ਪੁਲਿਸ ਥਾਣਾ ਮਹਿਲ ਕਲਾਂ ਵਲੋਂ ਪਿੰਡ ਸਹਿਜੜਾ ਦੇ ਇਕ ਵਿਅਕਤੀ ਵਲੋਂ ਇਕ ਲੜਕੀ ਨਾਲ ਵਿਆਹ ਦਾ ਝਾਂਸਾ ਦੇ ਕੇ 6 ਸਾਲ ਬਲਾਤਕਾਰ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ...
ਪੁਲਿਸ ਥਾਣਾ ਮਹਿਲ ਕਲਾਂ ਵਲੋਂ ਪਿੰਡ ਸਹਿਜੜਾ ਦੇ ਇਕ ਵਿਅਕਤੀ ਵਲੋਂ ਇਕ ਲੜਕੀ ਨਾਲ ਵਿਆਹ ਦਾ ਝਾਂਸਾ ਦੇ ਕੇ 6 ਸਾਲ ਬਲਾਤਕਾਰ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ।ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਥਾਣਾ ਮਹਿਲ ਕਲਾਂ ਦੇ ਮੁੱਖ ਅਫ਼ਸਰ ਸੰਜੀਵ ਸਿੰਗਲਾ 'ਤੇ ਤਫ਼ਤੀਸ਼ੀ ਅਫ਼ਸਰ ਅਨਾਇਤ ਖਾਂ ਨੇ ਪੱਤਰਕਾਰਾਂ ਨੂੰ ਦਸਿਆ ਬਠਿੰਡਾ ਵਾਸੀ ਲੜਕੀ ਹਾਲ ਆਬਾਦ ਬਰਨਾਲਾ ਨੇ ਪੁਲਿਸ ਨੂੰ ਦਿਤੀ ਦਰਖ਼ਾਸਤ ਵਿਚ ਦਸਿਆ ਕਿ ਉਹ ਵਿਆਹ-ਸ਼ਾਦੀਆਂ ਵਿਚ ਵੱਖ-ਵੱਖ ਆਰਕੈਸਟਰਾਂ ਗਰੁੱਪਾਂ ਨਾਲ ਪ੍ਰੋਗਰਾਮ ਕੰਮ ਕਰਦੀ ਹੈ।
ਅੱਜ ਤੋਂ 6 ਸਾਲ ਕੁ ਪਹਿਲਾ ਜਦੋਂ ਉਹ ਮਹਿਲ ਕਲਾਂ ਦੇ ਇਕ ਮੈਰਿਜ ਪੈਲਸ 'ਚ ਪ੍ਰੋਗਰਾਮ ਕਰਨ ਲਈ ਆਈ ਤਾਂ ਉਸ ਦੀ ਜਾਣ ਪਹਿਚਾਣ ਹਰਦੀਪ ਕੁਮਾਰ ਵਾਸੀ ਸਹਿਜੜਾ (ਬਰਨਾਲਾ) ਨਾਲ ਹੋ ਗਈ ਤੇ ਉਸ ਨੇ ਮੇਰੇ ਨਾਲ ਗੱਲਬਾਤ ਕਰਨੀ ਸ਼ੁਰੂ ਕਰ ਦਿਤੀ, ਉਸ ਨੇ ਅਪਣੇ ਆਪ ਨੂੰ ਕੁਆਰਾ ਦੱਸ ਕੇ ਮੇਰੇ ਨਾਲ ਵਿਆਹ ਕਰਾਉਣ ਦਾ ਝਾਂਸਾ ਦੇ ਕੇ ਸਰੀਰਕ ਸਬੰਧ ਬਣਾ ਲਏ। ਹੁਣ ਜਦੋਂ ਮੈਂ ਉਸ ਨੂੰ ਵਿਆਹ ਕਰਾਉਣ ਲਈ ਕਹਿੰਦੀ ਤਾਂ ਉਹ ਟਾਲ ਮਟੋਲ ਕਰਦਾ ਰਿਹਾ।
ਬੀਤੇ ਕਲ ਵਿਆਹ ਦੀ ਗੱਲਬਾਤ ਕਰਨ ਲਈ ਅਪਣੇ ਸਾਥੀਆਂ ਨਾਲ ਜਦੋਂ ਮੈਂ ਪਿੰਡ ਸਹਿਜੜਾ ਪੁੱਜੀ ਤਾਂ ਪਹਿਲਾਂ ਹੀ ਬੱਸ ਅੱਡੇ 'ਤੇ ਅਪਣੇ ਸਾਥੀਆਂ ਨਾਲ ਰੁਕੇ ਹਰਦੀਪ ਕੁਮਾਰ ਨੇ ਪਿਸਤੌਲ ਨਾਲ ਉਸ 'ਤੇ ਗੋਲੀ ਚਲਾ ਦਿਤੀ ਜੋ ਉਸ ਦੇ ਸਿਰ ਉਪਰੋਂ ਲੰਘ ਗਈ। ਅਸੀਂ ਅਪਣੀ ਜਾਨ ਬਚਾਉਣ ਲਈ ਗੱਡੀ 'ਚ ਸਵਾਰ ਹੋ ਕੇ ਭੱਜਣ ਲੱਗੇ ਤਾਂ ਉਨ੍ਹਾਂ ਨੇ ਸਾਡੀ ਗੱਡੀ ਦਾ ਪਿੱਛਾ ਕਰਦਿਆਂ ਗੱਡੀ 'ਚ ਵੀ ਫਾਇਰ ਮਾਰਿਆ।
ਸਹਾਇਕ ਥਾਣੇਦਾਰ ਅਨਾਇਤ ਖਾਂ ਨੇ ਦਸਿਆ ਲੜਕੀ ਦੇ ਬਿਆਨਾਂ 'ਤੇ ਹਰਦੀਪ ਕੁਮਾਰ ਵਾਸੀ ਸਹਿਜੜਾ ਵਿਰੁਧ ਬਲਾਤਕਾਰ ਅਤੇ ਅਸਲਾ ਐਕਟ ਅਧੀਨ ਮਾਮਲਾ ਦਰਜ ਕਰ ਕੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿਤੀ, ਦੋਸ਼ੀ ਅਜੇ ਫ਼ਰਾਰ ਹੈ।
