ਹਾਈ ਕੋਰਟ ਵਲੋਂ ਨੀਲਾਮੀ ਦਾ ਰੀਕਾਰਡ ਤਲਬ  
ਚੰਡੀਗੜ੍ਹ, 5 ਫ਼ਰਵਰੀ (ਨੀਲ ਭਲਿੰਦਰ ਸਿੰਘ) : ਸਾਬਕਾ ਮੰਤਰੀ ਸੋਹਣ ਸਿੰਘ ਠੰਡਲ ਦੇ ਪੁੱਤਰ ਨੂੰ ਸੱਤ ਸਾਲ ਲਈ ਸ਼ਾਮਲਾਤ ਜ਼ਮੀਨ ਕਥਿਤ ਰੂਪ ਵਿਚ ਗ਼ੈਰਕਾਨੂੰਨੀ ਤੌਰ 'ਤੇ ਠੇਕੇ ਉਤੇ ਦੇਣ ਦੇ ਦੋਸ਼ ਲੱਗੇ ਹਨ। ਮਾਮਲਾ ਪਹਿਲਾਂ ਹੀ ਹਾਈ ਕੋਰਟ ਪਹੁੰਚ ਚੁਕਾ ਹੈ ਜਿਸ ਉਤੇ ਹਾਈ ਕੋਰਟ ਦੇ ਡਵੀਜ਼ਨ ਬੈਂਚ ਨੇ ਜ਼ਮੀਨ ਦੀ ਨੀਲਾਮੀ ਦਾ ਰੀਕਾਰਡ ਤਲਬ ਕਰ ਲਿਆ ਹੈ।ਜਸਟਿਸ ਮਹੇਸ਼ ਗਰੋਵਰ ਅਤੇ ਜਸਟਿਸ  ਰਾਜਬੀਰ ਸਹਿਰਰਾਵ ਦੇ ਡਵੀਜ਼ਨ ਬੈਂਚ ਨੇ ਕਿਹਾ ਕਿ ਜ਼ਮੀਨ ਦੀ ਨੀਲਾਮੀ ਦੇ ਸਮੇਂ ਬਲਾਕ ਵਿਕਾਸ ਅਤੇ ਪੰਚਾਇਤ ਅਧਿਕਾਰੀ ਮੌਜੂਦ ਨਾ ਰਿਹਾ ਹੋਣ ਦਾ ਉਚੇਚਾ ਜ਼ਿਕਰ ਹੋ ਰਿਹਾ ਹੈ ਜਿਸ ਕਰ ਕੇ ਪਹਿਲਾਂ ਸੁਣਵਾਈ ਦੀ ਅਗਲੀ ਤਰੀਕ ਉਤੇ ਨੀਲਾਮੀ ਦਾ ਰੀਕਾਰਡ ਪੇਸ਼ ਕੀਤਾ ਜਾਵੇ। ਇਹ ਆਦੇਸ਼ ਕਰਮ ਸਿੰਘ ਨਾਮੀ ਵਿਅਕਤੀ ਦੁਆਰਾ ਪੰਜਾਬ ਸਰਕਾਰ  ਅਤੇ ਹੋਰ ਜੁਆਬਦਾਤਾਵਾਂ ਵਿਰੁਧ ਦਾਇਰ ਕੀਤੀ ਗਈ ਪਟੀਸ਼ਨ ਉਤੇ ਜਾਰੀ ਹੋਏ ਹਨ। ਬੈਂਚ ਦੇ ਸਾਹਮਣੇ ਪੇਸ਼ ਹੋਏ ਜਾਚਕ ਦੇ ਵਕੀਲ ਭਾਨੁ ਪ੍ਰਤਾਪ ਸਿੰਘ  ਨੇ ਦਲੀਲ਼ ਦਿਤੀ ਕਿ ਨੀਲਾਮੀ ਬਾਰੇ ਪਬਲੀਕੇਸ਼ਨ 'ਸਹੀ' ਤਰੀਕੇ ਨਾਲ ਨਹੀਂ ਕਰਵਾਈ ਗਈ। 

ਉਨ੍ਹਾਂ ਵਿਸਥਾਰ ਨਾਲ  ਦਸਦਿਆਂ ਕਿਹਾ ਕਿ ਜੇਕਰ ਇਕ ਅਖ਼ਬਾਰ ਵਿਚ ਇਸ ਬਾਰੇ ਪ੍ਰਕਾਸ਼ਨਾ ਵੀ ਕਰਵਾਈ ਗਈ  ਸੀ  ਤਾਂ ਨੀਲਾਮੀ ਵਾਲੀ ਜ਼ਮੀਨ ਦੇ ਵੇਰਵੇ ਨਹੀਂ ਦਿਤੇ ਗਏ। ਪੰਜਾਬ ਵਿਲੇਜ ਕਾਮਨ ਲੈਂਡ (ਰੈਗੂਲੇਸ਼ਨਜ) ਨਿਯਮਾਂ ਦਾ ਹਵਾਲਾ ਦਿੰਦੇ ਹੋਏ ਵਕੀਲ ਨੇ ਦਲੀਲ ਦਿਤੀ ਕਿ ਇਹ ਸਾਰਾ ਕੁੱਝ ਜੁਆਬਦਾਤਾ ਦੇ ਪੁੱਤਰ ਨੂੰ ਫ਼ਾਇਦਾ ਪਹੁੰਚਾਉਣ ਲਈ ਕੀਤਾ ਗਿਆ ਜੋ ਉਸ ਵੇਲੇ ਇਕ ਮੰਤਰੀ ਸੀ। ਵਕੀਲ ਨੇ ਬੈਂਚ ਨੂੰ ਕਿਹਾ ਕਿ ਇਹ ਸ਼ਾਮਲਾਟ ਦੀ 21 ਏਕੜ ਭੂਮੀ ਹੁਸ਼ਿਆਰਪੁਰ ਜ਼ਿਲ੍ਹੇ ਦੀ ਗੜ੍ਹਸ਼ੰਕਰ ਤਹਿਸੀਲ ਦੇ ਮਾਰੁਲਾ ਪਿੰਡ ਵਿਚ ਸਥਿਤ ਹੈ। 27 ਫ਼ਰਵਰੀ, 2015 ਨੂੰ ਇਸ ਨੂੰ ਗ਼ੈਰਕਾਨੂੰਨੀ ਤੌਰ ਉਤੇ ਨੀਲਾਮੀ ਰਾਹੀਂ ਠੇਕੇ ਉਤੇ ਲਿਆ ਗਿਆ ਸੀ।  ਅਦਾਲਤ ਨੂੰ  ਇਹ ਵੀ  ਕਿਹਾ ਗਿਆ ਕਿ ਤਤਕਾਲੀ ਮੰਤਰੀ ਸੋਹਣ ਸਿੰਘ  ਠੰਡਲ ਦੇ ਪੁੱਤਰ ਰਵਿੰਦਰ ਸਿੰਘ ਠੰਡਲ ਦੇ ਪੱਖ ਵਿਚ ਨੀਲਾਮੀ ਕਰਨ ਲਈ  ਨਿਯਮਾਂ ਦੀ ਉਲੰਘਣਾ ਕੀਤੀ ਗਈ ਸੀ। ਇਹ ਪਟੀਸ਼ਨ ਸਾਲ 2016 ਵਿਚ ਦਰਜ ਕੀਤੀ ਗਈ ਸੀ ਜਦ ਠੰਡਲ ਅਕਾਲੀ ਦਲ ਦੀ  ਅਗਵਾਈ ਵਾਲੀ ਪੰਜਾਬ ਸਰਕਾਰ ਵਿਚ ਮੰਤਰੀ ਸਨ। ਇਹ ਮਾਮਲਾ ਹੁਣ ਅਪ੍ਰੈਲ ਦੇ ਦੂਜੇ ਹਫ਼ਤੇ ਵਿਚ ਅਗਲੀ ਸੁਣਵਾਈ ਲਈ ਆਵੇਗਾ।