ਪਾਣੀ ਦੇ ਤੇਜ਼ ਵਹਾਅ ਵਿਚ ਰੁੜਿਆ ਪੁਲ
ਕੁੱਲੂ : ਹਿਮਾਚਲ ਪ੍ਰਦੇਸ਼ ਦੇ ਕੁੱਲੂ ਜ਼ਿਲ੍ਹੇ ਦੀ ਉਝੀ ਘਾਟੀ ਤੋਂ ਲੈ ਕੇ ਲਾਹੌਲ ਤੱਕ ਐਤਵਾਰ ਰਾਤ ਨੂੰ ਭਾਰੀ ਮੀਂਹ ਕਾਰਨ ਆਮ ਜਨਜੀਵਨ ਪ੍ਰਭਾਵਿਤ ਹੋਇਆ ਹੈ। ਮਨਾਲੀ ਦੇ ਪਲਚਾਣ ਨੇੜੇ ਸੇਰੀ ਨਾਲਾ 'ਚ ਦੁਪਹਿਰ 3 ਵਜੇ ਦੇ ਕਰੀਬ ਬੱਦਲ ਫਟਣ ਦੀ ਘਟਨਾ ਸਾਹਮਣੇ ਆਈ ਹੈ। ਬਿਆਸ ਦਰਿਆ ਦੇ ਪਾਣੀ ਦਾ ਪੱਧਰ ਵਧਣ ਕਾਰਨ ਪਿੰਡ ਸੋਲਾਂਗ ਲਈ ਬਣਾਇਆ ਲੱਕੜ ਦਾ ਪੁਲ ਰੁੜ੍ਹ ਗਿਆ ਹੈ।
cloudburst in Manali
ਇਸ ਤੋਂ ਇਲਾਵਾ ਪਲਚਾਣ ਅਤੇ ਬਹਿੰਗ ਦੇ ਆਸ-ਪਾਸ ਦਰਿਆ ਦੇ ਕੰਢੇ ਬਣੇ ਰੈਸਟੋਰੈਂਟ, ਕੋਠੀਆਂ ਸਮੇਤ ਕੁਝ ਵਾਹਨ ਵੀ ਨੁਕਸਾਨੇ ਗਏ ਹਨ। ਬੱਦਲ ਫਟਣ ਤੋਂ ਬਾਅਦ ਬਿਆਸ ਦਰਿਆ ਦੇ ਪਾਣੀ ਦਾ ਪੱਧਰ ਅਚਾਨਕ ਵਧਣ ਕਾਰਨ ਦਰਿਆ ਦੇ ਕੰਢੇ ਰਹਿੰਦੇ ਲੋਕ ਰਾਤ ਭਰ ਸੌਂ ਨਹੀਂ ਸਕੇ। ਉਪ ਮੰਡਲ ਅਧਿਕਾਰੀ ਮਨਾਲੀ ਸੁਰਿੰਦਰ ਠਾਕੁਰ ਨੇ ਦੱਸਿਆ ਕਿ ਪ੍ਰਸ਼ਾਸਨ ਨੇ ਨੁਕਸਾਨ ਦਾ ਜਾਇਜ਼ਾ ਲੈਣਾ ਸ਼ੁਰੂ ਕਰ ਦਿੱਤਾ ਹੈ।
ਇਸ ਦੇ ਨਾਲ ਹੀ ਲਾਹੌਲ ਵਿੱਚ ਵੀ ਮੀਂਹ ਕਾਰਨ ਆਮ ਜਨਜੀਵਨ ਪ੍ਰਭਾਵਿਤ ਹੋਇਆ ਹੈ। ਤੇਜ਼ ਮੀਂਹ ਕਾਰਨ ਤੇਲਿੰਗ ਨਾਲੇ ਵਿੱਚ ਹੜ੍ਹ ਆ ਗਿਆ। ਇਸ ਕਾਰਨ ਮਨਾਲੀ-ਲੇਹ ਸੜਕ ਕਰੀਬ ਪੰਜ ਘੰਟੇ ਬੰਦ ਰਹੀ। ਬਾਰਡਰ ਰੋਡ ਆਰਗੇਨਾਈਜ਼ੇਸ਼ਨ ਦੇ ਕਮਾਂਡਰ ਕਰਨਲ ਸ਼ਬਾਰੀਸ਼ ਵਾਚਲੀ ਨੇ ਦੱਸਿਆ ਕਿ ਸੋਮਵਾਰ ਸਵੇਰੇ ਕਰੀਬ 5 ਵਜੇ ਹੜ੍ਹ ਆਇਆ। ਹੁਣ ਮਲਬਾ ਹਟਾ ਕੇ ਸੜਕ ਨੂੰ ਖੋਲ੍ਹ ਦਿੱਤਾ ਗਿਆ ਹੈ।
