪੰਕਜ਼ ਗਰਗ ਅਤੇ ਹਰਮਹੇਸ਼ਪਾਲ ਸਿੰਘ ਚਹਿਲ ਤੋਂ ਕਿਸ਼ਤਾਂ ਰਾਹੀ ਰੁਪਏ ਲਏ ਸਨ। ਜਿਨ੍ਹਾਂ ਨੂੰ ਵਿਆਜ ਸਮੇਤ ਵਾਪਿਸ ਵੀ ਕਰ ਦਿੱਤੇ ਗਏ ਹਨ। ਇਸ ਦੇ ਬਾਵਜੂਦ ਕਾਗਜਾਤ ਵਾਪਸ ਮੰਗਣ 'ਤੇ ਉਕਤ ਫਾਇਨਾਂਸਰਾਂ ਵਲੋਂ ਉਨ੍ਹਾਂ 'ਤੇ ਝੂਠਾ ਕੇਸ ਕਰਨ ਤੋਂ ਇਲਾਵਾ ਉੱਚ ਸਿਆਸਤਦਾਨਾਂ ਅਤੇ ਗੈਗਸਟਰਾਂ ਨਾਲ ਆਪਣੇ ਸਬੰਧਾਂ ਦਾ ਹਵਾਲਾ ਦੇ ਕੇ ਉਨ੍ਹਾਂ ਦੇ ਪਰਿਵਾਰ ਨੂੰ ਮਰਵਾ ਦੇਣ ਅਤੇ ਮਕਾਨ 'ਤੇ ਕਬਜਾ ਕਰਨ ਦੀਆਂ ਧਮਕੀਆਂ ਦਿੱਤੀਆਂ ਜਾ ਰਹੀਆਂ ਹਨ।
ਉੱਥੇ ਹੀ ਉਹਨਾਂ ਦੀ ਪਤਨੀ ਸੰਧਿਆਂ ਬਾਂਸਲ ਨੇ ਕਿਹਾ ਕਿ ਮੁੱਖ ਮੰਤਰੀ ਪੰਜਾਬ, ਡੀ.ਜੀ.ਪੀ ਪੰਜਾਬ ਪੁਲਿਸ ਸਮੇਤ ਉੱਚ ਪੁਲਿਸ ਅਫ਼ਸਰਾਂ ਨੂੰ ਆਪਣੀ ਸ਼ਿਕਾਇਤ ਭੇਜ ਕੇ ਉਕਤ ਫਾਇਨਾਂਸਰਾਂ ਤੋਂ ਉਨ੍ਹਾਂ ਦੇ ਕਾਗਜਾਤ ਵਾਪਸ ਕਰਵਾਉਣ ਅਤੇ ਉਨ੍ਹਾਂ ਤੋਂ ਆਪਣੇ ਪਰਿਵਾਰ ਦੀ ਜਾਨ ਮਾਲ ਦੀ ਸੁਰੱਖਿਆ ਦੀ ਮੰਗ ਕੀਤੀ ਹੈ। ਇਸ ਸਬੰਧੀ ਥਾਣਾ ਗਿੱਦੜਬਾਹਾ ਦੇ ਮੁੱਖ ਅਫ਼ਸਰ ਕ੍ਰਿਸ਼ਨ ਕੁਮਾਰ ਨੇ ਕਿਹਾ ਕਿ ਉਕਤ ਸ਼ਿਕਾਇਤ ਦੇ ਅਧਾਰ 'ਤੇ ਜਾਂਚ ਪੜਤਾਲ ਚੱਲ ਰਹੀ ਹੈ ਅਤੇ ਦੋਸ਼ੀ ਪਾਏ ਗਏ ਕਿਸੇ ਵੀ ਵਿਅਕਤੀ ਨੂੰ ਬਖਸ਼ਿਆ ਨਹੀਂ ਜਾਵੇਗਾ।
ਦੱਸ ਦੇਈਏ ਕਿ ਫਾਇਨਾਂਸਰਾਂ ਵਲੋਂ ਵਿਆਜ 'ਤੇ ਪੈਸੇ ਦੇਣ ਸਮੇਂ ਕਰਜਾ ਲੈਣ ਵਾਲੇ ਵਿਅਕਤੀ ਤੋਂ ਵਿਆਜ਼ ਸਮੇਤ ਪੂਰੇ ਪੈਸੇ ਵਾਪਸ ਕਰਨ ਤੋਂ ਬਾਅਦ ਮੋੜ ਦੇਣ ਦਾ ਵਾਆਦਾ ਕਰਕੇ ਗਰੰਟੀ ਦੇ ਤੌਰ 'ਤੇ ਕੁੱਝ ਖਾਲੀ ਚੈਕਾਂ ਅਤੇ ਕੁੱਝ ਖਾਲੀ ਕਾਗਜਾਂ 'ਤੇ ਦਖਸਤ ਕਰਵਾ ਲਏ ਜਾਂਦੇ ਹਨ। ਜਦ ਉਪਰੋਕਤ ਕਾਰਵਾਈ ਰਾਹੀਂ ਪੈਸੇ ਵਿਆਜ 'ਤੇ ਲੈਣ ਵਾਲਾ ਵਿਅਕਤੀ ਇਕ ਵਾਰ ਕਾਨੂੰਨੀ ਤੌਰ 'ਤੇ ਇਨ੍ਹਾਂ ਫਾਇਨਾਂਸਰਾਂ ਦੇ ਜਾਲ ਵਿਚ ਫਸ ਜਾਂਦਾ ਹੈ ਤਾਂ ਇਹ ਆਪਣਾ ਅਸਲੀ ਰੰਗ ਦਿਖਾਉਣਾ ਸ਼ੁਰੂ ਕਰ ਦਿੰਦੇ ਹਨ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।