4 ਲੱਖ ਡਾਲਰ ਦੇ 450 ਤੋਂ ਜ਼ਿਆਦਾ ਕਰੈਡਿਟ ਕਾਰਡ ਅਤੇ ਚੈੱਕ ਬਰਾਮਦ
- ਕਈਆਂ ਨੂੰ ਕਢਿਆ ਜਾ ਸਕਦੈ ਕੈਨੇਡਾ ਤੋਂ ਬਾਹਰ
8 Punjabi youths arrested in mail theft case Canada News : ਡਾਕ ਰਾਹੀਂ ਆਏ ਕਰੈਡਿਟ ਕਾਰਡ ਅਤੇ ਚੈੱਕ ਚੋਰੀ ਦੇ ਮਾਮਲੇ ’ਚ ਕੈਨੇਡਾ ਦੀ ਪੁਲਿਸ ਨੇ 8 ਪੰਜਾਬੀ ਮੂਲ ਦੇ ਲੋਕਾਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਉਨ੍ਹਾਂ ਉਤੇ 300 ਤੋਂ ਵੱਧ ਦੋਸ਼ ਲਗਾਏ ਗਏ ਹਨ। ਸੀ.ਟੀ.ਵੀ. ਨਿਊਜ਼ ਦੀ ਰੀਪੋਰਟ ਮੁਤਾਬਕ ਪੀਲ ਪੁਲਿਸ ਨੇ ਲੋਕਾਂ ਦੇ ਘਰਾਂ ਬਾਹਰ ਡਾਕ ਬਕਸੇ ਵਿਚੋਂ ਚੋਰੀ ਕੀਤੀਆਂ 450 ਤੋਂ ਵੱਧ ਡਾਕਾਂ ਨੂੰ ਸ਼ੱਕੀਆਂ ਕੋਲੋਂ ਬਰਾਮਦ ਕਰ ਲਿਆ ਹੈ। ਇਨ੍ਹਾਂ ਅੰਦਰ ਕ੍ਰੈਡਿਟ ਕਾਰਡ ਅਤੇ ਚੈੱਕ ਹੁੰਦੇ ਸਨ ਜਿਨ੍ਹਾਂ ਦੀ ਕੁੱਲ ਕੀਮਤ ਲਗਭਗ 400,000 ਕੈਨੇਡੀਅਨ ਡਾਲਰ ਹੈ।
ਰੀਪੋਰਟ ਵਿਚ ਸ਼ੁਕਰਵਾਰ ਨੂੰ ਇਕ ਪੁਲਿਸ ਨਿਊਜ਼ ਰਿਲੀਜ਼ ਦੇ ਹਵਾਲੇ ਨਾਲ ਕਿਹਾ ਗਿਆ ਹੈ, ‘‘ਜਾਂਚ ਵਿਚ ਘਰਾਂ ਦੇ ਡਾਕ ਬਕਸਿਆਂ ਨੂੰ ਨਿਸ਼ਾਨਾ ਬਣਾਉਣ ਲਈ ਮਿਲ ਕੇ ਕੰਮ ਕਰਨ ਵਾਲੇ ਵਿਅਕਤੀਆਂ ਦੇ ਇਕ ਸਮੂਹ ਦਾ ਪ੍ਰਗਟਾਵਾ ਹੋਇਆ, ਜਿਸ ਦੇ ਨਤੀਜੇ ਵਜੋਂ ਸਿਲਸਿਲੇਵਾਰ ਚੋਰੀਆਂ ਹੋਈਆਂ ਅਤੇ ਲੋਕ ਪ੍ਰੇਸ਼ਾਨ ਹੋਏ।’’ ਪੀਲ ਪੁਲਿਸ, ਹਾਲਟਨ ਪੁਲਿਸ ਅਤੇ ਕੈਨੇਡਾ ਪੋਸਟ ਨੇ ਜਾਂਚ ਕਰਨ ਲਈ ਅਪ੍ਰੈਲ ਵਿਚ ‘ਪ੍ਰਾਜੈਕਟ ਅਨਡਿਲਿਵਰੇਬਲ’ ਨਾਮਕ ਇਕ ਸਾਂਝੀ ਕਾਰਵਾਈ ਸ਼ੁਰੂ ਕੀਤੀ ਸੀ।
ਰੀਪੋਰਟ ’ਚ ਕਿਹਾ ਗਿਆ ਹੈ ਕਿ ਜਾਂਚਕਰਤਾਵਾਂ ਨੇ ਸਤੰਬਰ ’ਚ ਵਾਰੰਟ ਜਾਰੀ ਕੀਤੇ ਸਨ, ਜਿਸ ਦੌਰਾਨ ਚੋਰੀ ਕੀਤੀਆਂ ਗਈਆਂ 465 ਚਿੱਠੀਆਂ ਜਿਵੇਂ ਕਿ 255 ਚੈੱਕ, 182 ਕ੍ਰੈਡਿਟ ਕਾਰਡ, 35 ਸਰਕਾਰੀ ਆਈ.ਡੀ. ਅਤੇ 20 ਗਿਫਟ ਕਾਰਡ ਬਰਾਮਦ ਕੀਤੇ ਗਏ ਸਨ। ਪੁਲਿਸ ਨੇ ਸ਼ੱਕੀ ਵਿਅਕਤੀਆਂ ਦੀ ਪਛਾਣ ਸੁਮਨਪ੍ਰੀਤ ਸਿੰਘ, ਗੁਰਦੀਪ ਚੱਠਾ, ਜਸ਼ਨਦੀਪ ਜਟਾਣਾ, ਹਰਮਨ ਸਿੰਘ, ਜਸਨਪ੍ਰੀਤ ਸਿੰਘ, ਮਨਰੂਪ ਸਿੰਘ, ਰਾਜਬੀਰ ਸਿੰਘ ਅਤੇ ਉਪਿੰਦਰਜੀਤ ਸਿੰਘ ਵਜੋਂ ਕੀਤੀ ਹੈ।
ਇਨ੍ਹਾਂ ਦੀ ਉਮਰ 21 ਤੋਂ 29 ਸਾਲ ਦੇ ਵਿਚਕਾਰ ਹੈ, ਜਿਨ੍ਹਾਂ ਨੂੰ ਸਮੂਹਕ ਤੌਰ ਉਤੇ 344 ਦੋਸ਼ਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ, ਜਿਸ ਵਿਚ ਚੋਰੀ ਅਤੇ ਅਪਰਾਧ ਰਾਹੀਂ ਪ੍ਰਾਪਤ ਕੀਤੀ ਜਾਇਦਾਦ ਦੇ ਕਬਜ਼ੇ ਦੇ ਕਈ ਦੋਸ਼ ਸ਼ਾਮਲ ਹਨ। ਪੁਲਿਸ ਦਾ ਕਹਿਣਾ ਹੈ ਕਿ ਉਹ ਕ੍ਰਾਊਨ ਅਟਾਰਨੀ ਦਫਤਰ ਅਤੇ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਨਾਲ ਮੁਲਜ਼ਮਾਂ ’ਚੋਂ ਕੁੱਝ ਵਿਦੇਸ਼ੀ ਨਾਗਰਿਕਾਂ ਨੂੰ ਦੇਸ਼ ਨਿਕਾਲਾ ਦੇਣ ਬਾਰੇ ਵਿਚਾਰ-ਵਟਾਂਦਰੇ ਕਰ ਰਹੇ ਹਨ। (ਪੀਟੀਆਈ)
