ਅਕਾਲੀ ਆਗੂ ਭਾਜਪਾ ਦੇ ਏਜੰਟ ਵਜੋਂ ਕਿਸਾਨਾਂ ਨੂੰ ਗੁਮਰਾਹ ਕਰਨ ਲਈ ਬਾਹਰ ਭੇਜੇ ਗਏ ਨੇ : ਜਾਖੜ
ਚੰਡੀਗੜ੍ਹ, 20 ਸਤੰਬਰ (ਨੀਲ): ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਸੁਨੀਲ ਜਾਖੜ ਨੇ ਆਖਿਆ ਹੈ ਕਿ ਸ਼੍ਰੋਮਣੀ ਅਕਾਲੀ ਦਲ ਜਿਸ ਨੇ ਅਪਣਾ ਰੂਪ ਬਦਲ ਕੇ ਸੁਖਬੀਰ ਅਕਾਲੀ ਦਲ ਕਰ ਲਿਆ ਹੈ, ਉਸ ਦੇ ਆਗੂ ਅਸਤੀਫ਼ੇ ਦਾ ਡਰਾਮਾ ਕਰ ਕੇ ਹੁਣ ਭਾਜਪਾ ਦੇ ਏਜੰਟ ਦੇ ਤੌਰ ’ਤੇ ਪੰਜਾਬ ਆਏ ਹਨ ਤਾਂ ਜੋ ਕਿਸਾਨਾਂ ਨੂੰ ਗੁਮਰਾਹ ਕਰ ਕੇ ਮੋਦੀ ਸਰਕਾਰ ਦੀਆਂ ਲੋਕ ਮਾਰੂ ਨੀਤੀਆਂ ਵਿਰੁਧ ਇਕਜੁਟ ਹੋਈਆਂ ਧਿਰਾਂ ਨੂੰ ਕਮਜ਼ੋੋਰ ਕੀਤਾ ਜਾ ਸਕੇ।
ਇਕ ਬਿਆਨ ਵਿਚ ਸੁਨੀਲ ਜਾਖੜ ਨੇ ਕਿਹਾ ਕਿ ਪਹਿਲਾਂ ਭਾਰਤੀ ਜਨਤਾ ਪਾਰਟੀ ਦੇ ਏਜੰਟ ਦੇ ਤੌਰ ’ਤੇ ਕੰਮ ਕਰਦਿਆਂ ਅਕਾਲੀ ਆਗੂਆਂ ਨੇ ਕੋਸ਼ਿਸ ਕੀਤੀ ਕਿ ਕਿਸਾਨਾਂ ਨੂੰ ਇਨ੍ਹਾਂ ਕਾਲੇ ਖੇਤੀ ਕਾਨੂੰਨਾਂ ਸਬੰਧੀ ਭਰਮਿਤ ਕੀਤਾ ਜਾਵੇ। ਇਸ ਲਈ ਉਨ੍ਹਾਂ ਪਿਛਲੇ ਤਿੰਨ ਮਹੀਨੇ ਤੋਂ ਮੁਹਿੰਮ ਚਲਾਈ ਹੋਈ ਸੀ ਅਤੇ ਖੇਤੀ ਮੰਤਰੀ ਦੀ ਚਿੱਠੀ ਲਿਆਉਣ ਸਮੇਤ ਹਰ ਇਕ ਮੰਚ ਤੇ ਉਹ ਇਨ੍ਹਾਂ ਕਾਲੇ ਕਾਨੂੰਨਾਂ ਦੀ ਹਮਾਇਤ ਕਰਦਿਆਂ ਇਨ੍ਹਾਂ ਨੂੰ ਕਿਸਾਨਾਂ ਦੇ ਹਿਤ ਵਿਚ ਦਸਦੇ ਰਹੇ ਸਨ। ਸੂਬਾ ਕਾਂਗਰਸ ਪ੍ਰਧਾਨ ਨੇ ਕਿਹਾ,‘‘ਫਿਰ ਵੀ ਜਦ ਪੰਜਾਬ ਦਾ ਸਮਝਦਾਰ ਕਿਸਾਨ ਉਨ੍ਹਾਂ ਦੀਆਂ ਭਰਮਾਊ ਗੱਲਾਂ ਵਿਚ ਨਹੀਂ ਆਇਆ ਅਤੇ ਉਨ੍ਹਾਂ ਨੂੰ ਇਸ ਤਰ੍ਹਾਂ ਸਫ਼ਲਤਾ ਨਹੀਂ ਮਿਲੀ ਤਾਂ ਹੁਣ ਤਿਆਗ ਪੱਤਰ ਦਾ ਬਹਾਨਾ ਕਰ ਕੇ ਇਕ ਵਾਰ ਫਿਰ ਕਿਸਾਨ ਏਕਤਾ ਨੂੰ ਭੰਗ ਕਰਨ ਦੇ ਮਾੜੇ ਇਰਾਦੇ ਨਾਲ ਇਹ ਦਿੱਲੀ ਤੋਂ ਪੰਜਾਬ ਆਏ ਹਨ।’’
ਜਾਖੜ ਨੇ ਕਿਹਾ ਕਿ ਹੁਣ ਜਦ ਪੰਜਾਬ ਦੀਆਂ ਅਕਾਲੀ ਦਲ ਤੇ ਬੀਜੇਪੀ ਨੂੰ ਛੱਡ ਕੇ ਸਾਰੀਆਂ ਸਿਆਸੀ ਪਾਰਟੀਆਂ, ਸਾਰੇ ਕਿਸਾਨ ਸੰਗਠਨਾਂ ਸਮੇਤ ਸਮਾਜ ਦਾ ਹਰ ਇਕ ਵਰਗ ਇਨ੍ਹਾਂ ਕਾਲੇ ਕਾਨੂੰਨਾਂ ਵਿਰੁਧ ਇਕਜੁਟ ਹੋ ਗਿਆ ਤਾਂ ਫਿਰ ਭਾਜਪਾ ਦੇ ਇਹ ਏਜੰਟ ਕਿਸਾਨ ਅੰਦੋਲਨ ਨੂੰ ਤਾਰਪੀਡੋ ਕਰਨ ਦੇ ਇਰਾਦੇ ਨਾਲ ਪੰਜਾਬ ਆਏ ਹਨ।