ਸਵਾਤੀ ਰਾਵਲ ਜਦੋਂ ਦੇਸ਼ ਪਹੁੰਚੀ ਤਾਂ ਸਿਰਫ ਗੁਜਰਾਤ ਲਈ ਹੀ ਨਹੀਂ, ਸਗੋਂ ਪੂਰੇ ਦੇਸ਼ ਲਈ ਮਾਣ ਦੀ ਗੱਲ ਸੀ
ਚੰਡੀਗੜ੍ਹ - ਭਾਰਤ ’ਚ ਕੋਰੋਨਾ ਵਾਇਰਸ ਦੇ ਕਈ ਨਵੇਂ ਮਾਮਲੇ ਸਾਹਮਣੇ ਆ ਚੁੱਕੇ ਹਨ। ਮਰੀਜ਼ਾਂ ਦੀ ਗਿਣਤੀ ਲਗਾਤਾਰ ਵਧਦੀ ਜਾ ਰਹੀ ਹੈ। ਕਈ ਸੂਬਿਆਂ ਨੂੰ ਪੂਰੀ ਤਰ੍ਹਾਂ ਲਾਕ ਡਾਊਨ ਕਰ ਦਿੱਤਾ ਗਿਆ ਹੈ। ਕੋਰੋਨਾ ਵਾਇਰਸ ਦੀ ਸਭ ਤੋਂ ਜ਼ਿਆਦਾ ਮਾਰ ਇਟਲੀ ਦੇਸ਼ ਝੱਲ ਰਿਹਾ ਹੈ। ਵਾਇਰਸ ਦੇ ਕਹਿਰ ਤੋਂ ਤਬਾਹ ਹੋਏ ਇਟਲੀ ’ਚ ਫਸੇ 265 ਭਾਰਤੀਆਂ ਨੂੰ ਲੈ ਕੇ ਏਅਰ ਇੰਡੀਆ ਦਾ ਵਿਸ਼ੇਸ਼ ਜਹਾਜ਼ ਬੀਤੇ ਦਿਨੀਂ ਭਾਰਤ ਪਹੁੰਚਿਆ। ਇਸ ਦਰਮਿਆਨ ਇਕ ਮਹਿਲਾ ਪਾਇਲਟ ਸੁਰਖੀਆਂ ਵਿਚ ਆਈ ਹੋਈ ਹੈ, ਜਿਸ ਦਾ ਨਾਂ ਹੈ, ਸਵਾਤੀ ਰਾਵਲ। ਏਅਰ ਇੰਡੀਆ ਦੀ ਵਿਸ਼ੇਸ਼ ਉਡਾਣ ਜੋ ਇਟਲੀ ਤੋਂ ਭਾਰਤੀਆਂ ਨੂੰ ਲਿਆਈ ਹੈ, ਉਸ ਦੀ ਪਾਇਲਟ ਸਵਾਤੀ ਰਾਵਲ ਸੀ।
File Photo
ਸਵਾਤੀ ਰਾਵਲ ਜਦੋਂ ਦੇਸ਼ ਪਹੁੰਚੀ ਤਾਂ ਸਿਰਫ ਗੁਜਰਾਤ ਲਈ ਹੀ ਨਹੀਂ, ਸਗੋਂ ਪੂਰੇ ਦੇਸ਼ ਲਈ ਮਾਣ ਦੀ ਗੱਲ ਸੀ। ਇਨ੍ਹਾਂ ਭਾਰਤੀਆਂ ਦੀ ਸੁਰੱਖਿਅਤ ਵਾਪਸੀ ਨੇ ਨਾ ਸਿਰਫ ਸੈਂਕੜੇ ਭਾਰਤੀਆਂ ਅਤੇ ਉਨ੍ਹਾਂ ਦੇ ਪਰਿਵਾਰਾਂ ’ਚ ਉਮੀਦ ਜਗਾਈ ਸਗੋਂ ਪੂਰੀ ਦੁਨੀਆ ਨੂੰ ਇਹ ਸੰਦੇਸ਼ ਦਿੱਤਾ ਕਿ ਖਤਰਾ ਚਾਹੇ ਕਿੰਨਾ ਵੀ ਵੱਡਾ ਕਿਉਂ ਨਾ ਹੋਵੇ, ਭਾਰਤ ਆਪਣੇ ਨਾਗਰਿਕਾਂ ਦੀ ਸੁਰੱਖਿਆ ਲਈ ਪੂਰੀ ਤਰ੍ਹਾਂ ਚੌਕਸ ਹੈ।
File
ਸਵਾਤੀ ਦੇ ਪਿਤਾ ਐੱਸ. ਡੀ. ਰਾਵਲ ਨੇ ਕਿਹਾ ਕਿ ਜਦੋਂ ਮੇਰੀ ਧੀ ਸਵਾਤੀ ਨੇ ਮੈਨੂੰ ਜਹਾਜ਼ ਦੇ 22 ਕਰੂ ਮੈਂਬਰਾਂ ਨਾਲ ਇਟਲੀ ਜਾਣ ਲਈ ਕਿਹਾ, ਉਸ ਤੋਂ ਬਾਅਦ 21 ਮਾਰਚ ਦੀ ਸ਼ਾਮ ਨੂੰ ਮੇਰੇ ਨਾਲ ਫੋਨ ’ਤੇ ਗੱਲ ਕੀਤੀ। ਮੈਂ ਉਸ ਤੋਂ ਪੁੱਛਿਆ ਕਿ ਉਸ ਨੇ ਕੀ ਫੈਸਲਾ ਕੀਤਾ ਹੈ ਤਾਂ ਉਸ ਨੇ ਦੱਸਿਆ ਕਿ ਉਹ ਜਾਣ ਲਈ ਤਿਆਰ ਹੈ। ਰਾਵਲ ਨੇ ਕਿਹਾ ਕਿ ਮੇਰੀ ਧੀ ਦਲੇਰ ਹੈ। ਮੈਂ ਇਕ ਜੰਗਲਾਤ ਅਧਿਕਾਰੀ ਹਾਂ ਅਤੇ ਹਰ ਹਾਲਾਤ ’ਚ ਸਰਕਾਰੀ ਡਿਊਟੀ ’ਤੇ ਮੌਜੂਦ ਰਿਹਾ ਹਾਂ। ਮੈਨੂੰ ਆਪਣੀ ਧੀ ’ਤੇ ਮਾਣ ਹੈ ਕਿ ਮੇਰੀ ਧੀ ਨੇ ਇਹ ਕੰਮ ਕੀਤਾ।
File Photo
ਰਾਵਲ ਨੇ ਅੱਗੇ ਕਿਹਾ ਕਿ ਜਦੋਂ ਸਵਾਤੀ ਨੇ ਜਹਾਜ਼ ਤੋਂ ਇਟਲੀ ਲਈ ਉਡਾਣ ਭਰੀ ਤਾਂ ਥੋੜ੍ਹੀ ਚਿੰਤਾ ਜ਼ਰੂਰ ਸੀ। ਉਹ ਇਟਲੀ ’ਚ ਫਸੇ ਉਨ੍ਹਾਂ ਭਾਰਤੀਆਂ ਨੂੰ ਦਿੱਲੀ ਲੈ ਆਈ। ਉਸ ਦੇ ਕਰੂ ਮੈਂਬਰਾਂ ਦੀ ਬਹਾਦਰੀ ਨਾਲ ਸਾਰੇ ਭਾਰਤੀ ਯਾਤਰੀਆਂ ਨੂੰ ਸੁਰੱਖਿਅਤ ਘਰ ਵਾਪਸੀ ਕਰਵਾਈ, ਉਹ ਸ਼ਲਾਘਾਯੋਗ ਹੈ। ਦੱਸ ਦੇਈਏ ਕਿ 1 ਬੱਚੇ ਦੀ ਮਾਂ ਸਵਾਤੀ ਨੇ ਰਾਏਬਰੇਲੀ ਤੋਂ ਕਮਰਸ਼ਲ ਪਾਇਲਟ ਦੀ ਟ੍ਰੇਨਿੰਗ ਲਈ ਸੀ ਅਤੇ ਉਹ 2006 ਤੋਂ ਏਅਰ ਇੰਡੀਆ ਨਾਲ ਕੰਮ ਕਰ ਰਹੀ ਹੈ। ਸੋਸ਼ਲ ਮੀਡੀਆ ’ਤੇ ਸਵਾਤੀ ਦੀ ਹੌਂਸਲੇ ਦੀ ਸ਼ਲਾਘਾ ਕੀਤੀ ਜਾ ਰਹੀ ਹੈ।
