ਸਮਾਨ ਖਰੀਦਣ ਗਏ ਗ੍ਰਾਹਕ ਕੋਲੋਂ ਕੈਰੀ ਬੈਗ ਦੇ ਅਲੱਗ ਤੋਂ 12 ਰੁਪਏ ਵਸੂਲਣੇ ਬਿਗ ਬਜ਼ਾਰ ਨੂੰ ਮਹਿੰਗੇ ਪੈ ਗਏ ਹਨ।
ਚੰਡੀਗੜ੍ਹ: ਸਮਾਨ ਖਰੀਦਣ ਗਏ ਗ੍ਰਾਹਕ ਕੋਲੋਂ ਕੈਰੀ ਬੈਗ ਦੇ ਅਲੱਗ ਤੋਂ 12 ਰੁਪਏ ਵਸੂਲਣੇ ਬਿਗ ਬਜ਼ਾਰ ਨੂੰ ਮਹਿੰਗੇ ਪੈ ਗਏ ਹਨ। ਮਹਿਲਾ ਦੀ ਸ਼ਿਕਾਇਤ ‘ਤੇ ਕੰਜ਼ੀਊਮਰ ਫੋਰਮ ਨੇ ਸੁਣਵਾਈ ਕਰਦੇ ਹੋਏ ਬਿਗ ਬਜ਼ਰ ਨੂੰ ਮਾਮਲੇ ਵਿਚ ਦੋਸ਼ੀ ਮੰਨਦੇ ਹੋਏ ਉਸ ‘ਤੇ ਪੰਜ ਲੱਖ ਦਾ ਜ਼ੁਰਮਾਨਾ ਲਗਾਇਆ ਹੈ।
Photo
ਫੋਰਮ ਨੇ ਇਹ ਪੈਸੇ ਬਿਗ ਬਜ਼ਾਰ ਨੂੰ ਪੀਜੀਆਈ ਪੁਅਰ ਪੈਂਸ਼ਨ ਵੈਲਫੇਅਰ ਫੰਡ ਵਿਚ ਜਮਾਂ ਕਰਵਾਉਣ ਦਾ ਆਦੇਸ਼ ਦਿੱਤਾ ਹੈ। ਇਸ ਦੇ ਨਾਲ ਹੀ ਕੈਰੀ ਬੈਗ ਲਈ ਵਸੂਲੇ 12 ਰੁਪਏ ਵੀ ਗ੍ਰਾਹਕ ਨੂੰ ਵਾਪਸ ਕਰਨ ਲਈ ਕਿਹਾ ਹੈ।
Photo
ਉੱਥੇ ਹੀ ਸ਼ਿਕਾਇਤ ਕਰਤਾ ਨੂੰ ਹੋਈ ਪਰੇਸ਼ਾਨੀ ਲਈ 100 ਰੁਪਏ ਅਤੇ ਕੇਸ ਖਰਚ ਦੇ ਰੂਪ ਵਿਚ 1100 ਦੇਣ ਦਾ ਵੀ ਆਦੇਸ਼ ਦਿੱਤਾ ਹੈ। ਫੋਰਮ ਨੇ ਅਪਣੇ ਅਦੇਸ਼ਾਂ ਵਿਚ ਇਹ ਵੀ ਲਿਖਿਆ ਹੈ ਕਿ ਜੇਕਰ 30 ਦਿਨਾਂ ਤੱਕ ਫੋਰਮ ਦੇ ਆਦੇਸ਼ਾਂ ਦੀ ਪਾਲਣਾ ਨਾ ਹੋਈ ਤਾਂ ਇਸ ਤੋਂ ਬਾਅਦ ਬਿਗ ਬਜ਼ਾਰ ਨੂੰ ਇਹ ਪੈਸੇ 9 ਪ੍ਰਤੀਸ਼ਤ ਵਿਆਜ ਦੇ ਨਾਲ ਦੇਣੇ ਹੋਣਗੇ।
Photo
ਇਸ ਦੇ ਨਾਲ ਹੀ ਬਚਾਅ ਪੱਖ ਨੇ ਦਲੀਲ ਦਿੰਦੇ ਹੋਏ ਕਿਹਾ ਕਿ ਉਹਨਾਂ ਨੇ ਜੋ ਕੈਰੀ ਬੈਗ ਲਈ ਚਾਰਜ ਵਸੂਲ ਕੀਤਾ ਸੀ ਉਹ ਸਹੀ ਸੀ ਕਿਉਂਕਿ ਉਹਨਾਂ ਨੇ ਸਟੋਰ ਵਿਚ ਪਹਿਲਾਂ ਤੋਂ ਹੀ ਇਸ ਬਾਰੇ ਡਿਸਪਲੇਅ ਕੀਤਾ ਹੋਇਆ ਹੈ। ਉਹਨਾਂ ਕਿਹਾ ਕਿ ਸ਼ਿਕਾਇਤ ਕਰਤਾ ਨੂੰ ਚਾਰਜ ਵਸੂਲ ਕਰਨ ਤੋਂ ਪਹਿਲਾਂ ਹੀ ਇਸ ਬਾਰੇ ਦੱਸਿਆ ਗਿਆ ਸੀ ਅਤੇ ਉਹਨਾਂ ਦੇ ਮੰਗਣ ਤੋਂ ਬਾਅਦ ਹੀ ਉਹਨਾਂ ਨੂੰ ਕੈਰੀ ਬੈਗ ਦਿੱਤਾ ਗਿਆ।
File Photo
ਇਸ ਦੇ ਨਾਲ ਹੀ ਵਕੀਲ ਵੱਲੋਂ ਇਹ ਦਲੀਲ ਦਿੱਤੀ ਗਈ ਕਿ ਉਹਨਾਂ ਨੇ ਪੂਰੇ ਸਟੋਰ ਵਿਚ ਮੁੱਖ ਥਾਵਾਂ ‘ਤੇ ਪਹਿਲਾਂ ਹੀ ਇਸ ਸਬੰਧੀ ਵਿਗਿਆਪਨ ਦਿੱਤੇ ਹੋਏ ਹਨ, ਜਿੱਥੇ ਇਹ ਸੰਦੇਸ਼ ਦਿੱਤਾ ਗਿਆ ਹੈ ਕਿ ਗ੍ਰਾਹਕ ਸਮਾਨ ਖਰੀਦਣ ਸਮੇਂ ਖੁਦ ਹੀ ਅਪਣੇ ਕੈਰੀ ਬੈਗ ਲੈ ਕੇ ਆਉਣ, ਨਹੀਂ ਤਾਂ ਉਹਨਾਂ ਨੂੰ ਵੱਖਰਾ ਚਾਰਜ ਦੇਣਾ ਪਵੇਗਾ।
