71 ਸਾਲ ਦੀ ਉਮਰ ’ਚ ਆਖ਼ਰੀ ਸਾਹ ਲਿਆ
ਲੰਡਨ : ਇਕ ਪਾਸੇ ਭਾਰਤ ਤੇ ਇੰਗਲੈਂਡ ਵਿਚਾਲੇ ਟੈਸਟ ਮੈਚਾਂ ਦੀ ਲੜੀ ਦੇ ਦੂਜੇ ਮੁਕਾਬਲੇ ਦੀਆਂ ਤਿਆਰੀਆਂ ਚੱਲ ਰਹੀਆਂ ਹਨ, ਉਥੇ ਹੀ ਕ੍ਰਿਕਟ ਜਗਤ ਲਈ ਇਕ ਮੰਦਭਾਗੀ ਖ਼ਬਰ ਸਾਹਮਣੇ ਆ ਰਹੀ ਹੈ, ਜਿਥੇ ‘ਨੈੱਡ’ ਵਜੋਂ ਜਾਣੇ ਜਾਂਦੇ ਇੰਗਲੈਂਡ ਦੇ ਸਾਬਕਾ ਧਾਕੜ ਬੱਲੇਬਾਜ਼ ਵੇਨ ਲੈਰਕਿਨਜ਼ ਨੇ ਦੁਨੀਆਂ ਨੂੰ ਅਲਵਿਦਾ ਆਖ ਦਿਤਾ ਹੈ। ਉਨ੍ਹਾਂ ਕੱੁਝ ਦੇਰ ਬਿਮਾਰ ਹੋਣ ਮਗਰੋਂ 71 ਸਾਲ ਦੀ ਉਮਰ ’ਚ ਆਖ਼ਰੀ ਸਾਹ ਲਿਆ।
ਵੇਨ ਨੇ ਸਾਲ 1979 ਤੋਂ ਲੈ ਕੇ 1991 ਤਕ ਇੰਗਲੈਂਡ ਲਈ 13 ਟੈਸਟ ਤੇ 25 ਇਕ ਰੋਜ਼ਾ ਮੈਚ ਖੇਡੇ। ਸਾਲ 1979 ਦੇ ਵਿਸ਼ਵ ਕੱਪ ਫ਼ਾਈਨਲ ’ਚ ਉਨ੍ਹਾਂ ਨੇ 7ਵੇਂ ਨੰਬਰ ’ਤੇ ਬੱਲੇਬਾਜ਼ੀ ਕੀਤੀ ਸੀ ਤੇ ਇਸ ਤੋਂ ਇਲਾਵਾ 2 ਓਵਰ ਗੇਂਦਬਾਜ਼ੀ ਵੀ ਕੀਤੀ ਸੀ। ਇੰਗਲੈਂਡ ਤੋਂ ਇਲਾਵਾ ਉਨ੍ਹਾਂ ਜ਼ਿਆਦਾਤਰ ਕ੍ਰਿਕਟ ਨਾਰਥੈਂਪਟਨਸ਼ਾਇਰ ਲਈ ਖੇਡੀ ਸੀ। ਉਨ੍ਹਾਂ ਨੇ ਨਾਰਥੈਂਪਟਨਸ਼ਾਇਰ ਲਈ 700 ਤੋਂ ਵੱਧ ਮੈਚ ਖੇਡੇ ਸਨ। ਇਸ ਦੌਰਾਨ 40 ਹਜ਼ਾਰ ਦੌੜਾਂ ਬਣਾਉਣ ਤੇ 85 ਸੈਂਕੜੇ ਜੜਨ ਤੋਂ ਬਾਅਦ ਉਨ੍ਹਾਂ ਨੇ ਕ੍ਰਿਕਟ ਤੋਂ ਸੰਨਿਆਸ ਲੈ ਕੇ ਦੁਰਹਮ ਰਹਿਣ ਦਾ ਫ਼ੈਸਲਾ ਕੀਤਾ। (ਏਜੰਸੀ)
