ਨੈਸ਼ਨਲ ਅਚੀਵਮੈਂਟ ਸਰਵੇ-2021 ਵਿਚੋਂ ਪੰਜਾਬ ਨੇ ਮਾਰੀ ਬਾਜ਼ੀ
36 ਸੂਬਿਆਂ ਵਿਚੋਂ ਹਾਸਲ ਕੀਤਾ ਪਹਿਲਾ ਨੰਬਰ
ਚੰਡੀਗੜ੍ਹ, 26 ਮਈ (ਭੁੱਲਰ): ਨੈਸ਼ਨਲ ਅਚੀਵਮੈਂਟ ਸਰਵੇ 2021 ਵਿਚੋਂ ਪੰਜਾਬ ਨੇ ਮੱਲਾਂ ਮਾਰੀਆਂ ਹਨ | ਸਰਵੇ ਵਿਚ ਪੰਜਾਬ ਪਹਿਲੇ ਨੰਬਰ 'ਤੇ ਆਇਆ ਹੈ | ਇਸ ਸਰਵੇ ਵਿਚ ਪੰਜਾਬ ਦਾ 0.5 ਰੈਂਕ ਹੈ | ਪੰਜਾਬ ਨੇ ਦਿੱਲੀ ਸਮੇਤ ਸਾਰੇ ਪ੍ਰਦੇਸ਼ਾਂ ਨੂੰ ਪਛਾੜ ਦਿਤਾ ਹੈ ਤੇ 36 ਸੂਬਿਆਂ ਵਿਚੋਂ ਪਹਿਲੇ ਨੰਬਰ 'ਤੇ ਆਇਆ ਹੈ |
ਦਸਣਯੋਗ ਹੈ ਕਿ ਜਮਾਤ ਤਿੰਨ, ਪੰਜ ਦੇ ਮੁਕਾਬਲੇ ਅੱਠਵੀਂ ਅਤੇ ਦਸਵੀਂ ਜਮਾਤ ਦੇ ਸਮੇਂ ਨਾਲ ਸਿੱਖਣ ਦੀ ਸਮਰੱਥਾ ਘਟਦੀ ਜਾ ਰਹੀ ਹੈ | ਇਹ ਪ੍ਰਗਟਾਵਾ ਵੀ ਨੈਸ਼ਨਲ ਅਚੀਵਮੈਂਟ ਸਰਵੇ 2021 ਦੀ ਰਿਪੋਰਟ ਵਿਚ ਹੋਇਆ ਹੈ | ਇਹ ਭਾਸ਼ਾ, ਗਣਿਤ, ਵਾਤਾਵਰਣ ਵਿਗਿਆਨ, ਸਮਾਜਕ ਵਿਗਿਆਨ ਅਤੇ ਅੰਗਰੇਜ਼ੀ ਵਿਚ ਯੋਗਤਾ-ਆਧਾਰਤ ਮੁਲਾਂਕਣ 'ਤੇ ਕੇਂਦਰਿਤ ਸੀ | ਰਿਪੋਰਟ ਮੁਤਾਬਕ ਨੈਸ਼ਨਲ ਅਚੀਵਮੈਂਟ ਸਰਵੇ 2021 ਦੀ ਪ੍ਰੀਖਿਆ 12 ਨਵੰਬਰ ਨੂੰ ਦੇਸ਼ ਭਰ ਵਿਚ ਆਯੋਜਤ ਕੀਤੀ ਗਈ ਸੀ | ਇਸ ਵਿਚ ਦੇਸ਼ ਦੇ ਸਾਰੇ ਸਰਕਾਰੀ, ਸਰਕਾਰੀ ਸਹਾਇਤਾ ਪ੍ਰਾਪਤ ਅਤੇ ਪ੍ਰਾਈਵੇਟ ਸਕੂਲਾਂ ਦੇ ਵਿਦਿਆਰਥੀਆਂ ਨੇ ਭਾਗ ਲਿਆ |
ਸਰਵੇਖਣ ਵਿਚ ਲਗਭਗ 1,18,274 ਸਕੂਲਾਂ ਦੇ ਕੁਲ 34,01,158 ਵਿਦਿਆਰਥੀਆਂ ਅਤੇ 26,824 ਅਧਿਆਪਕਾਂ ਨੇ ਭਾਗ ਲਿਆ | ਜ਼ਿਆਦਾਤਰ ਰਾਜਾਂ ਅਤੇ ਕੇਂਦਰ ਸ਼ਾਸਤ ਪ੍ਰਦੇਸ਼ਾਂ ਦੇ ਸਕੂਲਾਂ ਦੀ ਕਾਰਗੁਜ਼ਾਰੀ
ਦੀ ਇਹ ਰਿਪੋਰਟ ਚੰਗੀ ਨਹੀਂ ਹੈ ਪਰ ਪੰਜਾਬ, ਕੇਰਲ, ਰਾਜਸਥਾਨ, ਉਤਰ ਪ੍ਰਦੇਸ਼, ਹਿਮਾਚਲ, ਮਹਾਰਾਸ਼ਟਰ ਅਤੇ ਚੰਡੀਗੜ੍ਹ ਰਾਸ਼ਟਰੀ ਔਸਤ ਨਾਲੋਂ ਬਿਹਤਰ ਰਿਪੋਰਟ ਕਰਦੇ ਹਨ |
ਦੇਸ਼ ਭਰ ਵਿਚ ਤੀਜੀ, ਪੰਜਵੀਂ, ਅੱਠਵੀਂ ਅਤੇ 10ਵੀਂ ਜਮਾਤ ਦੇ 3.4 ਮਿਲੀਅਨ ਸਕੂਲੀ ਵਿਦਿਆਰਥੀਆਂ ਵਿਚੋਂ, 38 ਫ਼ੀ ਸਦੀ ਨੇ ਕਿਹਾ ਕਿ ਮਹਾਂਮਾਰੀ ਵਿਚ ਉਨ੍ਹਾਂ ਦੀ ਸਿਖਿਆ ਲਈ ਇਕ ਮੁਸ਼ਕਲ ਪੜਾਅ ਸੀ | ਜਦੋਂ ਕਿ 24 ਫ਼ੀ ਸਦੀ ਨੇ ਕਿਹਾ ਕਿ ਉਨ੍ਹਾਂ ਕੋਲ ਘਰ ਵਿਚ ਡਿਜੀਟਲ ਡਿਵਾਈਸਾਂ ਤਕ ਪਹੁੰਚ ਨਹੀਂ ਹੈ | ਇਸ ਨਾਲ ਹੀ, 80 ਫ਼ੀ ਸਦੀ ਬੱਚੇ ਮਹਿਸੂਸ ਕਰਦੇ ਹਨ ਕਿ ਉਹ ਅਪਣੇ ਸਾਥੀਆਂ ਦੀ ਮਦਦ ਨਾਲ ਸਕੂਲ ਵਿਚ ਬਿਹਤਰ ਸਿਖਦੇ ਹਨ | ਸਰਵੇਖਣ ਵਿਚ ਇਹ ਵੀ ਦਸਿਆ ਗਿਆ ਹੈ ਕਿ ਭਾਰਤ ਵਿਚ 48 ਫ਼ੀ ਸਦੀ ਵਿਦਿਆਰਥੀ ਪੈਦਲ ਹੀ ਸਕੂਲ ਜਾਂਦੇ ਹਨ |
