ਨਿਗਮ ਨੇ ਬਣਾਇਆ ਇਸ਼ਤਿਹਾਰਾਂ ਰਾਹੀਂ ਕਮਾਈ ਦਾ ਸਾਧਨ, ਅਸਲ ਮੰਤਵ ਫਿਰ ਵੀ ਹੋਇਆ ਫ਼ੇਲ
ਐਸ.ਏ.ਐਸ. ਨਗਰ, 8 ਫ਼ਰਵਰੀ (ਕੁਲਦੀਪ ਸਿੰਘ) : ਮੋਹਾਲੀ ਵਿਚ ਗਰੇਟਰ ਮੋਹਾਲੀ ਏਰੀਆ ਡਿਵੈਲਪਮੈਂਟ ਅਥਾਰਟੀ (ਗਮਾਡਾ) ਵਲੋਂ 2011-12 ਵਿਚ ਬਣਾਏ ਗਏ 4 'ਫੁਟ ਓਵਰਬ੍ਰਿਜ' ਸਫੇਦ ਹਾਥੀ ਬਣ ਕੇ ਰਹਿ ਗਏ ਹਨ। ਇਨ੍ਹਾਂ ਦੀ ਕੋਈ ਵਰਤੋਂ ਲੋਕਾਂ ਵਲੋਂ ਨਹੀਂ ਕੀਤੀ ਜਾਂਦੀ। ਇਕ ਗੱਲ ਜ਼ਰੂਰ ਹੈ ਕਿ ਗਮਾਡਾ ਵਲੋਂ ਇਹ ਫ਼ੁਟ ਓਵਰਬ੍ਰਿਜ ਨਗਰ ਨਿਗਮ ਹਵਾਲੇ ਕੀਤੇ ਜਾਣ ਉਪਰੰਤ ਨਿਗਮ ਨੇ ਇਨ੍ਹਾਂ ਨੂੰ ਇਸ਼ਤਿਹਾਰ ਕੰਪਨੀਆਂ ਨੂੰ ਠੇਕੇ 'ਤੇ ਦੇ ਕੇ ਸਾਲਾਨਾ ਇਕ ਕਰੋੜ ਰੁਪਏ ਦੇ ਲਗਭਗ ਦੀ ਆਮਦਨ ਜ਼ਰੂਰ ਪੈਦਾ ਕਰ ਲਈ। ਇਸ ਦੇ ਨਾਲ-ਨਾਲ ਇਨ੍ਹਾਂ ਦੇ ਆਲੇ-ਦੁਆਲੇ ਕਈ ਤਰ੍ਹਾਂ ਦੇ ਕਬਜ਼ੇ ਹੋ ਗਏ ਹਨ ਅਤੇ ਇਸ ਤੋਂ ਵੀ ਵੱਧ ਕੇ ਇਨ੍ਹਾਂ ਨੂੰ ਖੜੇ ਕਰਨ ਲਈ ਬਣਾਏ ਗਏ ਖੰਭੇ ਨਾਜਾਇਜ਼ ਤੌਰ 'ਤੇ ਲਗਾਏ ਜਾਣ ਵਾਲੇ ਪੀ.ਜੀ. ਅਤੇ ਹੋਰ ਇਸ਼ਤਿਹਾਰਾਂ ਲਈ ਵਰਤੇ ਜਾਂਦੇ ਹਨ। ਇਸ ਤਰ੍ਹਾਂ ਇਨ੍ਹਾਂ ਨੂੰ ਬਣਾਉਣ ਲਈ ਜੋ ਮੰਤਵ ਸੀ, ਉਹ ਪੂਰੀ ਤਰ੍ਹਾਂ ਫ਼ੇਲ ਸਾਬਤ ਹੋ ਗਿਆ ਹੈ।2 ਕਰੋੜ ਰੁਪਏ ਕੀਤਾ ਸੀ ਖ਼ਰਚਾ : ਜਾਣਕਾਰੀ ਅਨੁਸਾਰ ਗਮਾਡਾ ਨੇ ਜਦੋਂ ਇਹ 4 ਫ਼ੁਟ ਓਵਰਬ੍ਰਿਜ ਉਸਾਰੇ ਸਨ ਤਾਂ ਇਨ੍ਹਾਂ 'ਤੇ 2 ਕਰੋੜ ਰੁਪਏ (ਪ੍ਰਤੀ ਓਵਰਬ੍ਰਿਜ 50 ਲੱਖ ਰੁਪਏ) ਦਾ ਖ਼ਰਚਾ ਕੀਤਾ ਗਿਆ ਸੀ ਪਰ ਇਨ੍ਹਾਂ ਦੀ ਵਰਤੋਂ ਕਦੇ ਵੀ ਨਹੀਂ ਹੋ ਸਕੀ ਕਿਉਂਕਿ ਸੀਨੀਅਰ ਸਿਟੀਜਨ ਤਾਂ ਇਸ 'ਤੇ ਚੜ੍ਹ ਹੀ ਨਹੀਂ ਸਕਦੇ ਕਿਉਂਕਿ ਇਸ ਦੀਆਂ ਪੌੜੀਆਂ ਬਹੁਤ ਹਨ ਅਤੇ ਨੌਜਵਾਨ ਲੋਕ ਇਸ ਦੀ ਵਰਤੋਂ ਵੈਸੇ ਹੀ ਕਰ ਕੇ ਰਾਜ਼ੀ ਨਹੀਂ। ਹਾਂ ਭੂੰਡ ਆਸ਼ਕ ਇਨ੍ਹਾਂ ਦੀ ਵਰਤੋਂ ਕਰਦੇ ਹਨ, ਨਸ਼ੇ ਖਾਣ ਵਾਲੇ ਨੌਜਵਾਨ ਇਨ੍ਹਾਂ ਦੀ ਵਰਤੋਂ ਕਰਦੇ ਹਨ ਅਤੇ ਇੱਕਾ-ਦੁੱਕਾ ਲੋਕ ਵੀ ਇਨ੍ਹਾਂ ਦੀ ਵਰਤੋਂ ਸੜਕ ਪਾਰ ਕਰਨ ਵਾਸਤੇ ਕਦੇ ਕਦਾਈਂ ਕਰ ਲੈਂਦੇ ਹਨ।

ਇਨ੍ਹਾਂ ਫ਼ੁਟ ਓਵਰਬ੍ਰਿਜਾਂ ਵਿਚੋਂ ਪਹਿਲਾਂ ਫ਼ੇਜ਼-7 ਵਿਚ ਮੁੱਖ ਪਾਰਕ (ਜਿਥੇ ਪਟਿਆਲਾ ਯੂਨੀਵਰਸਟੀ ਦੀ ਐਕਸਟੈਂਸ਼ਨ ਲਾਇਬਰੇਰੀ ਹੈ) ਦੇ ਨਾਲ ਬਣਿਆ ਹੋਇਆ ਹੈ ਜਦਕਿ ਦੂਜਾ ਫ਼ੇਜ਼-7 ਅਤੇ ਫ਼ੇਜ਼-3ਬੀ2 ਨੂੰ ਵੰਡਦੀ ਸੜਕ ਉਤੇ ਫ਼ੇਜ਼3ਬੀ2 ਵਾਲੇ ਪਾਸੇ ਬਣਿਆ ਹੈ। ਤੀਜਾ ਫ਼ੁਟ ਓਵਰਬ੍ਰਿਜ ਰੋਜ਼ ਗਾਰਡਨ ਦੇ ਨੇੜੇ ਬਣਿਆ ਹੋਇਆ ਹੈ ਤਾਂ ਚੌਥਾ ਫ਼ੁਟ ਓਵਰਬ੍ਰਿਜ ਫ਼ੇਜ਼ 3 ਅਤੇ 5 ਦੀਆਂ ਲਾਈਟਾਂ 'ਤੇ ਬਣਿਆ ਹੋਇਆ ਹੈ। ਜਦ ਤਕ ਇਹ ਚਾਰ ਫ਼ੁਟ ਓਵਰਬ੍ਰਿਜ ਗਮਾਡਾ ਕੋਲ ਸਨ ਤਾਂ ਇਨ੍ਹਾਂ ਦੀ ਕੋਈ ਵਰਤੋਂ ਨਹੀਂ ਸੀ ਹੁੰਦੀ ਅਤੇ ਮੋਹਾਲੀ ਦੇ ਲੋਕ ਵੀ ਇਸ ਨੂੰ ਪੈਸੇ ਦੀ ਬਰਬਾਦੀ ਹੀ ਦਸਦੇ ਸਨ। ਨਗਰ ਨਿਗਮ ਕੋਲ ਆਉਣ ਤੋਂ ਬਾਅਦ ਇਨ੍ਹਾਂ ਦੀ ਵਰਤੋਂ ਬਸ ਇੰਨੀ ਕੁ ਹੋਣ ਲੱਗੀ ਹੈ ਕਿ ਇਨ੍ਹਾਂ ਉਤੇ ਵੱਡੇ ਹੋਰਡਿੰਗ ਲਗਾਉਣ ਲਈ ਨਿਗਮ ਨੇ ਇਨ੍ਹਾਂ ਨੂੰ ਠੇਕੇ 'ਤੇ ਦੇ ਦਿਤਾ ਹੈ ਅਤੇ ਇਸ ਰਾਹੀਂ ਨਿਗਮ ਨੂੰ ਲਗਭਗ ਇਕ ਕਰੋੜ ਰੁਪਏ ਸਾਲਾਨਾ ਦੀ ਆਮਦਨ ਹੋ ਰਹੀ ਹੈ।ਲਿਫ਼ਟ ਲਗਾਉਣ ਦੀ ਵੀ ਬਣੀ ਸੀ ਸਕੀਮ : ਇਨ੍ਹਾਂ ਫ਼ੁਟ ਓਵਰਬ੍ਰਿਜਾਂ ਦੀ ਵਰਤੋਂ ਵਧਾਉਣ ਲਈ ਸੀਨੀਅਰ ਸਿਟੀਜਨਾਂ ਲਈ ਉਪਰ ਚੜ੍ਹਨ ਵਾਸਤੇ ਲਿਫ਼ਟ ਲਗਾਉਣ ਦੀ ਵੀ ਸਕੀਮ ਬਣਾਈ ਗਈ ਸੀ ਪਰ ਇਸ ਨੂੰ ਰੱਦ ਕਰ ਦਿਤਾ ਗਿਆ ਕਿਉਂਕਿ ਲਿਫ਼ਟਾਂ ਲਗਾਉਣ 'ਤੇ ਹੋਣ ਵਾਲੇ ਖ਼ਰਚੇ ਅਤੇ ਇਨ੍ਹਾਂ ਦੇ ਰੱਖ-ਰਖਾਓ 'ਤੇ ਜਿੰਨਾ ਖ਼ਰਚਾ ਆਉਣਾ ਸੀ, ਓਨੇ ਲੋਕ ਫਿਰ ਵੀ ਇਸ ਦੀ ਵਰਤੋਂ ਨਹੀਂ ਸੀ ਕਰਨ ਲੱਗੇ।ਇਸ ਮਾਮਲੇ ਵਿਚ ਨਗਰ ਨਿਗਮ ਮੋਹਾਲੀ ਦੇ ਇਕ ਅਧਿਕਾਰੀ ਨੇ ਕਿਹਾ ਕਿ ਇਨ੍ਹਾਂ ਫ਼ੁਟ ਓਵਰਬ੍ਰਿਜਾਂ ਨੂੰ ਬਣਾਏ ਜਾਣ ਵੇਲੇ ਜੋ ਪਲਾਨਿੰਗ ਉਸ ਵੇਲੇ ਦੇ ਗਮਾਡਾ ਅਧਿਕਾਰੀਆਂ ਦੇ ਦਿਮਾਗ ਵਿਚ ਹੋਣੀ ਹੈ, ਉਹ ਤਾਂ ਸਫ਼ਲ ਨਹੀਂ ਹੋ ਸਕੀ ਪਰ ਹੁਣ ਇਹ ਨਿਗਮ ਵਾਸਤੇ ਕਮਾਈ ਦਾ ਸਾਧਨ ਬਣ ਗਏ ਹਨ।