ਅੰਮ੍ਰਿਤਸਰ (ਚਰਨਜੀਤ ਸਿੰਘ): ਸ੍ਰੀ ਦਰਬਾਰ ਸਾਹਿਬ ਦੇ ਸਰੋਵਰ ਨੂੰ ਜਲ ਦੀ ਸਪਲਾਈ ਦਿੰਦੀ ਹੰਸਲੀ ਦੀ ਹਾਲਤ ਬੇਹਦ ਤਰਸਯੋਗ ਹੈ। ਹੰਸਲੀ ਦਾ ਨਿਰਮਾਣ ਕਰੀਬ 100 ਸਾਲ ਪਹਿਲਾਂ ਉਦਾਸੀ ਸੰਤਾਂ ਨੇ ਕਰਵਾਇਆ ਸੀ ਤੇ ਸਮੇਂ ਸਮੇਂ 'ਤੇ ਇਸ ਹੰਸਲੀ ਦੀ ਮੁਰੰਮਤ ਕਰਵਾ ਕੇ ਇਸ ਨੂੰ ਜੀਵਨ ਦਾਨ ਦਿਤਾ ਜਾਂਦਾ ਰਿਹਾ।
ਅੱਜ ਇਹ ਹੰਸਲੀ ਸ਼ਹਿਰ ਦੇ ਅੰਦਰ ਦਾ ਇਕ ਹਿੱਸਾ ਬਣ ਚੁਕੀ ਹੈ, ਪਰ ਮਲਕੀਅਤ ਸ੍ਰੀ ਦਰਬਾਰ ਸਾਹਿਬ ਦੀ ਹੀ ਹੈ। ਸਮੇਂ-ਸਮੇਂ 'ਤੇ ਇਸ ਹੰਸਲੀ ਦੇ ਉਪਰੀ ਭਾਗ ਤੇ ਅੰਦਰ ਦੀ ਸਫ਼ਾਈ ਲਈ ਸ੍ਰੀ ਦਰਬਾਰ ਸਾਹਿਬ ਦੇ ਤਤਕਾਲੀ ਮੈਨੇਜਰ ਨਿਜੀ ਦਿਲਚਸਪੀ ਲੈ ਕੇ ਇਸ ਹੰਸਲੀ ਦੀ ਸਫ਼ਾਈ ਕਰਵਾਉਂਦੇ ਸਨ ਪਰ ਪਿਛਲੇ ਕਰੀਬ 5 ਸਾਲ ਤੋਂ ਇਹ ਰੁਝਾਨ ਵੀ ਬੰਦ ਹੋ ਗਿਆ ਹੈ।
Hansali
ਅੱਜ ਜਦ ਰੋਜ਼ਾਨਾ ਸਪੋਕਸਮੇਨ ਨੇ ਇਸ ਹੰਸਲੀ ਦਾ ਦੌਰਾ ਕੀਤਾ ਤਾਂ ਦੇਖ ਕੇ ਦੁਖ ਹੋਇਆ ਕਿ ਜਿਸ ਸਰੋਵਰ ਦੇ ਜਲ ਨੂੰ ਸਿੱਖ ਸ਼ਰਧਾ ਤੇ ਸਤਿਕਾਰ ਨਾਲ ਲੈ ਕੇ ਜਾਂਦੇ ਹਨ ਉਸ ਜਲ ਦੀ ਸਪਲਾਈ ਕਰਨ ਵਾਲੀ ਹੰਸਲੀ ਦੀ ਹਾਲਤ ਕੀ ਹੈ? ਹੰਸਲੀ ਦੇ ਆਲੇ ਦੁਆਲੇ ਬਣੀਆਂ ਇਮਾਰਤਾਂ ਦੇ ਮਾਲਕਾਂ ਨੇ ਗੰਦੇ ਪਾਣੀ ਦੇ ਨਿਕਾਸ ਲਈ ਲਗਾਈਆਂ ਪਾਈਪਾਂ ਹੰਸਲੀ ਵਲ ਸੁਟੀਆਂ ਹੋਈਆਂ ਹਨ ਤੇ ਹੰਸਲੀ ਤੇ ਸੁਟਿਆ ਕੂੜਾ ਕਰਕਟ ਦਸ ਰਿਹਾ ਸੀ ਕਿ ਹਾਲਾਤ ਕੀ ਹਨ। ਬਦਬੂ ਕਾਰਨ ਹੰਸਲੀ 'ਤੇ ਖੜੇ ਹੋ ਕੇ ਸਾਹ ਲੈਣਾ ਵੀ ਮੁਸ਼ਕਲ ਹੋ ਰਿਹਾ ਸੀ।
DARBAR SAHIB
ਇਲਾਕੇ ਦੇ ਵਸਨੀਕ ਭੋਲਾ ਨਾਥ ਨੇ ਦਸਿਆ ਕਿ ਇਸ ਹੰਸਲੀ ਤੇ ਪਈ ਗੰਦਗੀ ਬਾਰੇ ਅਸੀ ਇਲਾਕਾ ਨਿਵਾਸੀ ਕਈ ਵਾਰ ਜ਼ਿਲ੍ਹਾ ਪ੍ਰਸ਼ਾਸਨ ਅਤੇ ਸ੍ਰੀ ਦਰਬਾਰ ਸਾਹਿਬ ਦੇ ਪ੍ਰਬੰਧਕਾਂ ਨੂੰ ਕਹਿ ਚੁੱਕੇ ਹਾਂ ਪਰ ਕੋਈ ਸੁਣਵਾਈ ਨਹੀਂ ਹੋਈ। ਅਪਣਾ ਨਾਮ ਨਾ ਛਾਪੇ ਜਾਣ ਦੀ ਸ਼ਰਤ 'ਤੇ ਇਸ ਬਾਰੇ ਇਕ ਜਾਗਰੂਕ ਸਿੰਘ ਨੇ ਦਸਿਆ ਕਿ ਉਸ ਨੇ ਕਰੀਬ 1 ਹਫ਼ਤਾ ਪਹਿਲਾਂ ਸ੍ਰੀ ਦਰਬਾਰ ਸਾਹਿਬ ਦੇ ਮੌਜੂਦਾ ਮੈਨੇਜਰ ਨਾਲ ਫ਼ੋਨ 'ਤੇ ਗੱਲ ਕੀਤੀ ਤੇ ਹੰਸਲੀ 'ਤੇ ਪਈ ਗੰਦਗੀ ਦੀਆਂ ਤਸਵੀਰਾਂ ਵੀ ਸੋਸ਼ਲ ਮੀਡੀਆ ਰਾਹੀਂ ਮੈਨੇਜਰ ਸ੍ਰੀ ਦਰਬਾਰ ਸਾਹਿਬ ਵਲ ਭੇਜੀਆਂ ਪਰ ਮੈਨੇਜਰ ਸਾਹਿਬ ਨੇ ਬੀਤੇ ਦਿਨ ਦੋ ਸੇਵਾਦਾਰ ਸ਼ਾਮ ਨੂੰ ਭੇਜੇ ਜੋ ਸਿਰਫ਼ ਮੁਆਇਨਾ ਕਰ ਕੇ ਤੁਰਦੇ ਬਣੇ।
Punjabi News ਨਾਲ ਜੁੜੀ ਹੋਰ ਅਪਡੇਟ ਲਗਾਤਾਰ ਹਾਸਲ ਕਰਨ ਲਈ ਸਾਨੂੰ Facebook ਤੇ ਲਾਈਕ Twitter ਤੇ follow ਕਰੋ
