ਤੇਜ਼ਾਬ ਹਮਲੇ ਦੁਆਰਾ ਖ਼ੂਬਸੂਰਤ ਲੜਕੀਆਂ ਦੇ ਚਿਹਰਿਆਂ ਨੂੰ ਖ਼ਰਾਬ ਕਰ ਕੇ, ਉਨ੍ਹਾਂ ਦੇ ਰਹਿੰਦੇ ਜੀਵਨ ਨੂੰ ਨਰਕ ਵਿਚ ਤਬਦੀਲ ਕਰਨ ਦਾ ਮਸਲਾ, ਮੁੜ ਸੁਰਖੀਆਂ ਵਿਚ ਹੈ।
ਇੰਦਰਜੀਤ ਕੌਰ 'ਤੇ 8 ਦਸੰਬਰ 2011 ਨੂੰ ਹੋਇਆ ਸੀ ਤੇਜ਼ਾਬੀ ਹਮਲਾ
ਰੂਪਨਗਰ (ਸਵਰਨ ਸਿੰਘ ਭੰਗੂ): ਬੀਤੇ ਦਿਨ ਦੀਪੀਕਾ ਪਾਦੂਕੋਨ ਦੀ ਫ਼ਿਲਮ 'ਛਪਾਕ' ਦੇ ਰਿਲੀਜ਼ ਹੋਣ ਤੋਂ ਬਾਅਦ, ਤੇਜ਼ਾਬ ਹਮਲੇ ਦੁਆਰਾ ਖ਼ੂਬਸੂਰਤ ਲੜਕੀਆਂ ਦੇ ਚਿਹਰਿਆਂ ਨੂੰ ਖ਼ਰਾਬ ਕਰ ਕੇ, ਉਨ੍ਹਾਂ ਦੇ ਰਹਿੰਦੇ ਜੀਵਨ ਨੂੰ ਨਰਕ ਵਿਚ ਤਬਦੀਲ ਕਰਨ ਦਾ ਮਸਲਾ, ਮੁੜ ਸੁਰਖੀਆਂ ਵਿਚ ਹੈ।
chhapaak
ਭਾਵੇਂ ਇਸ ਫ਼ਿਲਮ ਦੀ ਕਹਾਣੀ 'ਲਕਸ਼ਮੀ ਅਗਰਵਾਲ' ਨਾਂ ਦੀ ਉਸ ਲੜਕੀ ਨਾਲ ਸਬੰਧਤ ਹੈ ਜਿਸ ਦੇ ਚਿਹਰੇ 'ਤੇ 15 ਸਾਲ ਦੀ ਉਮਰ ਵਿਚ, ਉਸ ਦੀ ਉਮਰ ਤੋਂ ਦੁਗਣੇ ਨੌਜਵਾਨ ਨੇ ਤੇਜ਼ਾਬ ਸੁੱਟਿਆ ਸੀ। ਇਹ ਫ਼ਿਲਮ ਸੰਵੇਦਨ ਦਰਸ਼ਕਾਂ ਦੀਆਂ ਅੱਖਾਂ ਦੇ ਅੱਥਰੂ ਬਣਦੀ ਹੈ ਅਤੇ ਅਨੇਕਾਂ ਸਵਾਲ ਵੀ ਉਭਾਰਦੀ ਹੈ ਕਿ ਮਨੁੱਖ, ਪਿਆਰ ਨੂੰ ਅਧਿਕਾਰ ਸਮਝਦਾ ਹੋਇਆ ਐਨਾ ਵਹਿਸ਼ੀ ਕਿਉਂ ਹੋ ਜਾਂਦਾ ਹੈ? ਸਾਡੇ ਦੇਸ਼ ਵਿੱਚ ਹੀ ਤੇਜ਼ਾਬੀ ਹਮਲੇ ਤੋਂ ਪੀੜਤ ਹਜ਼ਾਰਾਂ ਔਰਤਾਂ ਹੋ ਸਕਦੀਆਂ ਹਨ।
Laxmi Agarwal and Deepika Padukone
ਅਜਿਹੀਆਂ ਪੀੜਤਾਂ ਵਿਚ ਜ਼ਿਲ੍ਹਾ ਰੂਪਨਗਰ ਦੇ ਸ਼ਹਿਰ ਮੋਰਿੰਡਾ ਨੇੜਲੇ ਪਿੰਡ ਮੜੌਲੀ ਕਲਾਂ ਦੀ ਇੰਦਰਜੀਤ ਕੌਰ ਸ਼ਾਮਲ ਹੈ ਜੋ ਉਸ ਸਮੇਂ ਸਨਾਤਕ ਡਿਗਰੀ ਦੀ ਆਖ਼ਰੀ ਸਾਲ ਦੀ ਵਿਦਿਆਰਥਣ ਸੀ। ਉਸ 'ਤੇ 8 ਦਸੰਬਰ 2011 ਨੂੰ ਤੇਜ਼ਾਬੀ ਹਮਲਾ ਹੋਇਆ ਸੀ, ਉਪਰੰਤ ਉਸ ਨੇ ਇਲਾਜ ਤਸੀਹਾ ਝੱਲਿਆ। ਵਾਰ-ਵਾਰ ਹੋਏ ਅਪਰੇਸ਼ਨਾਂ ਉਪਰੰਤ ਮਦਰਾਸ ਦੇ ਵਕਾਰੀ ਅੱਖਾਂ ਦੇ ਹਸਪਤਾਲ ਦੇ ਮਾਹਰ ਡਾਕਟਰ, ਆਖ਼ਰ ਇਸ ਸਿੱਟੇ 'ਤੇ ਪਹੁੰਚ ਗਏ ਕਿ ਹੁਣ ਇਹ ਕੁੜੀ ਕਦੇ ਵੀ ਵੇਖ ਨਹੀਂ ਸਕੇਗੀ।
Photo
ਸਿਹਤ-ਵਿਗਿਆਨ ਦੀ ਇਸ ਬੇਵਸੀ ਤੋਂ ਅਸੀਂ ਸਹਿਜੇ ਹੀ ਇਹ ਅੰਦਾਜ਼ਾ ਲਾ ਸਕਦੇ ਹਾਂ ਕਿ ਇੰਦਰਜੀਤ ਦੇ ਚਿਹਰੇ 'ਤੇ ਸੁੱਟੇ ਗਏ ਤੇਜ਼ਾਬੀ-ਹਮਲੇ ਦੀ ਤੀਬਰਤਾ ਕੀ ਹੋਵੇਗੀ? ਇਸ ਪੀੜਤਾ ਦੇ ਚਿਹਰੇ ਵੱਲ ਤੱਕਣਾ ਵੀ ਔਖਾ ਹੈ। ਉਸ ਦਾ ਨੱਕ ਨਹੀਂ ਰਿਹਾ, ਇਕ ਕੰਨ ਵੀ ਨਹੀਂ ਰਿਹਾ, ਸ਼ੁਕਰ ਇਹ ਹੈ ਕਿ ਬੁੱਲ੍ਹ ਕੁੱਝ ਬਚ ਗਏ ਹਨ ਜਿਨ੍ਹਾਂ ਕਾਰਨ ਉਹ ਹੌਲੀ ਹੌਲੀ ਖਾਣਾ ਖਾ ਸਕਦੀ ਹੈ ਅਤੇ ਬੋਲ ਸਕਦੀ ਹੈ।
Photo
ਵਰਨਣਯੋਗ ਹੈ ਕਿ ਉਹ ਗ਼ਰੀਬ ਪਰਵਾਰ ਦੀ ਧੀ ਹੈ। ਇਸ ਘਟਨਾ ਉਪਰੰਤ ਹਮਦਰਦੀ ਰੱਖਦੇ ਕੁੱਝ ਮਿਹਰਬਾਨਾਂ ਵਲੋਂ ਹੀ ਉਸ ਦਾ ਅਦਾਲਤੀ ਕੇਸ ਲੜਿਆ ਗਿਆ ਅਤੇ ਇਲਾਜ ਕਰਵਾਇਆ ਗਿਆ ਹੈ। ਇਸੇ ਦੌਰਾਨ ਉਸ ਨੇ ਅੱਗੇ ਪੜ੍ਹਨ ਦੀ ਮਿਥੀ ਅਤੇ ਦੇਹਰਾਦੂਨ ਦੀ ਇਕ ਸੰਸਥਾ ਤੋਂ, ਨਜ਼ਰ-ਰਹਿਤ ਲੋਕਾਂ ਦੀ ਪੜ੍ਹਨ/ਲਿਖਣ ਵਿਧੀ 'ਬਰੇਲ-ਲਿਪੀ' ਸਿੱਖੀ।
Photo
ਦਿੱਲੀ ਦੀ ਇਕ ਕੇਨਰਾ ਬੈਂਕ ਦੀ ਬਰਾਂਚ ਨੇ ਜਦੋਂ ਅੰਨ੍ਹੇ ਉਮੀਦਵਾਰ ਲਈ ਕਲਰਕ ਦੀ ਅਸਾਮੀ ਦਾ ਇਸ਼ਤਿਹਾਰ ਦਿਤਾ ਤਾਂ ਬਿਨੈ ਉਪਰੰਤ ਉਹ, ਪ੍ਰਤੀ ਮਹੀਨਾ 20,000 ਰੁਪਏ ਸੇਵਾ ਫਲ 'ਤੇ ਚੁਣੀ ਗਈ। ਇਹ ਵੀ ਹੈਰਾਨੀਜਨਕ ਹੈ ਕਿ ਉਹ ਕਿਸ ਵਿਧੀ ਦੁਆਰਾ ਕੰਪਿਊਟਰ 'ਤੇ ਕੰਮ ਕਰਦੀ ਹੈ? ਉਸ ਨੂੰ ਅਪਣੇ ਚਿਹਰੇ ਨੂੰ ਹਰ ਸਮੇਂ ਢੱਕ ਕੇ ਰੱਖਣਾ ਪੈਂਦਾ ਹੈ। ਸਹਾਇਕ ਦੇ ਤੌਰ 'ਤੇ ਉਸ ਦੀ ਮਾਤਾ ਹਰ ਸਮੇਂ ਉਸ ਦੇ ਨਾਲ-ਨਾਲ ਰਹਿੰਦੀ ਹੈ।
Chhapaak
ਇੰਦਰਜੀਤ ਕੌਰ ਨੇ 'ਸਪੋਕਸਮੈਨ' ਨਾਲ ਗੱਲ ਕਰਦਿਆਂ ਦਸਿਆ ਕਿ 5 ਵਰ੍ਹੇ ਪਹਿਲਾਂ ਡਾਕਟਰਾਂ ਨੇ ਉਸ ਨੂੰ ਦਸਿਆ ਸੀ ਕਿ ਉਸ ਦੇ ਚਿਹਰੇ ਨੂੰ ਦਿੱਖ ਯੋਗ ਬਣਾਉਣ ਲਈ 30 ਤੋਂ ਵੱਧ ਪਲਾਸਟਿਕ ਸਰਜਰੀਆਂ ਦੀ ਲੋੜ ਪਵੇਗੀ ਜਿਸ 'ਤੇ ਅੰਦਾਜ਼ਨ 40 ਲੱਖ ਰੁਪਿਆ ਖ਼ਰਚ ਆ ਸਕਦਾ ਹੈ। ਬਿਨਾਂ ਸ਼ੱਕ ਜੇਕਰ ਖ਼ਰਚ ਵਸੀਲੇ ਵੀ ਜੁਟ ਜਾਂਦੇ ਹਨ ਤਾਂ ਉਸ ਨੂੰ ਲੰਮਾ ਸਮਾਂ ਇਲਾਜ-ਤਸੀਹਾ ਝੱਲਣਾ ਹੋਵੇਗਾ। ਇਸ ਕਾਰਜ ਲਈ ਪੀੜਤ ਦਾ ਪਰਵਾਰ ਤਾਂ ਬਿਲਕੁਲ ਵੀ ਸਮਰੱਥ ਨਹੀਂ।
Chhapaak
ਜਦੋਂ ਇਸ ਦਰਦ ਬਾਰੇ ਆੜ੍ਹਤੀ ਐਸੋਸੀਏਸ਼ਨ ਸ੍ਰੀ ਚਮਕੌਰ ਸਾਹਿਬ ਦੇ ਪ੍ਰਧਾਨ ਮੇਜਰ ਸਿੰਘ ਮਾਂਗਟ, ਟਰੇਡ ਯੂਨੀਅਨ ਆਗੂ ਨਿਰਮਲ ਸਿੰਘ ਲੌਦੀ ਮਾਜਰਾ, ਆਦਰਸ਼ ਟਰੱਸਟ ਸ੍ਰੀ ਚਮਕੌਰ ਸਾਹਿਬ ਦੇ ਚੇਅਰਮੈਨ ਅਮਨਦੀਪ ਸਿੰਘ ਮਾਂਗਟ, ਜ਼ਿਲ੍ਹਾ ਰੂਪਨਗਰ ਦੀ ਖ਼ੂਨਦਾਨ-ਲਹਿਰ ਦੇ ਆਗੂ ਕਮਲਜੀਤ ਸਿੰਘ ਬਾਬਾ ਆਦਿ ਨਾਲ ਗੱਲ ਕੀਤੀ ਗਈ ਤਾਂ ਉਨ੍ਹਾਂ ਕਿਹਾ ਕਿ ਵਿਸ਼ਵ ਪਧਰੀ ਸੰਸਥਾ ਖ਼ਾਲਸਾ ਏਡ, ਸਰਬੱਤ ਦਾ ਭਲਾ ਟਰੱਸਟ, ਵਰਲਡ ਕੈਂਸਰ ਕੇਅਰ ਸੁਸਾਇਟੀ ਜਿਹੀਆਂ ਸਮਰੱਥ ਸੰਸਥਾਵਾਂ ਇਸ ਕਾਰਜ ਨੂੰ ਅਪਣੇ ਹੱਥ ਲੈ ਸਕਦੀਆਂ ਹਨ।
