ਰੋਜ਼ਾਨਾ ਹੁੰਦੇ ਟੈਸਟਾਂ ਦੀ ਗਿਣਤੀ ਵਧਾਉਣ ਦੀ ਕਵਾਇਤ ਸ਼ੁਰੂ
ਚੰਡੀਗੜ੍ਹ : ਕਰੋਨਾ ਦੇ ਵਧਦੇ ਮਾਮਲਿਆਂ ਦਰਮਿਆਨ ਪੀਜੀਆਈ ਨੇ ਕਰੋਨਾ ਟੈਸਟਿੰਗ ਨੂੰ ਲੈ ਕੇ ਵੱਡਾ ਫ਼ੈਸਲਾ ਕੀਤਾ ਹੈ। ਪੀਜੀਆਈ 'ਚ ਹੁਣ ਕਰੋਨਾ ਟੈਸਟਾਂ ਲਈ ਮਹੀਨੇ ਦੇ ਸਾਢੇ 8 ਕਰੋੜ ਰੁਪਏ ਦੇ ਬਜਟ ਨੂੰ ਮਨਜ਼ੂਰੀ ਦਿਤੀ ਗਈ ਹੈ। ਇਸੇ ਤਰ੍ਹਾਂ ਕੋਰੋਨਾ ਟੈਸਟਾਂ ਲਈ ਲੋੜੀਂਦੀਆਂ ਕਿੱਟਾਂ ਖ਼ਰੀਦਣ ਦਾ ਫ਼ੈਸਲਾ ਕੀਤਾ ਗਿਆ ਹੈ।
ਗੁਆਢੀ ਸੂਬਿਆਂ ਦੀ ਪੀਜੀਆਈ 'ਤੇ ਨਿਰਭਰਤਾ ਨੂੰ ਵੇਖਦਿਆਂ ਬੀਤੇ ਮਹੀਨੇ ਕੇਂਦਰੀ ਸਿਹਤ ਮੰਤਰਾਲੇ ਨੇ ਵੀ ਪੀਜੀਆਈ ਨੂੰ ਕਿੱਟਾਂ ਸਮੇਤ ਹੋਰ ਉਤਪਾਦ ਖੁਦ ਦੇ ਬਜਟ 'ਚੋਂ ਖ਼ਰੀਦਣ ਲਈ ਕਿਹਾ ਸੀ। ਗੁਆਢੀ ਰਾਜਾਂ ਦੇ ਕਰੋਨਾ ਟੈਸਟਾਂ 'ਚ ਦੇਰੀ 'ਤੇ ਸਵਾਲ ਉਠਾਉਂਦਿਆਂ ਮੰਤਰਾਲੇ ਨੇ ਪੀਜੀਆਈ ਨੂੰ ਪੰਜਾਬ, ਹਰਿਆਣਾ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਕਰੋਨਾ ਸੈਪਲਿੰਗ ਦੀ ਉਸ ਸਿਰ ਜ਼ਿੰਮੇਵਾਰੀ ਵੀ ਯਾਦ ਕਰਵਾਈ ਸੀ।
ਸੂਤਰਾਂ ਮੁਤਾਬਕ ਪੀਜੀਆਈ ਨੇ ਹੁਣ ਕੋਰੋਨਾ ਟੈਸਟਿੰਗ ਲਈ ਮਹੀਨੇ ਦੀਆਂ 50 ਹਜ਼ਾਰ ਕਿੱਟਾਂ ਖੁਦ ਖਰੀਦਣ ਦਾ ਫ਼ੈਸਲਾ ਕੀਤਾ ਹੈ। ਚੰਡੀਗੜ੍ਹ 'ਚ ਹੁਣ ਤਕ 21,563 ਟੈਸਟ ਕੀਤੇ ਜਾ ਚੁੱਕੇ ਹਨ। ਜਦਕਿ ਪੀਜੀਆਈ 'ਚ ਹੁਣ ਤਕ 52000 ਤੋਂ ਵਧੇਰੇ ਕਰੋਨਾ ਟੈਸਟ ਹੋ ਚੁੱਕੇ ਹਨ।
ਇਨ੍ਹਾਂ 'ਚ ਅੱਧੇ ਤੋਂ ਵੱਧ ਟੈਸਟ ਪੰਜਾਬ 'ਚੋਂ ਆਏ ਸੈਪਲਾਂ ਦੇ ਕੀਤੇ ਗਏ ਹਨ ਜਦਕਿ ਬਾਕੀ 'ਚ ਹਰਿਆਣਾ, ਹਿਮਾਚਲ ਪ੍ਰਦੇਸ਼ ਅਤੇ ਉਤਰਾਂਖੰਡ ਆਦਿ ਤੋਂ ਆਏ ਸੈਂਪਲ ਸ਼ਾਮਲ ਹਨ। ਚੰਡੀਗੜ੍ਹ 'ਚ ਇਸ ਵਕਤ ਆਰ.ਟੀ.ਪੀ.ਸੀ.ਆਰ. ਦੇ ਨਾਲ ਨਾਲ ਜੀਨ ਐਕਸਪਰਟ ਅਤੇ ਐਂਟੀਜਨ ਟੈਸਟ ਵੀ ਕੀਤੇ ਜਾ ਰਹੇ ਹਨ।
ਪੀਜੀਆਈ 'ਚ ਇਕ ਦਿਨ ਦੇ 2000 ਹਜ਼ਾਰ ਟੈਸਟ ਕਰਨ ਦਾ ਟੀਚਾ ਮਿਥਿਆ ਗਿਆ ਹੈ। ਐਚ.ਓ.ਡੀ.,ਪੈਰਾਸਾਈਟੀਲੋਜੀ ਵਿਭਾਗ ਦੇ ਪ੍ਰੋ. ਰਾਕੇਸ਼ ਸਹਿਗਲ ਮੁਤਾਬਕ ਕਰੋਨਾ ਟੈਸਟਿੰਗ ਵਧਾਉਣ ਲਈ ਪੈਰਾਸਾਈਟੀਲੋਜੀ ਅਤੇ ਮੈਡੀਕਲ ਮਾਈਕ੍ਰੋਬਾਇਓਲੋਜੀ ਵਿਭਾਗ ਦੀਆਂ ਲੇਬਾਰਟੀਆਂ ਸੈਪਲਿੰਗ, ਟੈਸਟਿੰਗ ਅਤੇ ਰਿਪੋਰਟਿੰਗ ਦਾ ਕੰਮ ਤੇਜ਼ੀ ਨਾਲ ਕਰ ਰਹੀਆਂ ਹਨ। ਇੱਥੇ ਇਕ ਦਿਨ ਦੇ 400 ਦੇ ਕਰੀਬ ਟੈਸਟ ਹੋ ਰਹੇ ਹਨ। ਜੀਨ ਐਕਸਪਰਟ ਮਸ਼ੀਨ ਲਈ ਇਕ ਹਜ਼ਾਰ ਕਾਰਟੇਜ ਖ਼ਰੀਦਣ ਦੀ ਤਿਆਰੀ ਹੈ। ਪੀਜੀਆਈ 'ਚ ਫ਼ਿਲਹਾਲ ਦਿਨ 'ਚ 1200 ਦੇ ਕਰੀਬ ਟੈਸਟ ਹੋ ਰਹੇ ਹਨ ਜੋ ਛੇਤੀ ਹੀ 2000 ਤਕ ਪਹੁੰਚ ਜਾਣ ਦੀ ਉਮੀਦ ਹੈ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ।