ਪਤੀ-ਪਤਨੀ ਵਿਚਕਾਰ ਕਾਫ਼ੀ ਸਮੇਂ ਤੋਂ ਚੱਲ ਰਿਹਾ ਸੀ ਝਗੜਾ
ਬਠਿੰਡਾ : ਸਥਾਨਕ ਸ਼ਹਿਰ ਦੀ ਅਗਰਵਾਲ ਕਾਲੋਨੀ 'ਚ ਰਹਿੰਦੇ ਪਤੀ-ਪਤਨੀ ਵਿਚਕਾਰ ਹੋਈ ਲੜਾਈ 'ਚ ਡਾਕਟਰ ਪਤੀ ਵਲੋਂ ਪਤਨੀ ਦਾ ਨੱਕ ਵੱਢਣ ਦੀ ਘਟਨਾ ਸਾਹਮਣੇ ਆਈ ਹੈ। ਗੰਭੀਰ ਰੂਪ 'ਚ ਜ਼ਖ਼ਮੀ ਹੋਈ ਪਤਨੀ ਨੂੰ ਪਤੀ ਸਥਾਨਕ ਮਾਡਲ ਟਾਊਨ 'ਚ ਸਥਿਤ ਥਾਣਾ ਸਿਵਲ ਲਾਈਨ ਦੇ ਨਜ਼ਦੀਕੀ ਦਾਦੀ ਪੋਤੀ ਪਾਰਕ ਕੋਲ ਸੁੱਟ ਕੇ ਫ਼ਰਾਰ ਹੋ ਗਿਆ। ਜਿਸ ਤੋਂ ਬਾਅਦ ਪੁਲਿਸ ਨੇ ਪੀੜਤ ਔਰਤ ਨੂੰ ਸਿਵਲ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ। ਡਾਕਟਰਾਂ ਨੇ ਉਸ ਦੀ ਹਾਲਤ ਸਥਿਰ ਦੱਸੀ ਹੈ।
ਦੂਜੇ ਪਾਸੇ ਪੁਲਿਸ ਨੇ ਔਰਤ ਸ਼ੀਤਲ ਮਿੱਤਲ ਦੇ ਬਿਆਨਾਂ ਉਪਰ ਅਗਲੇਰੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ। ਸਿਵਲ ਹਪਸਤਾਲ ਵਿਚ ਦਾਖ਼ਲ ਔਰਤ ਸ਼ੀਤਲ ਮਿੱਤਲ ਨੇ ਦਸਿਆ ਕਿ ਉਸ ਦਾ ਘਰ ਵਾਲਾ ਕਥਿਤ ਤੌਰ 'ਤੇ ਨਸ਼ਿਆਂ ਦਾ ਆਦੀ ਹੈ ਤੇ ਉਹ ਉਸ ਨੂੰ ਰੋਕਦੀ ਹੈ, ਜਿਸ ਕਾਰਨ ਕਲੇਸ਼ ਰਹਿੰਦਾ ਹੈ। ਘਰੇਲੂ ਕਲੇਸ਼ ਦੇ ਚਲਦੇ ਹੀ ਉਹ ਅਗਰਵਾਲ ਕਾਲੋਨੀ 'ਚ ਇਕ ਕਿਰਾਏ ਦੇ ਮਕਾਨ ਵਿਚ ਰਹਿੰਦੇ ਹਨ। ਇਹ ਵੀ ਪਤਾ ਚਲਿਆ ਹੈ ਕਿ ਉਕਤ ਔਰਤ ਦਾ ਘਰਵਾਲਾ ਅਮਨਦੀਪ ਸਿੰਘ ਡਾਕਟਰ ਹੈ ਤੇ ਉਸ ਦਾ ਇਹ ਤੀਜਾ ਵਿਆਹ ਹੈ ਜਦੋਂ ਕਿ ਸ਼ੀਤਲ ਦਾ ਉਸ ਨਾਲ ਇਹ ਦੂਜਾ ਵਿਆਹ ਹੈ।
ਪਤਾ ਲਗਿਆ ਹੈ ਕਿ ਘਰੇਲੂ ਕਲੇਸ਼ ਦੇ ਚਲਦਿਆਂ ਸੋਮਵਾਰ ਨੂੰ ਦੋਹਾਂ ਵਿਚਕਾਰ ਵਿਵਾਦ ਹੋਇਆ, ਜਿਸ ਤੋਂ ਬਾਅਦ ਅਮਨਦੀਪ ਸਿੰਘ ਨੇ ਉਸ ਦੇ ਦੰਦੀਆਂ ਵੱਢਣੀਆਂ ਸ਼ੁਰੂ ਕਰ ਦਿਤੀਆਂ। ਮਾਮਲੇ ਦੀ ਪੜਤਾਲ ਕਰ ਰਹੇ ਥਾਣੇਦਾਰ ਮੁਖ਼ਤਿਆਰ ਸਿੰਘ ਨੇ ਦਸਿਆ ਕਿ ਔਰਤ ਦਾ ਨੱਕ ਵੱਢਿਆ ਜਾ ਚੁੱਕਾ ਹੈ। ਉਨ੍ਹਾਂ ਦਸਿਆ ਕਿ ਉਸ ਦੇ ਬਿਆਨਾਂ ਦੇ ਆਧਾਰ 'ਤੇ ਅਗਲੇਰੀ ਕਾਰਵਾਈ ਕੀਤੀ ਜਾ ਰਹੀ ਹੈ।