ਬਜਟ 'ਤੇ ਬਹਿਸ 'ਚ ਹਿੱਸਾ ਲੈਂਦਿਆਂ 'ਆਪ' ਵਿਧਾਇਕ ਪ੍ਰਿੰਸੀਪਲ ਬੁੱਧਰਾਮ ਨੇ ਕਿਹਾ ਕਿ ਬਜਟ ਪੇਸ਼ ਕਰਨ ਦੌਰਾਨ ਜੋ ਤਜਵੀਜ਼ਾਂ...
ਚੰਡੀਗੜ੍ਹ : ਬਜਟ 'ਤੇ ਬਹਿਸ 'ਚ ਹਿੱਸਾ ਲੈਂਦਿਆਂ 'ਆਪ' ਵਿਧਾਇਕ ਪ੍ਰਿੰਸੀਪਲ ਬੁੱਧਰਾਮ ਨੇ ਕਿਹਾ ਕਿ ਬਜਟ ਪੇਸ਼ ਕਰਨ ਦੌਰਾਨ ਜੋ ਤਜਵੀਜ਼ਾਂ ਐਲਾਨੀਆਂ ਜਾਂਦੀਆਂ ਹਨ, ਸਰਕਾਰ ਉਨ੍ਹਾਂ 'ਤੇ ਵੀ ਖਰਾ ਨਹੀਂ ਉੱਤਰਦੀ। ਬੁੱਧਰਾਮ ਨੇ ਦੱਸਿਆ ਕਿ ਪਿਛਲੇ ਬਜਟ 'ਚ ਖੇਤੀਬਾੜੀ ਖੇਤਰ ਲਈ 15432 ਕਰੋੜ ਰੁਪਏ ਰੱਖੇ ਗਏ ਸਨ, ਪਰੰਤੂ ਸਾਲ ਦੇ ਅੰਤ ਤੱਕ ਸੋਧੇ ਬਜਟ 'ਚ 14734 ਕਰੋੜ ਹੀ ਰਹਿ ਗਏ। ਪਹਿਲਾਂ ਹੀ ਨਾ ਮਾਤਰ ਬਜਟ ਤਜਵੀਜ਼ 'ਚ ਕਰੀਬ 700 ਕਰੋੜ ਘਟਾ ਦਿਤੇ।
ਪ੍ਰਿੰਸੀਪਲ ਬੁੱਧਰਾਮ ਨੇ ਕਿਹਾ ਕਿ ਖੇਤੀ ਖੇਤਰ ਨੂੰ ਇਸ ਬਜਟ 'ਚ ਵੀ ਹੋਰ ਹਾਸ਼ੀਏ ਵੱਲ ਧੱਕਦੇ ਹੋਏ 2 ਪ੍ਰਤੀਸ਼ਤ ਘਟਾ ਕੇ ਮਹਿਜ਼ 14500 ਕਰੋੜ ਰੁਪਏ ਰੱਖੇ ਗਏ ਹਨ। ਬੁੱਧਰਾਮ ਨੇ ਦੱਸਿਆ ਕਿ ਇਸੇ ਤਰ੍ਹਾਂ ਸਿੱਖਿਆ, ਐਸਸਸੀ/ਐਸਟੀ, ਕਲਿਆਣਕਾਰੀ ਯੋਜਨਾਵਾਂ, ਟਰਾਂਸਪੋਰਟ, ਸਿੰਚਾਈ ਅਤੇ ਸਿਹਤ ਆਦਿ ਖੇਤਰਾਂ 'ਚ ਵੀ ਤਜਵੀਜ਼ ਰਾਸ਼ੀ ਮੁਕਾਬਲੇ ਅਸਲ 'ਚ ਘੱਟ ਖ਼ਰਚ ਕੀਤੇ ਗਏ ਹਨ। ਇਸ ਲਈ ਕੈਪਟਨ ਸਰਕਾਰ ਦੇ ਇਸ ਬਜਟ ਐਲਾਨਾਂ 'ਤੇ ਕਿਵੇਂ ਯਕੀਨ ਕੀਤਾ ਜਾ ਸਕਦਾ ਹੈ।
ਉੱਪਰੋਂ ਬਜਟ ਰਾਸ਼ੀ 'ਚ 62309 ਕਰੋੜ ਰੁਪਏ ਕਰਜ਼ ਦੀਆਂ ਕਿਸ਼ਤਾਂ ਅਤੇ ਵਿਆਜ ਮੋੜਨ 'ਚ ਜਾ ਰਹੀ ਹੈ। ਬੁੱਧਰਾਮ ਨੇ ਦੱਸਿਆ ਕਿ 11683 ਕਰੋੜ ਰੁਪਏ ਦਾ ਘਾਟਾ ਦਿਖਾਇਆ ਗਿਆ ਪਰੰਤੂ ਟੈਕਸ ਨਹੀਂ ਲਗਾਇਆ। ਬੁੱਧਰਾਮ ਨੇ ਕਿਹਾ ਕਿ ਟੈਕਸ ਨਾ ਲਗਾਉਣਾ ਬੇਸ਼ੱਕ ਚੰਗੀ ਗੱਲ ਹੈ ਪਰੰਤੂ ਇਹ ਨਹੀਂ ਦੱਸਿਆ ਗਿਆ ਕਿ ਇਹ ਪੈਸਾ ਆਵੇਗਾ ਕਿਥੋਂ। ਬੁੱਧਰਾਮ ਨੇ ਸ਼ੰਕਾ ਜਤਾਈ ਕਿ ਇਸ ਪੈਸੇ ਦੀ ਪੂਰਤੀ ਜਨਹਿਤ ਸੇਵਾਵਾਂ ਅਤੇ ਕਲਿਆਣਕਾਰੀ ਯੋਜਨਾਵਾਂ 'ਚ ਕੱਟ ਕੇ ਕੀਤੀ ਜਾਵੇਗੀ।