ਅਤਿਵਾਦੀ ਜਥੇਬੰਦੀਆਂ ਕੂ ਕਲੱਕਸ ਕਲਾਨ’ ਅਤੇ ਤਾਲਿਬਾਨ ਨਾਲ ਲਗਾ ਦਿਤੀ ਸੀ ਸਿੱਖ ਯੂਥ ਯੂ.ਕੇ. ਦੀ ਤਸਵੀਰ
ਲੰਡਨ: ਓਏਸਿਸ ਕਮਿਊਨਿਟੀ ਲਰਨਿੰਗ ਮਲਟੀ ਅਕੈਡਮੀ ਟਰੱਸਟ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਜੌਨ ਬਾਰਨਬੀ ਨੇ ਧਰਮ, ਅਤਿਵਾਦ ਅਤੇ ਕੱਟੜਵਾਦ ਬਾਰੇ ਸਲਾਈਡਾਂ ’ਚ ਇਕ ਸਿੱਖ ਨੌਜੁਆਨ ਸੰਗਠਨ ਬਾਰੇ ਸਲਾਈਡਾਂ ਸ਼ਾਮਲ ਕਰਨ ਲਈ ਸਿੱਖ ਭਾਈਚਾਰੇ ਨੂੰ ਹੋਏ ਅਪਰਾਧ ਲਈ ਮੁਆਫੀ ਮੰਗੀ ਹੈ।
ਸਿੱਖ ਫੈਡਰੇਸ਼ਨ ਯੂ.ਕੇ. ਦੇ ਕੌਮੀ ਪ੍ਰੈਸ ਸਕੱਤਰ ਜਸਪਾਲ ਸਿੰਘ ਨੇ ਕਿਹਾ ਕਿ ਕਈ ਸਿੱਖ ਜਥੇਬੰਦੀਆਂ ਅਤੇ ਸਿੱਖ ‘ਕੂ ਕਲੱਕਸ ਕਲਾਨ’ ਅਤੇ ਤਾਲਿਬਾਨ ਦੇ ਨਾਲ ਸਿੱਖ ਯੂਥ ਯੂ.ਕੇ. ਦੀ ਤਸਵੀਰ ਸ਼ਾਮਲ ਕੀਤੇ ਜਾਣ ਤੋਂ ਨਾਰਾਜ਼ ਹਨ ਅਤੇ ਉਨ੍ਹਾਂ ਨੇ ਓਏਸਿਸ ਕਮਿਊਨਿਟੀ ਲਰਨਿੰਗ ਮਲਟੀ ਅਕੈਡਮੀ ਟਰੱਸਟ ਨੂੰ ਚੁਨੌਤੀ ਦਿਤੀ ਹੈ।
ਉਨ੍ਹਾਂ ਕਿਹਾ, ‘‘ਓਏਸਿਸ ਕਮਿਊਨਿਟੀ ਲਰਨਿੰਗ ਟਰੱਸਟ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ ਨੇ ਸਿੱਖ ਕੌਂਸਲ ਯੂ.ਕੇ. ਨੂੰ ਲਿਖੀ ਚਿੱਠੀ ’ਚ ਪੁਸ਼ਟੀ ਕੀਤੀ ਹੈ ਕਿ ਇਤਰਾਜ਼ਯੋਗ ਸਲਾਈਡਾਂ ਨੂੰ ਹੁਣ ਹਟਾ ਦਿਤਾ ਗਿਆ ਹੈ।’’ ਓਏਸਿਸ ਕਮਿਊਨਿਟੀ ਲਰਨਿੰਗ ਮਲਟੀ ਅਕੈਡਮੀ ਟਰੱਸਟ ਆਮ ਤੌਰ ’ਤੇ ਬਹੁਤ ਉੱਚ ਸਨਮਾਨ ’ਚ ਰੱਖਿਆ ਜਾਂਦਾ ਹੈ ਅਤੇ 53 ਅਕੈਡਮੀਆਂ ਚਲਾਉਂਦਾ ਹੈ।
ਸਿੱਖ ਫੈਡਰੇਸ਼ਨ (ਯੂ.ਕੇ.) ਦੇ ਪ੍ਰਮੁੱਖ ਸਲਾਹਕਾਰ ਦਬਿੰਦਰਜੀਤ ਸਿੰਘ ਨੇ ਕਿਹਾ, ‘‘ਓਏਸਿਸ ਦੇ ਸੀ.ਈ.ਓ. ਲਈ ਮੁਆਫੀ ਮੰਗਣਾ ਅਤੇ ਸਲਾਈਡਾਂ ਹਟਾਉਣਾ ਕਾਫ਼ੀ ਨਹੀਂ ਹੈ। ਇਕ ਨਾਮਵਰ ਸਿੱਖ ਸੰਗਠਨ ਅਤੇ ਇਸ ਦੇ ਸੰਸਥਾਪਕ ਨੂੰ ਨਿਸ਼ਾਨਾ ਬਣਾਉਣਾ, ਜਿਸ ਦੀ ਤਸਵੀਰ ਸਲਾਈਡਾਂ ਵਿਚ ਵਿਖਾਈ ਦੇ ਰਹੀ ਹੈ, ਸਪੱਸ਼ਟ ਹੈ ਅਤੇ ਅਜਿਹਾ ਕਦੇ ਨਹੀਂ ਹੋਣਾ ਚਾਹੀਦਾ ਸੀ।’’