ਪੰਜਾਬ ਦੇ ਡੀ.ਜੀ.ਪੀ. ਦਿਨਕਰ ਗੁਪਤਾ ਨੇ ਸੂਬੇ ਦੇ ਸਾਰੇ ਪੁਲਿਸ ਕਮਿਸ਼ਨਰਾਂ, ਐਸਐਸਪੀਜ਼ ਅਤੇ ਬਟਾਲੀਅਨਾਂ ਦੇ ਕਮਾਂਡੈਂਟਸ...
ਚੰਡੀਗੜ੍ਹ : ਪੰਜਾਬ ਦੇ ਡੀ.ਜੀ.ਪੀ. ਦਿਨਕਰ ਗੁਪਤਾ ਨੇ ਸੂਬੇ ਦੇ ਸਾਰੇ ਪੁਲਿਸ ਕਮਿਸ਼ਨਰਾਂ, ਐਸਐਸਪੀਜ਼ ਅਤੇ ਬਟਾਲੀਅਨਾਂ ਦੇ ਕਮਾਂਡੈਂਟਸ ਨੂੰ ਹਦਾਇਤ ਜਾਰੀ ਕੀਤੀ ਹੈ ਕਿ ਉਹ ਸਮੁੱਚੇ ਸੂਬੇ ਵਿਚ ਸਿਆਸੀ ਆਗੂਆਂ ਤੇ ਅਫ਼ਸਰਾਂ ਨਾਲ ਲੱਗੇ ਸਾਰੇ ‘ਅਣ-ਅਧਿਕਾਰਿਤ’ ਗੰਨਮੈਨ ਤੁਰਤ ਵਾਪਸ ਲੈ ਲੈਣ। ਇਕ ਅਨੁਮਾਨ ਮੁਤਾਬਕ ਪੁਲਿਸ ਦੇ 1,500 ਤੋਂ 2,000 ਗੰਨਮੈਨ ਅਜਿਹੀਆਂ ਅਣਅਧਿਕਾਰਿਤ ਡਿਊਟੀਆਂ ਉਤੇ ਲੱਗੇ ਹੋਏ ਦੱਸੇ ਜਾਂਦੇ ਹਨ।
DGP Dinkar Gupta
ਕੁਝ ਸਮਾਂ ਪਹਿਲਾਂ ਹੀ ਸੂਬੇ ਦੇ ਸੁਰੱਖਿਆ ਘੇਰੇ ਦੀ ਸਮੀਖਿਆ ਕਰਵਾਈ ਗਈ ਸੀ ਤੇ ਉਸ ਦੇ ਨਤੀਜਿਆਂ ਉਤੇ ਪੰਜਾਬ ਦੇ ਡੀਜੀਪੀ ਦਿਨਕਰ ਗੁਪਤਾ ਨੇ ਚਿੰਤਾ ਜ਼ਾਹਿਰ ਕੀਤੀ ਹੈ। ਉਨ੍ਹਾਂ ਨੇ ਇਸ ਲਈ ਜ਼ਿਲ੍ਹਾ ਤੇ ਸ਼ਹਿਰਾਂ ਦੇ ਪੁਲਿਸ ਮੁਖੀਆਂ ਦੀ ਆਲੋਚਨਾ ਵੀ ਕੀਤੀ ਹੈ ਕਿਉਂਕਿ ਉਨ੍ਹਾਂ ਨੇ ਹੀ ਅਪਣੇ ਪੱਧਰ ਉਤੇ ਵੱਡੀ ਗਿਣਤੀ ਵਿਚ ਅਜਿਹੇ ਗੰਨਮੈਨ ਬਿਨਾਂ ਸਿਕਓਰਿਟੀ ਵਿੰਗ ਦੀ ਇਜਾਜ਼ਤ ਦੇ ਤੈਨਾਤ ਕੀਤੇ ਹੋਏ ਸਨ।
ਡੀ.ਜੀ.ਪੀ. ਨੇ ਅਪਣੀ ਚਿੱਠੀ ਵਿਚ ਕਿਹਾ ਹੈ ਕਿ ਜੇਕਰ 14 ਮਾਰਚ ਤੱਕ ਇਹ ਗੰਨਮੈਨ ਵਾਪਸ ਨਾ ਲਏ ਗਏ, ਤਾਂ ਅਜਿਹੇ ਹਰੇਕ ਕਾਂਸਟੇਬਲ ਦੀ ਤਨਖ਼ਾਹ ਲਈ 52,000 ਰੁਪਏ ਐੱਸਐੱਸਪੀ, ਪੁਲਿਸ ਕਮਿਸ਼ਨਰ ਜਾਂ ਸਬੰਧਤ ਕਮਾਂਡੈਂਟ ਦੀਆਂ ਤਨਖ਼ਾਹਾਂ ਵਿਚੋਂ ਕੱਟੀ ਜਾਵੇਗੀ। ਚਿੱਠੀ ਵਿਚ ਲਿਖਿਆ ਗਿਆ ਹੈ ਕਿ ਅਜਿਹੀਆਂ ਚਿੱਠੀਆਂ ਉਨ੍ਹਾਂ ਤੋਂ ਪਹਿਲਾਂ ਦੇ ਡੀਜੀਪੀਜ਼ ਨੇ ਵੀ ਕੱਢੀਆਂ ਸਨ ਪਰ ਉਨ੍ਹਾਂ ਨੂੰ ਅੱਖੋਂ ਪ੍ਰੋਖੇ ਕੀਤਾ ਜਾਂਦਾ ਰਿਹਾ ਹੈ।
