ਇੰਦੌਰ 'ਚ ਭਾਰੀ ਮੀਂਹ ਨੇ ਤੋੜਿਆ 39 ਸਾਲਾਂ ਦਾ ਰੀਕਾਰਡ, ਕਈ ਇਲਾਕਿਆਂ 'ਚ ਭਰਿਆ ਪਾਣੀ

ਇੰਦੌਰ, 22 ਅਗੱਸਤ : ਮੱਧ ਪ੍ਰਦੇਸ਼ ਦੀ ਆਰਥਕ ਰਾਜਧਾਨੀ ਆਖੇ ਜਾਣ ਵਾਲੇ ਇੰਦੌਰ 'ਚ ਪਿਛਲੇ 24 ਘੰਟਿਆਂ ਤੋਂ ਜਾਰੀ ਭਾਰੀ ਮੀਂਹ ਨੇ ਸਨਿਚਰਵਾਰ ਨੂੰ 39 ਸਾਲਾਂ ਦਾ ਰੀਕਾਰਡ ਤੋੜ ਦਿਤਾ। ਲਗਾਤਾਰ ਭਾਰੀ ਮੀਂਹ ਕਾਰਨ ਸ਼ਹਿਰ ਦੇ ਕਈ ਇਲਾਕਿਆਂ ਵਿਚ ਪਾਣੀ ਭਰ ਗਿਆ ਅਤੇ ਜਨ-ਜੀਵਨ ਪ੍ਰਭਾਵਿਤ ਹੋ ਗਿਆ। ਮੌਸਮ ਮਹਿਕਮੇ ਦੇ ਵਿਗਿਆਨਕ ਅਮਿਤੇਸ਼ ਯਾਦਵ ਨੇ ਦਸਿਆ ਕਿ ਸ਼ੁਕਰਵਾਰ ਸਵੇਰੇ 8.30 ਵਜੇ ਤੋਂ ਸਨਿਚਰਵਾਰ ਸਵੇਰੇ 8.30 ਦਰਮਿਆਨ ਸ਼ਹਿਰ ਵਿਚ 263.4 ਮਿਲੀਮੀਟਰ (10.37 ਇੰਚ) ਮੀਂਹ ਦਰਜ ਕੀਤਾ ਗਿਆ।
ਉਨ੍ਹਾਂ ਦਸਿਆ, ''ਸ਼ਹਿਰ 'ਚ ਇਸ ਤੋਂ ਪਹਿਲਾਂ 10 ਅਗੱਸਤ 1981 ਨੂੰ 24 ਘੰਟਿਆਂ 'ਚ 212.6 ਮਿਲੀਮੀਟਰ (8.37 ਇੰਚ) ਮੀਂਹ ਦਰਜ ਕੀਤਾ ਗਿਆ ਸੀ। ਇਹ ਰੀਕਾਰਡ ਹੁਣ ਟੁੱਟ ਗਿਆ ਹੈ।''
ਭਾਰੀ ਮੀਂਹ ਦੇ ਮੱਦੇਨਜ਼ਰ ਪ੍ਰਸ਼ਾਸਨ ਅਤੇ ਪੁਲਿਸ ਦੇ ਸੀਨੀਅਰਾਂ ਅਫ਼ਸਰਾਂ ਵਲੋਂ ਸਨਿਚਰਵਾਰ ਤੜਕੇ ਮੈਦਾਨ ਸੰਭਾਲਿਆ ਅਤੇ ਹੇਠਲੀਆਂ ਬਸਤੀਆਂ 'ਚ ਫਸੇ ਲੋਕਾਂ ਨੂੰ ਸੁਰੱਖਿਅਤ ਥਾਵਾਂ 'ਤੇ ਪਹੁੰਚਾਉਣ ਦਾ ਸਿਲਸਿਲਾ ਸ਼ੁਰੂ ਕੀਤਾ ਗਿਆ। ਸ਼ਹਿਰ ਦੇ ਕਈ ਇਲਾਕਿਆਂ ਦੇ ਲੋਕ ਅਪਣੇ ਘਰਾਂ ਵਿਚ ਮੀਂਹ ਦਾ ਪਾਣੀ ਭਰ ਜਾਣ ਦੀਆਂ ਤਸਵੀਰਾਂ ਸੋਸ਼ਲ ਮੀਡੀਆ 'ਤੇ ਪੋਸਟ ਕਰ ਰਹੇ ਹਨ।
ਸ਼ਹਿਰ ਦੀਆਂ ਜ਼ਿਆਦਾਤਰ ਮੁੱਖ ਸੜਕਾਂ ਦੇ ਪਾਣੀ ਨਾਲ ਭਰ ਜਾਣ ਕਾਰਨ ਆਵਾਜਾਈ ਬੁਰੀ ਤਰ੍ਹਾਂ ਪ੍ਰਭਾਵਤ ਹੋਈ। ਚਸ਼ਮਦੀਦਾਂ ਨੇ ਦਸਿਆ ਕਿ ਭਾਰੀ ਮੀਂਹ ਤੋਂ ਬਾਅਦ ਸਰਕਾਰੀ ਮਹਾਰਾਜਾ ਯਸ਼ਵੰਤਰਾਵ ਹਸਪਤਾਲ ਦੇ ਦੋ ਵਾਰਡਾਂ 'ਚ ਪਾਣੀ ਭਰ ਗਿਆ। ਇਹ ਪ੍ਰਦੇਸ਼ ਦੇ ਵੱਡੇ ਸਰਕਾਰੀ ਹਸਪਤਾਲਾਂ 'ਚੋਂ ਇਕ ਹੈ। ਹਸਪਤਾਲ 'ਚ ਪਾਣੀ ਭਰ ਜਾਣ ਕਾਰਨ ਦਾਖ਼ਲ ਮਰੀਜ਼ਾਂ IMAGEਨੂੰ ਹਸਪਤਾਲ ਦੀ ਚੌਥੀ ਮੰਜ਼ਲ 'ਤੇ ਤਬਦੀਲ ਕੀਤਾ ਗਿਆ ਹੈ। (ਪੀਟੀਆਈ)