ਜਾਣਕਾਰੀ ਮੁਤਾਬਕ ਟਕਸਾਲੀ ਅਕਾਲੀ ਦਲ ਦੇ ਦੋ ਥੰਮ ਜਿਨ੍ਹਾਂ ਪਾਰਟੀ ਬਣਾਉਣ ਸਮੇਂ ਬਹੁਤ ਮਿਹਨਤ ਕੀਤੀ ਸੀ, ਵਾਪਸ ਮਾਂ ਪਾਰਟੀ ਨਾਲ ਨੇੜਤਾ ਵਧਾ ਰਹੇ ਹਨ
ਅੰਮ੍ਰਿਤਸਰ(ਚਰਨਜੀਤ ਸਿੰਘ): ਭਰੋਸੇਯੋਗ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਬਾਦਲ ਦਲ ਦਾ ਬਦਲ ਬਣਨ ਜਾ ਰਹੇ ਅਕਾਲੀ ਦਲ ਟਕਸਾਲੀ ਵਿਚ ਕਦੇ ਵੀ ਟੁੱਟ-ਭੱਜ ਹੋ ਸਕਦੀ ਹੈ। ਟਕਸਾਲੀ ਅਕਾਲੀ ਦਲ ਦੇ ਦੋ ਵੱਡੇ ਥੰਮ ਬੜੀ ਜਲਦੀ ਹੀ ਵਾਪਸ ਅਪਣੀ ਮਾਂ ਪਾਰਟੀ ਅਕਾਲੀ ਦਲ ਬਾਦਲ ਵਿਚ ਜਾ ਸਕਦੇ ਹਨ। ਇਕ ਵੱਡੀ ਅੜਚਣ ਕਾਰਨ ਇਹ ਪ੍ਰਸਤਾਵਤ ਵਾਪਸੀ ਰੁਕੀ ਹੋਈ ਹੈ। ਇਸ ਅੜਚਣ ਦਾ ਹੱਲ ਲੱਭਣ ਦੀਆਂ ਕੋਸ਼ਿਸ਼ਾਂ ਜਾਰੀ ਹਨ।
ਜਾਣਕਾਰੀ ਮੁਤਾਬਕ ਟਕਸਾਲੀ ਅਕਾਲੀ ਦਲ ਦੇ ਦੋ ਥੰਮ ਜਿਨ੍ਹਾਂ ਪਾਰਟੀ ਬਣਾਉਣ ਸਮੇਂ ਬਹੁਤ ਮਿਹਨਤ ਕੀਤੀ ਸੀ, ਵਾਪਸ ਮਾਂ ਪਾਰਟੀ ਨਾਲ ਨੇੜਤਾ ਵਧਾ ਰਹੇ ਹਨ। ਪਾਰਟੀ ਨੂੰ ਪੰਜਾਬੀਆਂ ਵਲੋਂ ਜ਼ਿਆਦਾ ਸਮਰਥਨ ਨਹੀਂ ਮਿਲਿਆ ਜਿਸ ਕਾਰਨ ਪਾਰਟੀ ਦੇ ਆਗੂ ਘਰ ਵਾਪਸੀ ਕਰ ਸਕਦੇ ਹਨ। ਇਨ੍ਹਾਂ ਦੀ ਅਕਾਲੀ ਦਲ ਬਾਦਲ ਦੇ ਪ੍ਰਧਾਨ ਨਾਲ ਆਖ਼ਰੀ ਦੌਰ ਦੀ ਗੱਲਬਾਤ ਵੀ ਹੋ ਚੁੱਕੀ ਹੈ।
ਅਕਾਲੀ ਦਲ ਬਾਦਲ ਦੇ ਨੇੜਲੇ ਸੂਤਰ ਦਸਦੇ ਹਨ ਕਿ ਪਾਰਟੀ ਦੀ ਲੀਡਰਸ਼ਿਪ ਨੇ ਇਨ੍ਹਾਂ ਨੂੰ ਕਿਹਾ ਹੈ ਕਿ ਉਹ ਮਾਝੇ ਦੇ ਇਕ ਧੜਵੈਲ ਅਕਾਲੀ ਆਗੂ ਰਾਹੀਂ ਪਾਰਟੀ ਵਿਚ ਆ ਕੇ ਘਰ ਵਾਪਸੀ ਕਰ ਸਕਦੇ ਹਨ। ਪਰ ਇਨ੍ਹਾਂ ਦੋਵਾਂ ਥੰਮਾਂ ਨੇ ਪਾਰਟੀ ਲੀਡਰਸ਼ਿਪ ਕੋਲੋਂ ਮੰਗ ਕੀਤੀ ਹੈ ਕਿ ਉਨ੍ਹਾਂ ਦੀ ਘਰ ਵਾਪਸੀ ਲਈ ਸ. ਪ੍ਰਕਾਸ਼ ਸਿੰਘ ਬਾਦਲ ਜਾਂ ਸੁਖਬੀਰ ਸਿੰਘ ਬਾਦਲ ਉਨ੍ਹਾਂ ਦੇ ਘਰ ਆ ਕੇ ਉਨ੍ਹਾਂ ਨੂੰ ਲਿਜਾਣ, ਉਹ ਖ਼ੁਸ਼ੀ ਖ਼ੁਸ਼ੀ ਇਨ੍ਹਾਂ ਦੋਹਾਂ ਵਿਚੋਂ ਕਿਸੇ ਇਕ ਦੀ ਉਂਗਲ ਫੜ ਕੇ ਘਰ ਆਉਣ ਨੂੰ ਤਿਆਰ ਹਨ। ਮਾਝੇ ਦੇ ਧੜਵੈਲ ਅਕਾਲੀ ਆਗੂ ਰਾਹੀਂ ਕਿਸੇ ਵੀ ਕੀਮਤ 'ਤੇ ਉਹ ਪਾਰਟੀ ਵਿਚ ਸ਼ਾਮਲ ਨਹੀਂ ਹੋਣਗੇ।
ਟਕਸਾਲੀ ਆਗੂ ਨੇ ਪਾਰਟੀ ਲੀਡਰਸ਼ਿਪ ਨੂੰ ਕਿਹਾ ਹੈ ਕਿ ਇਸ ਧੜਵੈਲ ਅਕਾਲੀ ਆਗੂ ਕਾਰਨ ਹੀ ਉਨ੍ਹਾਂ ਪਾਰਟੀ ਛੱਡੀ ਸੀ ਤੇ ਹੁਣ ਉਸੇ ਆਗੂ ਦਾ ਹੱਥ ਫੜ ਕੇ ਵਾਪਸ ਆਉਣ ਅਜਿਹਾ ਸੰਭਵ ਹੀ ਨਹੀਂ ਹੈ। ਹੁਣ ਦੇਖਣਾ ਹੈ ਕਿ 'ਟਕਸਾਲੀ' ਅਕਾਲੀ ਵਜੋਂ ਜਾਣੇ ਜਾਂਦੇ ਇਨ੍ਹਾਂ ਆਗੂਆਂ ਦੀ ਘਰ ਵਾਪਸੀ ਲਈ ਸ. ਬਾਦਲ ਜਾਂ ਸੁਖਬੀਰ ਸਿੰਘ ਬਾਦਲ ਕੀ ਕਰਦੇ ਹਨ।