ਅੰਮ੍ਰਿਤਸਰ: ਯੂਨਾਈਟਿਡ ਅਕਾਲੀ ਦਲ ਦੇ ਪ੍ਰਧਾਨ ਭਾਈ ਮੋਹਕਮ ਸਿੰਘ ਮੁਤਾਬਕ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਬੇਸ਼ੁਮਾਰ ਸੰਘਰਸ਼ਾਂ ਬਾਅਦ ਹੋਂਦ ਵਿਚ ਆਈ, ਅੰਗਰੇਜ਼ ਨੇ ਅਥਾਹ ਜੁਲਮ ਸਿੱਖਾਂ ਤੇ ਕੀਤੇ, ਸਿੱਖਾਂ ਨੇ ਸ਼ਹੀਦੀਆਂ ਦਿਤੀਆਂ, ਘੋੜਿਆਂ ਦੀਆਂ ਟਾਪਾਂ ਛਾਤੀਆਂ ਤੇ ਖਾਧੀਆਂ। ਰੇਲਾਂ ਹੇਠ ਸਿੱਖ ਆਏ, ਜੰਡਾਂ ਹੇਠ ਸਿੱਖ ਸਾੜੇ ਗਏ।
ਅੰਤ ਵਿਚ ਅੰਗਰੇਜ਼ ਸਰਕਾਰ ਨੂੰ ਝੁਕਣਾ ਪਿਆ ਜਿਸ ਨੇ ਸਿੱਖਾਂ ਦੀ ਮੰਗ ਮੰਨਦਿਆਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦਾ ਐਕਟ 1925 'ਚ ਬਣਾਇਆ ਪਰ ਬੜਾ ਅਫ਼ਸੋਸ ਹੈ ਕਿ ਕਾਂਗਰਸ, ਭਾਜਪਾ ਤੇ ਸ਼੍ਰੋਮਣੀ ਅਕਾਲੀ ਦਲ ਦੀ ਆਪਸੀ ਮਿਲੀਭੁਗਤ ਕਾਰਨ, ਇਸ ਦੀ ਚੋਣ ਪੰਜ ਸਾਲ ਬਾਅਦ ਨਹੀਂ ਹੋ ਰਹੀ ਤੇ ਚੋਣ ਕਮਿਸ਼ਨ ਅਜ਼ਾਦੀ ਨਾਲ ਫ਼ੈਸਲਾ ਕਰਨ 'ਚ ਅਸਮੱਰਥ ਰਿਹਾ ਹੈ। ਭਾਈ ਮੋਹਕਮ ਸਿੰਘ ਅਨੁਸਾਰ ਪੰਚਾਇਤਾਂ, ਕਾਲਜਾਂ, ਯੂਨੀਵਰਸਟੀਆਂ, ਬਲਾਕਾਂ, ਜ਼ਿਲ੍ਹਾ ਪ੍ਰੀਸ਼ਦ, ਨਗਰ ਨਿਗਮ, ਸੂਬਿਆਂ, ਲੋਕ ਸਭਾ, ਰਾਜ ਸਭਾ, ਰਾਸ਼ਟਰਪਤੀ ਚੋਣ ਆਦਿ ਦੀ ਚੋਣ ਪੰਜ ਸਾਲ ਬਾਅਦ ਹੋ ਜਾਂਦੀ ਹੈ ਪਰ ਚੋਣ ਕਮਿਸ਼ਨ ਸਿੱਖਾਂ ਦੀ ਸਿਰਮੌਰ ਸੰਸਥਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਚੋਣ ਜਾਣ ਬੁੱਝ ਕੇ ਨਹੀਂ ਕਰਵਾਉਦੀ। ਉਨ੍ਹਾਂ ਦੀ ਮੰਗ ਹੈ ਕਿ ਦੂਸਰੀਆਂ ਚੋਣਾਂ ਵਾਂਗ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਚੋਣ ਕਰਵਾਈ ਜਾਵੇ।
ਭਾਈ ਮੋਹਕਮ ਸਿੰਘ ਨੇ ਦੋਸ਼ ਲਾਇਆ ਕਿ ਅਕਾਲੀ ਭਾਜਪਾ ਅਤੇ ਕਾਂਗਰਸ ਰਲ ਕੇ ਸ਼੍ਰੋਮਣੀ ਕਮੇਟੀ ਨੂੰ ਬਰਬਾਦ ਕਰਨ ਤੇ ਤੁਲੀਆਂ ਹਨ। ਪਰ ਧਰਮ ਯੁੱਧ ਕਾਨਫ਼ਰੰਸ ਇਸ ਮਹਾਨ ਸੰਸਥਾ ਨੂੰ ਬਚਾਉਣਾ ਚਾਹੁੰਦੀ ਹੈ। ਉਨ੍ਹਾਂ ਕਿਹਾ ਕਿ ਕਾਨੂੰਨ ਦੀ ਉਲੰਘਣਾ ਕਾਨੂੰਨ ਧਾਰੀਆਂ ਵਲੋਂ ਹੋ ਰਹੀ ਹੈ। ਸ਼੍ਰੋਮਣੀ ਕਮੇਟੀ ਦੀ ਚੋਣ ਦਾ ਕੋਈ ਸਿਸਟਮ ਨਹੀਂ। ਜੇਕਰ ਕਾਨੂੰਨ ਬਣਾਇਆ ਹੈ ਤਾਂ ਲਾਗੂ ਕਰੋ ਜਾਂ ਕਾਨੂੰਨ ਪਾਸੇ ਕਰੋ ਤਾਂ ਜੋ ਸਿੱਖ ਕੌਮ ਕਬਜ਼ਾਧਾਰੀਆਂ ਨੂੰ ਬਾਦਲ ਪਿੰਡ ਛੱਡ ਆਵੇ।
ਉਨ੍ਹਾਂ ਕਿਹਾ ਕਿ ਚੋਣ ਹੋਣੀ ਚਾਹੀਦੀ ਹੈ ਭਾਵੇਂ ਮੁੜ ਬਾਦਲ ਦਲ ਇਸ ਤੇ ਕਾਬਜ਼ ਹੋ ਜਾਵੇ, ਸਾਨੂੰ ਕੋਈ ਇਤਰਾਜ਼ ਨਹੀਂ। ਅਸੀਂ ਸ਼੍ਰੋਮਣੀ ਕਮੇਟੀ ਨੂੰ ਚੋਣ ਸਿਸਟਮ ਅਧੀਨ ਲਿਆਉਣਾ ਚਾਹੁੰਦੇ ਹਾਂ ਤਾਂ ਜੋ ਇਸ ਦੇ ਮੈਂਬਰ ਤੇ ਹੋਰ ਅਹੁਦੇਦਾਰ ਸਿੱਖ ਕੌਮ ਪ੍ਰਤੀ ਜਵਾਬਦੇਹ ਹੋਣ।
ਉਨ੍ਹਾ ਕਿਹਾ ਕਿ 4 ਫ਼ਰਵਰੀ ਨੂੰ ਅੰਮ੍ਰਿਤਸਰ ਵਿਖੇ ਧਰਮ ਯੁੱਧ ਕਾਨਫ਼ਰੰਸ 'ਚ ਧਾਰਮਕ ਸ਼ਖ਼ਸੀਅਤਾਂ, ਬੁੱਧੀਜੀਵੀ, ਪੜ੍ਹਿਆ ਲਿਖਿਆ ਵਰਗ, ਆਮ ਜਨ ਸਾਧਾਰਣ ਅਤੇ ਮਹਾਂਪੁਰਖ ਸ਼ਾਮਲ ਹੋਣਗੇ ਤਾਂ ਜੋ ਸਿੱਖੀ ਦੇ ਨਿਘਾਰ ਨੂੰ ਠੱਲ੍ਹ ਪਾਉਣ ਲਈ ਰਾਜਨੀਤੀ ਘੜੀ ਜਾ ਸਕੇ।
