ਬਰਨਾਲਾ, 11 ਸਤੰਬਰ (ਜਗਸੀਰ ਸਿੰਘ ਸੰਧੂ) : ਬਰਨਾਲਾ ਦੇ ਇਕ ਪ੍ਰਾਈਵੇਟ ਸਕੂਲ ਵਿਚੋਂ ਅਗ਼ਵਾ ਕੀਤੀ ਪਿੰਡ ਹਮੀਦੀ ਦੀ ਨਾਬਾਲਗ਼ ਲੜਕੀ ਅੱਜ ਰੱਖੜਾ ਨੇੜਿਉਂ ਅਜਨੌਦਾ ਖ਼ੁਰਦ ਤੋਂ ਬੇਹੋਸ਼ੀ ਦੀ ਹਾਲਤ 'ਚ ਮਿਲ ਗਈ ਹੈ ਅਤੇ ਪੁਲਿਸ ਲੜਕੀ ਨੂੰ ਬਰਨਾਲਾ ਲੈ ਆਈ ਹੈ ਅਤੇ ਲੜਕੀ ਨੂੰ ਲਿਜਾਣ ਵਾਲੇ ਦਰਿੰਦੇ ਗਗਨਦੀਪ ਨੂੰ ਪਿੰਡ ਵਾਸੀਆਂ ਨੇ ਦਬੋਚ ਕੇ ਬਰਨਾਲਾ ਪੁਲਿਸ ਦੇ ਹਵਾਲੇ ਕਰ ਦਿਤਾ ਹੈ।
ਜ਼ਿਕਰਯੋਗ ਹੈ ਕਿ ਅਗ਼ਵਾਕਾਰ ਪਿੰਡ ਹਮੀਦੀ ਦੇ ਗੁਰਦੁਵਾਰਾ ਸਾਹਿਬ ਵਿਖੇ ਬੱਚਿਆਂ ਨੂੰ ਗਤਕਾ ਸਿਖਾਉਂਦਾ ਸੀ ਅਤੇ ਗ਼ਲਤ ਹਰਕਤਾਂ ਕਰ ਕੇ ਉਸ ਨੂੰ ਗੁਰਦੁਵਾਰਾ ਵਿਚੋਂ ਕਢਣ ਕਰ ਕੇ ਉਹ ਰੰਜਿਸ਼ਵਸ ਗੁਰਦੁਵਾਰਾ ਸਾਹਿਬ ਦੀ ਪ੍ਰਬੰਧਕੀ ਕਮੇਟੀ ਦੇ ਇਕ ਮੈਂਬਰ ਦੀ ਨਾਬਾਲਗ਼ ਲੜਕੀ 4 ਸਤੰਬਰ 2017 ਨੂੰ ਬਰਨਾਲਾ ਦੇ ਇਕ ਪ੍ਰਾਈਵੇਟ ਸਕੂਲ ਤੋਂ ਝੂਠ ਬੋਲ ਕੇ ਲੈ ਗਿਆ ਅਤੇ ਕਈ ਥਾਂ ਘੁਮਾਉਣ ਤੋਂ ਬਾਅਦ ਅਖੀਰ ਪਟਿਆਲਾ ਦੇ ਰੱਖੜਾ ਨੇੜਿਉਂ ਅਜਨੌਦਾ ਖ਼ੁਰਦ ਤੋਂ ਬੀਤੇ ਦਿਨ ਫੜਿਆ ਗਿਆ ਹੈ।
ਜਾਣਕਾਰੀ ਅਨੁਸਾਰ ਬੀਤੇ ਦਿਨ ਸੰਗਰੂਰ ਤੋਂ ਜਾ ਰਹੀ ਬੱਸ ਰਾਹੀਂ ਲੜਕੀ ਨੂੰ ਅਗ਼ਵਾ ਕਰਨ ਵਾਲਾ ਗਰਨਦੀਪ ਉਕਤ ਲੜਕੀ ਸਮੇਤ ਸਫ਼ਰ ਕਰ ਰਿਹਾ ਸੀ ਤਾਂ ਸੋਸ਼ਲ ਮੀਡੀਆ 'ਤੇ ਪਾਈਆਂ ਗਈਆਂ ਤਸਵੀਰਾਂ ਕਰ ਕੇ ਕੰਡਕਟਰ ਨੇ ਲੜਕੀ ਅਤੇ ਅਗ਼ਵਾਕਾਰ ਨੂੰ ਪਹਿਚਾਣ ਲਿਆ ਤੇ ਇਸ ਦੀ ਸੂਚਨਾ ਪੁਲਿਸ ਨੂੰ ਦੇ ਦਿਤੀ।
ਕੰਡਕਟਰ ਨੂੰ ਫ਼ੋਨ 'ਤੇ ਜਾਣਕਾਰੀ ਦਿੰਦਿਆਂ ਦੇਖ ਅਗ਼ਵਾਕਾਰ ਲੜਕੀ ਸਮੇਤ ਰੱਖੜਾ ਬੱਸ ਅੱਡੇ 'ਤੇ ਉਤਰ ਗਿਆ, ਪਰ ਕੰਡਕਟਰ ਨੇ ਉਥੇ ਬੱਸ ਅੱਡੇ 'ਤੇ ਹਾਜ਼ਰ ਅਪਣੇ ਕਿਸੇ ਜਾਣਕਾਰ ਦੀ ਡਿਊਟੀ ਲਗਾ ਦਿਤੀ ਕਿ ਉਹ ਪਤਾ ਰੱਖੇ ਇਹ ਕਿਧਰ ਜਾਂਦੇ ਹਨ। ਅਗ਼ਵਾਕਾਰ ਉਥੋਂ ਲੜਕੀ ਸਮੇਤ ਇਕ ਆਟੋ ਰਾਹੀ ਨਜ਼ਦੀਕੀ ਪਿੰਡ ਅਜਨੌਦਾ ਖ਼ੁਰਦ ਅਪਣੇ ਕਿਸੇ ਰਿਸ਼ਤੇਦਾਰ ਸੁਖਦਿੰਵਰ ਕੌਰ ਸੁੱਖੋ ਦੇ ਘਰ ਚਲਾ ਗਿਆ। ਇਸ 'ਤੇ ਕੰਡਕਟਰ ਵਲੋਂ ਕੀਤੇ ਫ਼ੋਨ ਅਤੇ ਉਕਤ ਆਟੋ ਵਾਲੇ ਕੋਲੋਂ ਮਿਲੀ ਜਾਣਕਾਰੀ ਚਲਦਿਆਂ ਲੜਕੀ ਦੇ ਪਰਵਾਰਕ ਮੈਂਬਰ ਅਜਨੌਦਾ ਖ਼ੁਰਦ 'ਸੁੱਖੋ' ਦੇ ਘਰ ਜਾ ਪੁਹੰਚੇ ਤਾਂ ਅਗ਼ਵਾਕਾਰ ਲੜਕੀ ਨੂੰ ਉਥੇ ਲੁਕੋ ਕੇ ਆਪ ਫ਼ਰਾਰ ਹੋ ਗਿਆ ਤੇ ਉਕਤ ਘਰ ਵਾਲੇ ਵੀ ਇਕ ਔਰਤ ਨੂੰ ਘਰੇ ਛੱਡ ਬਾਕੀ ਇਧਰ ਉਧਰ ਹੋ ਗਏ।
ਪਹਿਲਾਂ ਤਾਂ ਘਰ ਵਿਚ ਮੌਜੂਦ ਔਰਤ ਨੇ ਆਨਾਕਾਨੀ ਕੀਤੀ ਅਤੇ ਦਰਵਾਜ਼ਾ ਨਹੀਂ ਖੋਲਿਆ, ਪਰ ਐਨੇ ਵਿਚ ਹੀ ਬਰਨਾਲਾ ਪੁਲਿਸ ਵੀ ਮੌਕੇ 'ਤੇ ਪੁਹੰਚ ਗਈ ਅਤੇ ਪੁਲਿਸ ਤੇ ਲੜਕੀ ਦੇ ਪਰਵਾਰਕ ਮੈਂਬਰਾਂ ਨੇ ਉਸ ਘਰ ਵਿਚ ਵੜ ਕੇ ਤਲਾਸ਼ੀ ਲਈ ਤਾਂ ਲੱਤਾਂ ਬਾਹਾਂ ਰੱਸੀ ਨਾਲ ਬੰਨ੍ਹੀਆਂ ਹੋਈਆਂ ਅਤੇ ਮੂੰਹ 'ਤੇ ਕਪੜਾ ਬੰਨ੍ਹੇ ਹੋਏ ਨੀਮ ਬੇਹੋਸ਼ੀ ਦੀ ਹਾਲਤ ਵਿਚ ਲੜਕੀ ਘਰ ਦੇ ਅੰਦਰੋਂ ਹੀ ਇਕ ਤੂੜੀ ਵਾਲੇ ਕਮਰੇ ਵਿਚੋਂ ਮਿਲ ਗਈ। ਪੁਲਿਸ ਨੇ ਤੁਰਤ ਲੜਕੀ ਨੂੰ ਡਾਕਟਰੀ ਸਹਾਇਤਾ ਲਈ ਭੇਜ ਦਿਤਾ। ਇਸ ਦੌਰਾਨ ਹੀ ਹਲਕਾ ਮਹਿਲ ਕਲਾਂ ਦੇ 'ਆਪ' ਵਿਧਾਇਕ ਕੁਲਵੰਤ ਸਿੰਘ ਪੰਡੋਰੀ ਵੀ ਅਪਣੇ ਸਾਥੀਆਂ ਨਾਲ ਉਥੇ ਪਹੁੰਚ ਗਏ ਅਤੇ ਉਨ੍ਹਾਂ ਨੇ ਪੁਲਿਸ ਦੀ ਸਹਾਇਤਾ ਨਾਲ ਅਜਨੌਦਾ ਖ਼ੁਰਦ ਦੇ 'ਆਪ' ਵਰਕਰਾਂ ਤੇ ਪਿੰਡ ਵਾਸੀਆਂ ਨੂੰ ਨਾਲ ਲੈ ਕੇ ਉਕਤ ਅਗ਼ਵਾਕਾਰ ਦੀ ਪਿੰਡ ਵਿਚੋਂ ਤਲਾਸ਼ ਸ਼ੁਰੂ ਕਰ ਦਿਤੀ।
ਅਖ਼ੀਰ ਪਿੰਡ ਅਜਨੌਦਾ ਖ਼ੁਰਦ ਦੇ ਵਾਸੀਆਂ ਨੂੰ ਸ਼ਾਮ 4 ਕੁ ਵਜੇ ਅਗ਼ਵਾਕਾਰ ਪਿੰਡ ਦੇ ਨਜ਼ਦੀਕ ਇਕ ਝੋਨੇ ਦੇ ਖੇਤ ਵਿਚੋਂ ਲੁਕਿਆ ਹੋਇਆ ਮਿਲ ਗਿਆ ਅਤੇ ਪਿੰਡ ਵਾਸੀਆਂ ਨੇ ਉਸ ਨੂੰ ਦਬੋਚ ਕੇ ਬਰਨਾਲਾ ਪੁਲਿਸ ਹਵਾਲੇ ਕਰ ਦਿਤਾ। ਅਗ਼ਵਾਕਾਰ ਮੀਡੀਆ ਸਾਹਮਣੇ ਮੰਨ ਰਿਹਾ ਹੈ ਕਿ ਪਿੰਡ ਹਮੀਦੀ ਦੇ ਕੁੱਝ ਵਿਅਕਤੀਆਂ ਨੇ ਉਸ ਨੂੰ ਲੜਕੀ ਅਗ਼ਵਾ ਕਰਨ ਲਈ ਉਕਸਾਇਆ ਸੀ ਅਤੇ ਉਸ ਨੂੰ 30 ਹਜ਼ਾਰ ਰੁਪਏ ਦੀ ਮਾਲੀ ਮਦਦ ਕਰਨ ਦੇ ਨਾਲ-ਨਾਲ ਉਸ ਦੀ ਹੋਰ ਵੀ ਕਈ ਤਰ੍ਹਾਂ ਮਦਦ ਕੀਤੀ ਹੈ। ਉਧਰ ਡੀ.ਐਸ.ਪੀ ਬਰਨਾਲਾ ਰਾਜੇਸ਼ ਛਿੱਬਰ ਨੇ ਦਸਿਆ ਹੈ ਕਿ ਪੁਲਿਸ ਨੇ ਅਗ਼ਵਾਕਾਰ ਗਗਨਦੀਪ ਅਤੇ ਉਸ ਦੀ ਮਾਸੀ ਸੁਖਵਿੰਦਰ ਕੌਰ ਸੁੱਖੋ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ ਅਤੇ ਦੋਵਾਂ ਨੂੰ ਅਦਾਲਤ ਵਿਚ ਪੇਸ਼ ਕਰ ਕੇ ਉਨ੍ਹਾਂ ਦਾ ਪੁਲਿਸ ਰੀਮਾਂਡ ਲਿਆ ਜਾ ਸਕਦਾ ਹੈ ਤਾਕਿ ਇਸ ਮਾਮਲੇ 'ਚ ਸ਼ਾਮਲ ਹੋਰ ਲੋਕਾਂ ਸਬੰਧੀ ਪਤਾ ਲਗਾਇਆ ਜਾ ਸਕੇ।