ਫਾਜ਼ਿਲਕਾ: ਪਿੰਡ ਡੰਗਰਖੇੜਾ ਦੇ 30 ਨੌਜਵਾਨ ਈ.ਟੀ.ਟੀ ਅਧਿਆਪਕ ਲਈ ਚੁਣੇ ਗਏ ਹਨ, ਜਿਸ ਦਾ ਸਿਹਰਾ ਪਿੰਡ ਦੇ ਪੜ੍ਹੇ ਲਿਖੇ ਵਰਗ ਨੂੰ ਜਾਂਦਾ ਹੈ। ਪਿੰਡ ਵਿਚ ਵਿੱਦਿਆ ਦਾ ਚਾਨਣ 70 ਦੇ ਦਹਾਕੇ ਵਿਚ ਜਾਗਣਾ ਸ਼ੁਰੂ ਹੋ ਗਿਆ ਸੀ। ਪਹਿਲਾਂ ਆਲੇ-ਦੁਆਲੇ ਦੇ ਪਿੰਡਾਂ ਵਿਚ ਵੀ ਕੋਈ ਅਧਿਆਪਕ ਨਹੀਂ ਸੀ। ਪਹਿਲੀ ਵਾਰ ਸਕੂਲ ਅਧਿਆਪਕ ਪ੍ਰਿਥਵੀਰਾਜ ਨੂੰ ਨੈਸ਼ਨਲ ਐਵਾਰਡ ਨਾਲ ਸਨਮਾਨਿਤ ਕੀਤਾ ਗਿਆ।
ਇਸ ਤੋਂ ਬਾਅਦ ਪਿੰਡ ਦੇ ਨੌਜਵਾਨਾਂ ਨੇ ਸਾਥੀਆਂ ਅਤੇ ਹੋਰਨਾਂ ਨੂੰ ਨਸ਼ਿਆਂ ਤੋਂ ਬਚਾਉਣ ਲਈ ਮੁਫ਼ਤ ਕੋਚਿੰਗ ਕਲਾਸਾਂ ਸ਼ੁਰੂ ਕਰ ਦਿੱਤੀਆਂ। ਪਿੰਡ ਦੇ ਹਰ ਪੜ੍ਹੇ-ਲਿਖੇ ਨੇ 5-5 ਬੱਚਿਆਂ ਨੂੰ ਅੱਗੇ ਪੜ੍ਹਾਉਣ ਦੀ ਕਮਾਨ ਸੰਭਾਲੀ। ਅੱਜ ਪਿੰਡ ਵਿਚ 400 ਤੋਂ ਵੱਧ ਸਰਕਾਰੀ ਮੁਲਾਜ਼ਮ ਹਨ, ਜਿਨ੍ਹਾਂ ਵਿੱਚੋਂ 65 ਫ਼ੀਸਦੀ ਔਰਤਾਂ ਹਨ ਅਤੇ ਕੁੱਲ ਮੁਲਾਜ਼ਮਾਂ ਵਿੱਚੋਂ ਅੱਧੇ ਦੇ ਕਰੀਬ ਅਧਿਆਪਕ ਹਨ।
ਇਸ ਪਿੰਡ ਦੇ 7 ਵਿਦਿਆਰਥੀ ਪੀ.ਐੱਚ.ਡੀ ਦੀ ਡਿਗਰੀ ਪ੍ਰਾਪਤ ਕਰ ਚੁੱਕੇ ਹਨ ਅਤੇ ਇਸ ਤੋਂ ਬਾਅਦ ਵੱਖ-ਵੱਖ ਅਹੁਦਿਆਂ 'ਤੇ ਨਿਯੁਕਤ ਹਨ ਅਤੇ ਇਸ ਪਿੰਡ ਦੀਆਂ 7 ਪੀ.ਐੱਚ.ਡੀ ਹੋਲਡਰਾਂ ਵਿੱਚੋਂ 2 ਭੈਣਾਂ ਅਮਨ ਮਾਨ ਅਤੇ ਸੁਮਨ ਮਾਨ ਸੋਨ ਤਮਗ਼ਾ ਜੇਤੂ ਹਨ ਅਤੇ ਦੇਸ਼ ਦੀਆਂ ਵੱਖ-ਵੱਖ ਯੂਨੀਵਰਸਿਟੀਆਂ ਵਿਚ ਤਾਇਨਾਤ ਹਨ। ਪਿੰਡ ਦਾ ਇਹ ਨਿਯਮ ਬਣ ਗਿਆ ਹੈ ਕਿ ਸਫ਼ਲ ਵਿਅਕਤੀ ਪਿੰਡ ਦੇ 5 ਨੌਜਵਾਨਾਂ ਨੂੰ ਅੱਗੇ ਲਿਜਾਣ ਦੀ ਜ਼ਿੰਮੇਵਾਰੀ ਲੈਂਦਾ ਹੈ।
ਨੇੜਲੇ ਪਿੰਡਾਂ ’ਤੇ ਵੀ ਵਿੱਦਿਆ ਦਾ ਰੰਗ ਚੜ੍ਹਿਆ
ਪਿੰਡ ਦੇ ਵਿਦਿਆਰਥੀਆਂ ਨੂੰ ਪ੍ਰੇਰਿਤ ਕਰਦੇ ਪੰਜਾਬੀ ਲੈਕਚਰਾਰ ਕੁਲਜੀਤ ਸਿੰਘ ਨੇ ਦੱਸਿਆ ਕਿ ਪੰਚਾਇਤ ਦੇ ਸਹਿਯੋਗ ਨਾਲ 5 ਲਾਇਬ੍ਰੇਰੀਆਂ ਅਤੇ 2 ਮਾਰਗਦਰਸ਼ਨ ਕੇਂਦਰ ਖੋਲ੍ਹੇ ਗਏ ਹਨ। ਪਿੰਡ ਡੰਗਰਖੇੜਾ ਵਿਚ ਵਿੱਦਿਆ ਦੇ ਵਧਦੇ ਰੁਝਾਨ ਨੂੰ ਦੇਖਦਿਆਂ ਆਸ-ਪਾਸ ਦੇ ਪਿੰਡਾਂ ਵਿਚ ਵੀ ਇਸ ਦਾ ਰੰਗ ਚੜ੍ਹਨਾ ਸ਼ੁਰੂ ਹੋ ਗਿਆ ਹੈ। ਹਾਲ ਹੀ ਵਿਚ ਪਿੰਡ ਡੰਗਰਖੇੜਾ ਤੋਂ 30, ਬਜੀਦਪੁਰ ਤੋਂ 22, ਪਿੰਡ ਚੂਹੜੀਵਾਲਾ ਧੰਨਾ ਤੋਂ 19 ਈ.ਟੀ.ਟੀ ਅਧਿਆਪਕ ਚੁਣੇ ਗਏ ਹਨ। ਨੌਜਵਾਨ ਮਹਿਲਾ ਸਰਪੰਚ ਨੇ ਈ.ਟੀ.ਟੀ ਦੀ ਪ੍ਰੀਖਿਆ ਵੀ ਪਾਸ ਕੀਤੀ ਹੈ।
ਪਿੰਡ ਦੇ 7 ਲੜਕੇ ਅਤੇ ਲੜਕੀਆਂ ਐਮ.ਬੀ.ਬੀ.ਐਸ
ਇਸ ਪਿੰਡ ’ਚ 7 ਵਿਦਿਆਰਥੀਆਂ ਨੇ ਐੱਮ.ਬੀ.ਬੀ.ਐੱਸ. ਕੀਤੀ ਹੈ, ਜਿਨ੍ਹਾਂ 'ਚੋਂ ਡਾ. ਵਾਨੀ ਕਾਰਗਵਾਲ ਲੇਡੀ ਹਾਰਡਿੰਗ ਮੈਡੀਕਲ ਕਾਲਜ, ਦਿੱਲੀ ਵਿਖੇ ਤਾਇਨਾਤ ਹੈ, ਜਦਕਿ ਡਾ. ਮੀਨੂੰ ਰਾਜਸਥਾਨ ਵਿਚ ਇੱਕ ਮੈਡੀਕਲ ਅਫ਼ਸਰ ਹੈ।
