ਮੌਲਵੀਆਂ ਨੇ ਨਿਕਾਹ 'ਚ ਡਾਂਸ, ਸੰਗੀਤ ਅਤੇ ਪਟਾਕੇ ਚਲਾਉਣ 'ਤੇ ਲਾਈ ਪਾਬੰਦੀ

ਧਨਬਾਦ, 28 ਨਵੰਬਰ : ਝਾਰਖੰਡ ਦੇ ਧਨਬਾਦ ਜ਼ਿਲ੍ਹੇ ਦੇ ਇਕ ਬਲਾਕ ਦੇ ਮੌਲਵੀਆਂ ਨੇ ਨਿਕਾਹ ਦੌਰਾਨ 'ਗ਼ੈਰ-ਇਸਲਾਮੀ ਚੀਜ਼ਾਂ' ਜਿਵੇਂ ਡਾਂਸ, ਤੇਜ ਆਵਾਜ਼ ਵਾਲੇ ਸੰਗੀਤ ਅਤੇ ਪਟਾਕੇ ਚਲਾਉਣ 'ਤੇ ਪਾਬੰਦੀ ਲਾ ਦਿਤੀ ਹੈ ਅਤੇ ਇਸ ਦਾ ਉਲੰਘਣ ਕਰਨ ਵਾਲਿਆਂ 'ਤੇ ਜੁਰਮਾਨਾ ਲਾਉਣ ਦੀ ਗੱਲ ਆਖੀ ਹੈ | ਜ਼ਿਲ੍ਹੇ ਦੇ ਨਿਰਸਾ ਬਲਾਕ ਸਥਿਤ ਸਿਬਲਿਬਾਦੀ ਜਾਮਾ ਮਸਜਿਦ ਦੇ ਮੁੱਖ ਮੌਲਵੀ ਮੌਲਾਨਾ ਮਸੂਦ ਅਖ਼ਤਰ ਨੇ ਸੋਮਵਾਰ ਨੂੰ  ਕਿਹਾ ਕਿ ਇਹ ਸਾਰੀਆਂ ਪਾਬੰਦੀਆਂ 2 ਦਸੰਬਰ ਤੋਂ ਪ੍ਰਭਾਵੀ ਹੋਣਗੀਆਂ |
ਅਖ਼ਤਰ ਨੇ ਕਿਹਾ ਕਿ ਅਸੀਂ ਆਮ ਸਹਿਮਤੀ ਨਾਲ ਤੈਅ ਕੀਤਾ ਹੈ ਕਿ ਨਿਕਾਹ ਇਸਲਾਮ ਦੇ ਹਿਸਾਬ ਨਾਲ ਹੋਣਗੇ ਅਤੇ ਨਾਚ-ਗਾਣਾ, ਡੀਜੇ ਅਤੇ ਪਟਾਕੇ ਚਲਾਉਣ ਇਹ ਸਭ ਨਹੀਂ ਹੋਵੇਗਾ | ਇਸ ਹੁਕਮ ਦਾ ਉਲੰਘਣ ਕਰਨ ਵਾਲਿਆਂ 'ਤੇ 51,00 ਰੁਪਏ ਦਾ ਜੁਰਮਾਨਾ ਲੱਗੇਗਾ |
ਉਨ੍ਹਾਂ ਕਿਹਾ ਕਿ ਇਸਲਾਮ 'ਚ ਇਨ੍ਹਾਂ ਚੀਜ਼ਾਂ ਦੀ ਇਜਾਜ਼ਤ ਨਹੀਂ ਹੈ | ਇਸ ਨਾਲ ਲੋਕਾਂ ਨੂੰ  ਵੀ ਪਰੇਸ਼ਾਨੀ ਹੁੰਦੀ ਹੈ | ਅਖ਼ਤਰ ਨੇ ਇਹ ਵੀ ਕਿਹਾ ਕਿ ਨਿਕਾਹ ਰਾਤ 8 ਵਜੇ ਤੋਂ ਪਹਿਲਾਂ ਪੜਿ੍ਹਆ ਜਾਵੇ ਕਿਉਂਕਿ ਉਸ ਤੋਂ ਬਾਅਦ ਦਾ ਸਮਾਂ ਸਹੀ ਨਹੀਂ ਹੁੰਦਾ | ਜੇਕਰ ਕੋਈ ਰਾਤ 11 ਵਜੇ ਤੋਂ ਬਾਅਦ ਨਿਕਾਹ ਕਰਾਉਂਦਾ ਹੈ ਤਾਂ ਉਸ 'ਤੇ ਵੀ ਜੁਰਮਾਨਾ ਲਾਇਆ ਜਾਵੇਗਾ | ਉਲੰਘਣ ਕਰਨ ਵਾਲੇ ਨੂੰ  ਲਿਖਤੀ ਮੁਆਫ਼ੀਨਾਮਾ ਵੀ ਦੇਣਾ ਹੋਵੇਗਾ | ਮੌਲਵੀ ਨੇ ਮੁਸਲਮਾਨਾਂ ਨੂੰ  ਅਪੀਲ ਕੀਤੀ ਹੈ ਕਿ ਉਹ ਇਸ ਫ਼ੈਸਲੇ ਬਾਰੇ ਅਪਣੇ ਰਿਸ਼ਤੇਦਾਰਾਂ ਅਤੇ ਹੋਰ ਲੋਕਾਂ ਨੂੰ  ਵੀ ਦਸਣ |    (ਏਜੰਸੀ)