ਨੇੜਲੇ ਪਿੰਡ ਘਿਓਰਾ ਵਿਖੇ ਅਣਖ ਖਾਤਰ ਕੁੜੀ ਦਾ ਕਤਲ ਕਰ ਕੇ ਦੇਰ ਰਾਤ ਸੰਸਕਾਰ ਕਰਨ ਦਾ ਮਾਮਲਾ...
ਚੰਡੀਗੜ੍ਹ: ਨੇੜਲੇ ਪਿੰਡ ਘਿਓਰਾ ਵਿਖੇ ਅਣਖ ਖਾਤਰ ਕੁੜੀ ਦਾ ਕਤਲ ਕਰ ਕੇ ਦੇਰ ਰਾਤ ਸੰਸਕਾਰ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਕੁੜੀ ਨੇ ਆਪਣੇ ਪਰਵਾਰ ਦੀ ਮਰਜ਼ੀ ਖ਼ਿਲਾਫ਼ ਪਿੰਡ ਦੇ ਹੀ ਇਕ ਮੁੰਡੇ ਨਾਲ ਪ੍ਰੇਮ ਵਿਆਹ ਕਰਵਾਇਆ ਸੀ। ਜਿਸ ਦਾ ਕੁੜੀ ਦੇ ਪਰਵਾਰ ਵੱਲੋਂ ਵਿਰੋਧ ਕੀਤਾ ਜਾ ਰਿਹਾ ਸੀ। ਥਾਣਾ ਸਦਰ ਪੁਲਿਸ ਨੇ ਪ੍ਰੇਮੀ ਦੀ ਸ਼ਿਕਾਇਤ ‘ਤੇ ਕੁੜੀ ਦੇ ਪਿਓ ਤੇ ਭਰਾ ਖ਼ਿਲਾਫ਼ ਕਤਲ ਦਾ ਮਾਮਲਾ ਦਰਜ ਕਰ ਕੇ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਪਿੰਡ ਘਿਓਰਾ ਵਾਸੀ ਗੁਰਜੰਟ ਸਿੰਘ ਅਤੇ ਇਸੇ ਪਿੰਡ ਦੀ ਰਹਿਣ ਵਾਲੀ ਕੁੜੀ ਜੋਤੀ ਕੌਰ ਨਾਲ ਕਾਫੀ ਲੰਮੇ ਸਮੇਂ ਤੋਂ ਦੋਸਤੀ ਸੀ।
Murder
ਕਰੀਬ ਦੋ ਮਹੀਨੇ ਪਹਿਲਾਂ ਗੁਰਜੰਟ ਤੇ ਜੋਤੀ ਨੇ ਵਿਆਹ ਕਰਵਾਉਣ ਦਾ ਫ਼ੈਸਲਾ ਕਰਦਿਆਂ ਖਰੜ ਦੇ ਇਕ ਗੁਰਦੁਆਰਾ ਸਾਹਿਬ ਵਿਚ ਪਰਵਾਰ ਦੀ ਮਰਜ਼ੀ ਬਿਨਾਂ ਵਿਆਹ ਕਰਵਾ ਲਿਆ। ਕਰੀਬ 20 ਦਿਨ ਤਕ ਗੁਰਜੰਟ ਅਤੇ ਜੋਤੀ ਘਰੋਂ ਬਾਹਰ ਇਕੱਠੇ ਰਹਿੰਦੇ ਰਹੇ ਜਿਸ ਦਾ ਪਰਵਾਰਾਂ ਨੂੰ ਪਤਾ ਲੱਗਣ 'ਤੇ ਦੋਹਾਂ ਨੂੰ ਵਾਪਸ ਘਰ ਬੁਲਾਇਆ ਗਿਆ। ਬੀਤੇ ਮਹੀਨੇ ਦੋਵਾਂ ਪਰਵਾਰਾਂ ਦੇ ਮੋਹਤਬਰਾਂ ਦੀ ਹਾਜ਼ਰੀ ਵਿਚ ਗੁਰਜੰਟ ਅਤੇ ਜੋਤੀ ਦਾ ਤਲਾਕ ਵੀ ਕਰਵਾ ਦਿੱਤਾ ਗਿਆ। ਗੁਰਜੰਟ ਸਿੰਘ ਮੁਤਾਬਿਕ 14 ਜੁਲਾਈ ਦੀ ਰਾਤ ਉਹ ਜੋਤੀ ਦੇ ਘਰ ਦੇ ਬਾਹਰ ਗਿਆ ਸੀ। ਘਰ ਅੰਦਰੋਂ ਜੋਤੀ ਦੀਆਂ ਚੀਕਾਂ ਸੁਣ ਕੇ ਉਸ ਨੇ ਅੰਦਰ ਦੇਖਣ ਦੀ ਕੋਸ਼ਿਸ਼ ਕੀਤੀ।
Murder
ਗੁਰਜੰਟ ਅਨੁਸਾਰ ਉਸ ਨੇ ਦਰਵਾਜ਼ੇ ਦੀਆਂ ਵਿਰਲਾਂ ਤੋਂ ਦੇਖਿਆ ਕਿ ਜੋਤੀ ਦੇ ਪਿਤਾ ਮਨਜੀਤ ਸਿੰਘ ਅਤੇ ਰਾਜਿੰਦਰ ਸਿੰਘ ਵੱਲੋਂ ਉਸ ਦੀ ਕੁੱਟਮਾਰ ਕੀਤੀ ਗਈ ਅਤੇ ਗਲ਼ਾ ਘੁੱਟ ਕੇ ਮਾਰ ਦਿੱਤਾ ਗਿਆ। ਇਸ ਤੋਂ ਬਾਅਦ ਜੋਤੀ ਦੀ ਲਾਸ਼ ਦੇਰ-ਰਾਤ ਪਿੰਡ ਦੀਆਂ ਮੜ੍ਹੀਆਂ ਵਿਚ ਜਾ ਕੇ ਲੱਕੜਾਂ 'ਤੇ ਤੇਲ ਪਾ ਕੇ ਸਾੜ ਦਿੱਤੀ ਗਈ। ਗੁਰਜੰਟ ਸਿੰਘ ਨੇ ਇਸ ਬਾਰੇ ਸੋਮਵਾਰ ਨੂੰ ਪੁਲਿਸ ਨੂੰ ਸੂਚਨਾ ਦਿੱਤੀ ਜਿਸ ਦੇ ਆਧਾਰ 'ਤੇ ਪੁਲਿਸ ਨੇ ਜੋਤੀ ਦੇ ਫੁੱਲ ਅਤੇ ਰਾਖ ਇਕੱਠੀ ਕਰ ਕੇ ਮਾਮਲੇ ਦੀ ਜਾਂਚ ਸ਼ੁਰੂ ਕੀਤੀ। ਪੁਲਿਸ ਨੇ ਦੱਸਿਆ ਕਿ ਲੜਕੀ ਦੇ ਭਰਾ ਤੇ ਪਿਤਾ 'ਤੇ ਮਾਮਲਾ ਦਰਜ ਕਰ ਲਿਆ ਹੈ।
