ਮੈਂ ਲਗਾਤਾਰ ਕਹਿ ਰਿਹਾ ਸੀ ਕਿ ਬਾਕੀ 39 ਮਾਰੇ ਜਾ ਚੁੱਕੇ ਹਨ - ਹਰਜੀਤ ਮਸੀਹ
ਇਰਾਕ 'ਚ 2014 'ਚ ਅਗਵਾ ਹੋਏ 39 ਭਾਰਤੀ ਲੋਕਾਂ ਦੀ ਮੌਤ ਹੋ ਚੁਕੀ ਹੈ। ਇਸ ਦੀ ਪੁਸ਼ਟੀ ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਨੇ ਮੰਗਲਵਾਰ ਨੂੰ ਰਾਜ ਸਭਾ 'ਚ ਕੀਤੀ। ਉਨ੍ਹਾਂ ਨੇ ਦੱਸਿਆ ਕਿ 38 ਲੋਕਾਂ ਦਾ ਡੀ.ਐੱਨ.ਏ. ਮੈਚ ਹੋ ਗਿਆ ਹੈ, ਜਦੋਂ ਕਿ 39ਵੇਂ ਦਾ ਡੀ.ਐੱਨ.ਏ. 70 ਫੀਸਦੀ ਤੱਕ ਮੈਚ ਹੋ ਗਿਆ। ਲਾਸ਼ਾਂ ਦੇ ਢੇਰ 'ਚੋਂ ਭਾਰਤੀਆਂ ਦੀ ਲਾਸ਼ਾਂ ਨੂੰ ਲੱਭਿਆ ਗਿਆ, ਜਿਸ ਤੋਂ ਬਾਅਦ ਉਨ੍ਹਾਂ ਦੇ ਮਾਰੇ ਜਾਣ ਦਾ ਪਤਾ ਲੱਗਾ। ਵਿਦੇਸ਼ ਮੰਤਰੀ ਨੇ ਦੱਸਿਆ ਕਿ ਇਨ੍ਹਾਂ 39 ਭਾਰਤੀਆਂ ਦੀਆਂ ਲਾਸ਼ਾਂ ਨੂੰ ਅੰਮ੍ਰਿਤਸਰ ਏਅਰਪੋਰਟ ਲਿਆਂਦਾ ਜਾਵੇਗਾ। ਵਿਦੇਸ਼ ਮੰਤਰੀ ਨੇ ਦੱਸਿਆ ਕਿ ਇਨ੍ਹਾਂ 'ਚੋਂ 31 ਪੰਜਾਬ ਦੇ ਅਤੇ ਚਾਰ ਹਿਮਾਚਲ ਪ੍ਰਦੇਸ਼ ਦੇ ਹਨ। ਵਿਦੇਸ਼ ਮੰਤਰੀ ਨੇ ਮ੍ਰਿਤਕਾਂ ਨੂੰ ਸ਼ਰਧਾਂਜਲੀ ਦਿੱਤੀ ਅਤੇ ਉਨ੍ਹਾਂ ਦੇ ਪਰਿਵਾਰ ਦੇ ਲੋਕਾਂ ਦੇ ਪ੍ਰਤੀ ਹਮਦਰਦੀ ਜ਼ਾਹਰ ਕੀਤੀ।
ਜ਼ਿਕਰਯੋਗ ਹੈ ਕਿ ਆਈ.ਐੱਸ.ਆਈ.ਐੱਸ. ਦੇ ਚੰਗੁਲ ਤੋਂ ਬਚ ਕੇ ਭਾਰਤ ਆਏ ਗੁਰਦਾਸਪੁਰ ਦੇ ਹਰਜੀਤ ਨੇ ਪਹਿਲਾਂ ਹੀ ਦਾਅਵਾ ਕਰ ਦਿੱਤਾ ਸੀ ਕਿ ਅੱਤਵਾਦੀਆਂ ਨੇ ਉਸ ਦੇ ਸਾਹਮਣੇ ਹੀ ਸਾਰੇ ਲੋਕਾਂ ਨੂੰ ਮਾਰ ਦਿੱਤਾ ਸੀ ਪਰ ਉਸ ਦੀ ਗੱਲ 'ਤੇ ਕਿਸੇ ਨੇ ਯਕੀਨ ਨਹੀਂ ਕੀਤਾ। ਹਰਜੀਤ ਦਾ ਵਾਰ-ਵਾਰ ਕਹਿਣਾ ਸੀ ਕਿ ਬਗਦਾਦੀ ਦੇ ਅੱਤਵਾਦੀਆਂ ਨੇ 39 ਭਾਰਤੀਆਂ ਨੂੰ ਉਸ ਦੇ ਸਾਹਮਣੇ ਹੀ ਮਾਰ ਦਿੱਤਾ। ਉਨ੍ਹਾਂ ਨੇ ਦੱਸਿਆ ਕਿ ਪਹਿਲਾਂ ਅਗਵਾ ਕੀਤਾ, 2 ਦਿਨ ਨਾਲ ਰੱਖਿਆ ਅਤੇ ਫਿਰ ਮਾਰ ਦਿੱਤਾ। ਦਰਅਸਲ ਮੋਸੁਲ ਤੋਂ ਅੱਤਵਾਦੀਆਂ ਨੇ 80 ਲੋਕਾਂ ਨੂੰ ਅਗਵਾ ਕੀਤਾ ਸੀ। ਇਨ੍ਹਾਂ 'ਚੋਂ 40 ਭਾਰਤ ਦੇ ਸਨ ਅਤੇ 40 ਬੰਗਲਾਦੇਸ਼ੀ। ਸਾਰਿਆਂ ਨੂੰ ਬਗਦਾਦੀ ਦੇ ਅੱਤਵਾਦੀ ਬਦੂਸ਼ ਲੈ ਕੇ ਗਏ। ਹਰਜੀਤ ਵੀ ਉਨ੍ਹਾਂ 40 'ਚੋਂ ਇਕ ਹੈ। ਹਰਜੀਤ ਨੇ ਦੱਸਿਆ ਕਿ ਅੱਤਵਾਦੀਆਂ ਨੇ ਉਸ ਨੂੰ ਵੀ ਗੋਲੀ ਮਾਰੀ ਸੀ ਪਰ ਉਹ ਬਚ ਗਿਆ। ਇਸ ਤੋਂ ਬਾਅਦ ਉਨ੍ਹਾਂ ਨੇ ਖੁਦ ਨੂੰ ਬੰਗਲਾਦੇਸ਼ੀ ਦੱਸਿਆ ਅਤੇ ਉੱਥੋਂ ਦੌੜ ਗਿਆ। ਮੋਸੁਲ ਤੋਂ ਦੌੜ ਕੇ ਹਰਜੀਤ ਹਿੰਦੁਸਤਾਨ ਪੁੱਜਿਆ।
ਹਰਜੀਤ ਮਸੀਹ ਨੇ ਕਿਹਾ ਕਿ ਉਹ ਪਿਛਲੇ ਤਿੰਨ ਸਾਲਾਂ ਤੋਂ ਕਹਿ ਰਹੇ ਸਨ ਕਿ ਇਰਾਕ ਵਿਚ ਫਸੇ 39 ਭਾਰਤੀ ਮਾਰੇ ਗਏ ਹਨ। ਹਰਜੀਤ ਮਸੀਹ ਗੁਰਦਾਸਪੁਰ ਦੇ ਕਾਲਾ ਅਫ਼ਗ਼ਾਨਾਂ ਦਾ ਰਹਿਣ ਵਾਲਾ ਹੈ। ਮਸੀਹ ਉਨ੍ਹਾਂ 40 ਭਾਰਤੀਆਂ ਵਿਚੋਂ ਸੀ ਜਿਨ੍ਹਾਂ ਨੂੰ ਆਈ.ਐਸ.ਆਈ.ਐਸ. ਨੇ ਅਗਵਾ ਕਰ ਲਿਆ ਸੀ। ਉਸ ਦਾ ਕਹਿਣਾ ਹੈ ਕਿ 39 ਭਾਰਤੀਆਂ ਨੂੰ ਉਸ ਦੀਆਂ ਅੱਖਾਂ ਸਾਹਮਣੇ ਮਾਰਿਆ ਗਿਆ ਪਰ ਸਰਕਾਰ ਨੇ ਉਸ ਦੀ ਗੱਲ 'ਤੇ ਵਿਸ਼ਵਾਸ ਨਹੀਂ ਕੀਤਾ ਸੀ।