ਚੰਡੀਗੜ੍ਹ, 8 ਫ਼ਰਵਰੀ (ਸਸਸ): ਆਪਣੇ ਬੇਬਾਕ ਅਤੇ ਧੜੱਲੇਦਾਰ ਭਾਸ਼ਣ ਸ਼ੈਲੀ ਲਈ ਜਾਣੇ ਜਾਂਦੇ ਪੰਜਾਬ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਸ੍ਰੀ ਸੁਨੀਲ ਜਾਖੜ ਨੇ ਅੱਜ ਲੋਕ ਸਭਾ ਵਿਚ ਅਪਣੇ ਪਹਿਲੇ ਭਾਸ਼ਣ ਦੌਰਾਨ ਮੋਦੀ ਸਰਕਾਰ 'ਤੇ ਤਿੱਖਾ ਹਮਲਾ ਬੋਲਦਿਆਂ ਕਿਹਾ ਕਿ ਕੇਂਦਰ ਸਰਕਾਰ ਕਿਸਾਨ-ਕਿਸਾਨ ਦਾ ਰਾਗ ਅਲਾਪ ਰਹੀ ਹੈ ਪਰ ਦੇਸ਼ ਦਾ ਕਿਸਾਨ ਪੁਛ ਰਿਹਾ ਹੈ ਕਿ ਅਸਲ ਵਿਚ ਬਜਟ ਵਿਚ ਉਹ ਹੈ ਕਿਥੇ।ਜਾਖੜ ਨੇ ਅਪਣੇ ਭਾਸ਼ਣ ਵਿਚ ਕਿਹਾ ਕਿ ਵਿੱਤ ਮੰਤਰੀ ਨੇ ਕਿਸਾਨਾਂ ਨੂੰ ਉਨ੍ਹਾਂ ਦੀ ਲਾਗਤ 'ਤੇ ਡੇਢ ਗੁਣਾ ਭਾਅ ਦੇਣ ਦਾ ਗੱਲ ਕੀਤੀ ਹੈ ਅਤੇ ਸੱਤਾ ਪੱਖ ਲਗਾਤਾਰ ਇਸ ਨੂੰ ਸਰਕਾਰ ਦੀ ਵੱਡੀ ਪ੍ਰਾਪਤੀ ਦੱਸ ਰਿਹਾ ਹੈ ਪਰ ਦੇਸ਼ ਦਾ ਕਿਸਾਨ ਪੁੱੱਛ ਰਿਹਾ ਹੈ ਕਿ ਕੀ ਉਸ ਨੂੰ ਕਿਹੜੀ ਲਾਗਤ ਦਾ ਡੇਢ ਗੁਣਾ ਭਾਅ ਦੇਣ ਦੀ ਗੱਲ ਹੋ ਰਹੀ ਹੈ, ਏ.2 ਅਤੇ ਕਿਸਾਨ ਦੀ ਮਜ਼ਦੂਰੀ ਦੇ ਜੋੜ ਦੀ ਲਾਗਤ ਦਾ ਜਾਂ ਉਸ ਦੇ ਸਮੁੱਚੇ ਖ਼ਰਚਿਆਂ ਦੇ ਡੇਢ ਗੁਣਾ ਦਾ।  ਜਾਖੜ ਨੇ ਕਿਹਾ ਕਿ ਪਿਛਲੇ ਦਿਨਾਂ ਦੌਰਾਨ ਝੋਨੇ ਦੀ ਪਰਾਲੀ ਦੇ ਧੂੰਏ ਤੇ ਦਿੱਲੀ ਵਿਚ ਬਹੁਤ ਸਿਆਸਤ ਹੋ ਰਹੀ ਸੀ ਅਤੇ ਪੰਜਾਬ ਹਰਿਆਣਾ ਦੇ ਕਿਸਾਨ ਨੂੰ ਇਸ ਦੇ ਲਈ ਕੋਸਿਆ ਜਾ ਰਿਹਾ ਸੀ ਪਰ ਉਨ੍ਹਾਂ ਸਵਾਲ ਕੀਤਾ ਕਿ ਕੀ ਦਿੱਲੀ ਤਕ ਦੇਸ਼ ਭਰ ਵਿਚ ਆਤਮ ਹਤਿਆਵਾਂ ਕਰ ਰਹੇ ਕਿਸਾਨਾਂ ਦੀਆਂ ਚਿਖਾਵਾਂ ਦੀ ਅੱਗ ਦਾ ਧੂੰਆ ਨਹੀਂ ਪੁੱਜ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪਿਛਲੇ 3 ਸਾਲਾਂ ਵਿਚ ਦੇਸ਼ ਵਿਚ 36000 ਕਿਸਾਨ ਆਤਮ ਹਤਿਆਵਾਂ ਕਰ ਚੁਕੇ ਹਨ ਅਤੇ ਹਰ 45 ਮਿੰਟ ਬਾਅਦ ਦੇਸ਼ ਦਾ ਇਕ ਕਿਸਾਨ ਮੋਦੀ ਸਰਕਾਰ ਦੀਆਂ ਗ਼ਲਤ ਨੀਤੀਆਂ ਕਾਰਨ ਚੜ੍ਹੇ ਕਰਜ਼ ਕਾਰਨ ਆਤਮ ਹਤਿਆ ਕਰਨ ਲਈ ਮਜਬੂਰ ਹੋ ਰਿਹਾ ਹੈ।  

ਜਾਖੜ ਨੇ ਮੋਦੀ ਸਰਕਾਰ ਦੀ ਪਾਕਿਸਤਾਨ ਪ੍ਰਤੀ ਨੀਤੀ 'ਤੇ ਵੀ ਵਾਰ ਕਰਦਿਆਂ ਕਿਹਾ ਕਿ ਨਿਯੰਤਰਣ ਰੇਖਾ ਅਤੇ ਸਰੱਹਦ 'ਤੇ ਲਗਾਤਾਰ ਜਵਾਨ ਸ਼ਹੀਦ ਹੋ ਰਹੇ ਹਨ। ਉਨ੍ਹਾਂ ਕੇਂਦਰ ਸਰਕਾਰ ਨੂੰ ਵੰਗਾਰਦਿਆਂ ਕਿਹਾ ਕਿ ਚਾਹੇ ਮੋਦੀ ਸਰਕਾਰ ਪਾਕਿਸਤਾਨ ਨੂੰ ਪ੍ਰੇਮ ਪੱਤਰ ਲਿਖੇ ਤੇ ਚਾਹੇ 56 ਇੰਚ ਦੀ ਛਾਤੀ ਵਿਖਾਵੇ ਪਰ ਪਾਕਿਸਤਾਨ ਨੂੰ ਸਖ਼ਤੀ ਨਾਲ ਗੋਲੀਬਾਰੀ ਤੋਂ ਵਰਜ਼ਿਆ ਜਾਣਾ ਚਾਹੀਦਾ ਹੈ।ਜਾਖੜ ਨੇ ਦੇਸ਼ ਵਿਚ ਵਪਾਰ ਕਰਨ ਦੀ ਸੌਖ ਅਤੇ ਜਿਊਣ ਦੀ ਸੌਖ ਦੇ ਕੇਂਦਰ ਸਰਕਾਰ ਦੇ ਬਿਆਨਾਂ 'ਤੇ ਵੀ ਤਿੱਖਾ ਹਮਲਾ ਕਰਦਿਆਂ ਕਿਹਾ ਕਿ ਅੱਜ ਦੇਸ਼ ਦਾ ਸਮਾਜਿਕ ਮਾਹੌਲ ਗੰਧਲਾ ਕੀਤਾ ਜਾ ਰਿਹਾ ਹੈ ਅਤੇ ਦੇਸ਼ ਵਿਚ ਐਸ.ਸੀ. ਅਤੇ ਘੱਟ ਗਿਣਤੀ ਲੋਕਾਂ 'ਤੇ ਅਤਿਆਚਾਰ ਹੋ ਰਹੇ ਹਨ। ਅਜਿਹੇ ਮਾਹੌਲ ਵਿਚ ਕੌਣ ਇਥੇ ਨਿਵੇਸ਼ ਲਈ ਅੱਗੇ ਆਵੇਗਾ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਦਾ ਕੁਰਬਾਨੀਆਂ ਨਾਲ ਭਰਪੂਰ ਇਤਿਹਾਸ ਰਿਹਾ ਹੈ ਅਤੇ  ਇਸ ਨੂੰ ਕੋਈ ਬਦਲ ਨਹੀਂ ਸਕਦਾ ਹੈ। ਉਨ੍ਹਾਂ ਮੋਦੀ ਸਰਕਾਰ ਨੂੰ ਨਸੀਹਤ ਦਿਤੀ ਕਿ ਸਮਾਜਿਕ ਤਾਣੇ ਬਾਣੇ ਨੂੰ ਮਜ਼ਬੂਤ ਕੀਤੇ ਬਿਨਾਂ ਦੇਸ਼ ਦਾ ਸਰਵਪੱਖੀ ਵਿਕਾਸ ਸੰਭਵ ਨਹੀਂ ਹੈ।