10ਵੀਂ ਦੀ ਪ੍ਰੀਖਿਆ ਦੇ ਕੇ ਪਰਤਣ ਸਮੇਂ ਟਿੱਪਰ ਨੇ ਕੁਚਲਿਆ
Punjab News: ਲਾਲੜੂ ਵਿਖੇ ਅੰਬਾਲਾ-ਚੰਡੀਗੜ੍ਹ ਕੌਮੀ ਮਾਰਗ ’ਤੇ ਆਈਟੀਆਈ ਚੌਕ ਨੇੜੇ ਮਿੱਟੀ ਨਾਲ ਭਰੇ ਟਿੱਪਰ ਹੇਠ ਆਉਣ ਕਾਰਨ ਸਕੂਲੀ ਵਿਦਿਆਰਥਣ ਦੀ ਇਕ ਹਫਤੇ ਬਾਅਦ ਪੀਜੀਆਈ ਚੰਡੀਗੜ੍ਹ ਵਿਚ ਮੌਤ ਹੋ ਗਈ। ਇਲਾਜ ਦੌਰਾਨ ਡਾਕਟਰਾਂ ਨੂੰ ਉਸ ਦੀਆਂ ਦੋਵੇਂ ਲੱਤਾਂ ਕੱਟਣੀਆਂ ਪਈਆਂ ਪਰ ਇਸ ਦੇ ਬਾਵਜੂਦ 17 ਸਾਲਾ ਵਿਦਿਆਰਥਣ ਭਾਵਨਾ ਦੀ ਮੌਤ ਹੋ ਗਈ। ਪੋਸਟਮਾਰਟਮ ਤੋਂ ਬਾਅਦ ਅੱਜ ਉਸ ਦੀ ਲਾਸ਼ ਪਰਵਾਰਕ ਮੈਂਬਰਾਂ ਨੂੰ ਸੌਂਪ ਦਿਤੀ ਜਾਵੇਗੀ।
ਭਾਵਨਾ ਦੇ ਪਿਤਾ ਨਵੀਨ ਨੇ ਦਸਿਆ ਕਿ ਭਾਵਨਾ ਨੂੰ ਉਸ ਦੀਆਂ ਲੱਟਾਂ ਕੱਟੇ ਜਾਣ ਬਾਰੇ ਵੀ ਪਤਾ ਨਹੀਂ ਸੀ। ਪਰਵਾਰ ਇਸ ਗੱਲ ਨੂੰ ਲੈ ਕੇ ਚਿੰਤਤ ਸੀ ਕਿ ਕੀ ਭਾਵਨਾ ਇਸ ਸਦਮੇ ਨੂੰ ਸਹਿ ਸਕੇਗੀ ਕਿ ਉਸ ਦੀਆਂ ਦੋਵੇਂ ਲੱਤਾਂ ਗੋਡਿਆਂ ਤੋਂ ਉੱਪਰ ਸਰੀਰ ਤੋਂ ਵੱਖ ਹੋ ਗਈਆਂ ਹਨ। ਇਸ ਤੋਂ ਪਹਿਲਾਂ ਹੀ ਮੰਗਲਵਾਰ ਦੁਪਹਿਰ ਨੂੰ ਉਸ ਦੀ ਮੌਤ ਹੋ ਗਈ।
ਸਰਕਾਰੀ ਕੰਨਿਆ ਸੀਨੀਅਰ ਸੈਕੰਡਰੀ ਸਕੂਲ ਲਾਲੜੂ ਦੇ ਪ੍ਰਿੰਸੀਪਲ ਸਮੇਤ ਸਮੁੱਚੇ ਸਟਾਫ ਨੇ ਭਾਵਨਾ ਦੀ ਮੌਤ ‘ਤੇ ਡੂੰਘੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਹੈ। ਪ੍ਰਿੰਸੀਪਲ ਦਵਿੰਦਰ ਕੌਰ ਨੇ ਕਿਹਾ ਕਿ ਭਾਵਨਾ ਪੜ੍ਹਾਈ ਵਿਚ ਬਹੁਤ ਹੋਣਹਾਰ ਸੀ ਅਤੇ ਸਮੁੱਚਾ ਸਟਾਫ ਉਸ ਦੀ ਚੰਗੀ ਸਿਹਤ ਲਈ ਅਰਦਾਸਾਂ ਕਰਦਾ ਰਿਹਾ ਸੀ ਪਰ ਭਾਵਨਾ ਨੂੰ ਬਚਾਇਆ ਨਹੀਂ ਗਿਆ ਜਾ ਸਕਿਆ।
ਜਾਂਚ ਅਧਿਕਾਰੀ ਏਐਸਆਈ ਜਸਵਿੰਦਰ ਸਿੰਘ ਨੇ ਦਸਿਆ ਕਿ ਪੁਲਿਸ ਨੂੰ ਭਾਵਨਾ ਦੀ ਮੌਤ ਬਾਰੇ ਸਾਮ ਕਰੀਬ 4 ਵਜੇ ਪਤਾ ਲੱਗਿਆ ਜਦਕਿ ਉਸ ਦੀ ਮੌਤ ਕਰੀਬ 3 ਵਜੇ ਹੋਈ ਸੀ। ਉਨ੍ਹਾਂ ਦਸਿਆ ਕਿ ਹਾਦਸੇ ਵਿਚ ਸ਼ਾਮਲ ਟਿੱਪਰ ਅਤੇ ਉਸ ਦੇ ਡਰਾਈਵਰ ਨੂੰ ਪੁਲਿਸ ਨੇ ਕਾਬੂ ਕਰ ਲਿਆ ਸੀ, ਹਾਲਾਂਕਿ ਬਾਅਦ ਵਿਚ ਉਸ ਨੂੰ ਜ਼ਮਾਨਤ ਮਿਲ ਗਈ। ਹੁਣ ਡਰਾਈਵਰ ਵਿਰੁਧ ਆਈਪੀਸੀ 304 ਏ ਦੀ ਧਾਰਾ ਵੀ ਜੋੜ ਦਿਤੀ ਗਈ ਹੈ।
ਜ਼ਿਕਰਯੋਗ ਹੈ ਕਿ ਭਾਵਨਾ 12 ਫਰਵਰੀ ਨੂੰ 10ਵੀਂ ਜਮਾਤ ਦੀ ਬੋਰਡ ਪ੍ਰੀਖਿਆ ਦਾ ਪਹਿਲਾ ਪੇਪਰ ਦੇਣ ਤੋਂ ਬਾਅਦ ਅਪਣੀ ਮਾਂ ਨਾਲ ਘਰ ਪਰਤ ਰਹੀ ਸੀ । ਇਸ ਦੌਰਾਨ ਆਈਟੀਆਈ ਚੌਕ ਲਾਲੜੂ ਨੇੜੇ ਇਕ ਟਿੱਪਰ ਨੇ ਉਸ ਨੂੰ ਟੱਕਰ ਮਾਰ ਦਿਤੀ। ਹਾਦਸੇ ਦੌਰਾਨ ਭਾਵਨਾ ਦੀਆਂ ਦੋਵੇਂ ਲੱਤਾਂ ਟਿੱਪਰ ਦੇ ਟਾਇਰਾਂ ਹੇਠ ਬੁਰੀ ਤਰ੍ਹਾਂ ਕੁਚਲੀਆਂ ਗਈਆਂ। ਭਾਵਨਾ ਦੇ ਪਿਤਾ ਨਵੀਨ ਦਿਹਾੜੀਦਾਰ ਹਨ।
ਤਾਜ਼ਾ ਅਪਡੇਟਸ ਲਈ ਸਾਡੇ Whatsapp Broadcast Channel ਨਾਲ ਜੁੜੋ।
