ਚੰਡੀਗੜ੍ਹ (ਨੀਲ ਭਲਿੰਦਰ ਸਿੰਘ) : ਅਪਣੀ ਪਤਨੀ 'ਤੇ ਕਥਿਤ ਤੌਰ 'ਤੇ ਗੋਲੀ ਚਲਾਉਣ ਦੇ ਦੋਸ਼ਾਂ ਦਾ ਸਾਹਮਣਾ ਕਰ ਰਹੇ ਪੰਜਾਬ ਪੁਲਿਸ ਦੇ ਡੀ.ਐਸ.ਪੀ. ਅਤੁਲ ਸੋਨੀ ਦੀ ਮੁਅੱਤਲੀ ਦੀ ਸਿਫ਼ਾਰਸ਼ ਪੰਜਾਬ ਪੁਲਿਸ ਵਲੋਂ ਕਰ ਦਿਤੀ ਗਈ ਹੈ।
File Photo
ਪੰਜਾਬ ਪੁਲਿਸ ਦੇ ਅਤਿ ਭਰੋਸੇਯੋਗ ਸੂਤਰ ਦੇ ਹਵਾਲੇ ਨਾਲ ਮਿਲੀ ਜਾਣਕਾਰੀ ਮੁਤਾਬਕ ਅਤੁਲ ਸੋਨੀ ਦੀ ਮੁਅੱਤਲੀ ਤੋਂ ਬਾਅਦ ਉਸ ਵਿਰੁਧ ਵਿਭਾਗੀ ਕਾਰਵਾਈ ਵੀ ਸ਼ੁਰੂ ਕਰਨ ਲਈ ਕਹਿ ਦਿਤਾ ਗਿਆ ਹੈ। ਦੱਸਣਯੋਗ ਹੈ ਕਿ ਪੰਜਾਬ ਪੁਲਿਸ ਦੇ ਸੱਭ ਤੋਂ ਵੱਧ ਸਰੀਰਿਕ ਤੌਰ 'ਤੇ ਫਿੱਟ ਮੰਨੇ ਜਾਂਦੇ ਪੁਲਿਸ ਅਫ਼ਸਰ ਅਤੁਲ ਸੋਨੀ 'ਤੇ ਉਸ ਦੀ ਪਤਨੀ ਵਲੋਂ ਗੋਲੀ ਚਲਾਉਣ ਦੇ ਦੋਸ਼ ਲਾਏ ਗਏ ਹਨ।
File Photo
ਪਤਨੀ ਦਾ ਦੋਸ਼ ਹੈ ਕਿ ਪਹਿਲਾਂ ਅਤੁਲ ਸੋਨੀ ਨੇ ਚੰਡੀਗੜ੍ਹ ਦੇ ਇਕ ਕਲੱਬ ਵਿਚ ਜਾ ਕੇ ਅਪਣੀ ਪਤਨੀ ਨਾਲ ਬਦਸਲੂਕੀ ਕੀਤੀ। ਜਦੋਂ ਉਹ ਦੋਵੇਂ ਪਤੀ-ਪਤਨੀ ਵੱਖੋ-ਵਖਰੀਆਂ ਗੱਡੀਆਂ 'ਚ ਬੈਠ ਕੇ ਮੁਹਾਲੀ ਸਥਿਤ ਅਪਣੀ ਰਿਹਾਇਸ਼ 'ਤੇ ਪੁੱਜੇ ਤਾਂ ਅਤੁਲ ਸੋਨੀ ਨੇ ਅਪਣੀ ਪਤਨੀ 'ਤੇ ਫ਼ਾਇਰ ਕਰ ਦਿਤਾ।
File Photo
ਕਿਸਮਤ ਵੱਸ ਉਹ ਗੋਲੀ ਕੰਧ ਵਿਚ ਜਾ ਕੇ ਲੱਗ ਗਈ। ਘਟਨਾ ਤੋਂ ਦੂਜੇ ਦਿਨ ਅਤੁਲ ਸੋਨੀ ਦੀ ਪਤਨੀ ਵਲੋਂ ਅਪਣੀ ਸ਼ਿਕਾਇਤ ਵਾਪਸ ਵੀ ਲੈਣ ਦੀ ਕੋਸ਼ਿਸ਼ ਕੀਤੀ ਗਈ ਸੀ ਪਰ ਪੁਲਿਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਕੋਲ ਉਹ ਹਥਿਆਰ ਤੇ ਖ਼ਾਲੀ ਕਾਰਤੂਸ ਮੌਜੂਦ ਹੈ। ਮੁਹਾਲੀ ਦੇ ਐਸ.ਐਸ.ਪੀ. ਕੁਲਦੀਪ ਸਿੰਘ ਚਾਹਲ ਦਾ ਕਹਿਣਾ ਹੈ ਕਿ ਕਾਨੂੰਨ ਸਭ ਲਈ ਬਰਾਬਰ ਹੈ।
