ਸਾਬਕਾ ਖੁਰਾਕ ਅਤੇ ਸਪਲਾਈ ਮੰਤਰੀ ਪ੍ਰਦਿਯੂਮਨ ਸਿੰਘ ਤੋਮਰ ਦੇ ਪੁੱਤਰ ਨੇ ਡਿਊਟੀ ਕਰ ਰਹੇ ਪੁਲਿਸ ਜਵਾਨਾਂ ਨੂੰ ਸੜਕ 'ਤੇ ਧਮਕਾਇਆ।
ਗਵਾਲੀਅਰ: ਕੋਰੋਨਾ ਦੇ ਦੌਰ ਵਿਚ ਪੁਲਿਸ ਦੇ ਜਵਾਨ ਦਿਨ-ਰਾਤ ਡਿਊਟੀ ਕਰ ਰਹੇ ਹਨ। ਇਸ ਦੌਰਾਨ ਸਾਬਕਾ ਖੁਰਾਕ ਅਤੇ ਸਪਲਾਈ ਮੰਤਰੀ ਪ੍ਰਦਿਯੂਮਨ ਸਿੰਘ ਤੋਮਰ ਦੇ ਪੁੱਤਰ ਨੇ ਡਿਊਟੀ ਕਰ ਰਹੇ ਪੁਲਿਸ ਜਵਾਨਾਂ ਨੂੰ ਸੜਕ 'ਤੇ ਧਮਕਾਇਆ।
Photo
ਭਾਜਪਾ ਨੇਤਾ ਜਯੋਤੀਰਾਦਿੱਤਿਆ ਸਿੰਧਿਆ ਦੇ ਕਰੀਬੀ ਮੰਨੇ ਜਾਣ ਵਾਲੇ ਅਤੇ ਸਾਬਕਾ ਮੰਤਰੀ ਨੇ ਪੁਲਿਸ ਕਰਮਚਾਰੀਆਂ ਨਾਲ ਬਹਿਸ ਕਰਨ 'ਤੇ ਅਪਣੇ ਪੁੱਤਰ ਨੂੰ 1 ਘੰਟੇ ਲਈ ਨਗਰਪਾਲਿਕਾ ਕਰਮਚਾਰੀਆਂ ਦੇ ਨਾਲ ਕੂੜਾ ਚੁੱਕਣ ਦੀ ਸਜ਼ਾ ਦਿੱਤੀ। ਇਸ ਦੇ ਨਾਲ ਹੀ ਲੌਕਡਾਊਨ ਦੌਰਾਨ ਤੈਨਾਤ ਪੁਲਿਸ ਕਰਮਚਾਰੀਆਂ ਨਾਲ ਬਹਿਸ ਕਰਨ ਨੂੰ ਲੈ ਕੇ ਮਾਫੀ ਮੰਗਣ ਲਈ ਕਿਹਾ।
Photo
ਉਹਨਾਂ ਦੇ ਲੜਕੇ ਨੇ ਡਿਊਟੀ ਕਰਨ ਵਾਲੇ ਪੁਲਿਸ ਮੁਲਾਜ਼ਮਾਂ ਨਾਲ ਬਹਿਸ ਕੀਤੀ ਸੀ ਕਿਉਂਕਿ ਪੁਲਿਸ ਨੇ ਉਸ ਨੂੰ ਲੌਕਡਾਊਨ ਦੌਰਾਨ ਬਿਨਾਂ ਮਾਸਕ ਦੇ ਘੁੰਮਣ ਨੂੰ ਲੈ ਕੇ ਸਵਾਲ ਕੀਤਾ ਸੀ। ਵੀਰਵਾਰ ਨੂੰ ਸੋਸ਼ਲ ਮੀਡੀਆ 'ਤੇ ਇਕ ਵੀਡੀਆ ਵਾਇਰਲ ਹੋਈ ਸੀ ਜਿਸ ਵਿਚ ਸਾਬਕਾ ਮੰਤਰੀ ਦਾ ਲੜਕਾ ਰਿਪੁਦਮਨ ਕਾਂਸਟੇਬਲ ਨਾਲ ਬਹਿਸ ਕਰ ਰਿਹਾ ਸੀ।
Photo
ਰਿਪੁਦਮਨ ਨੇ ਧਮਕੀ ਦਿੱਤੀ ਕਿ ਕਾਂਸਟੇਬਲ ਨੂੰ ਬੰਗਲੇ 'ਤੇ ਬੁਲਾਓ ਅਤੇ ਦੱਸੋ ਕਿ ਮੈਂ ਕੌਣ ਹਾਂ। ਬਾਅਦ ਵਿਚ ਪ੍ਰਦਿਯੂਮਨ ਸਿੰਘ ਤੋਮਰ ਆਪਣੇ ਬੇਟੇ ਨੂੰ ਉਸੇ ਜਗ੍ਹਾ ਲੈ ਗਏ ਜਿਥੇ ਪੁਲਿਸ ਵਾਲਿਆਂ ਨਾਲ ਬਹਿਸ ਹੋਈ ਸੀ। ਉਹਨਾਂ ਨੇ ਪੁੱਤਰ ਦੇ ਵਤੀਰੇ ਲਈ ਪੁਲਿਸ ਵਾਲਿਆਂ ਤੋਂ ਮੁਆਫੀ ਮੰਗੀ ਅਤੇ ਜ਼ੁਰਮਾਨਾ ਵੀ ਅਦਾ ਕੀਤਾ।
