ਵਿਦੇਸ਼ੀ ਖਿਡਾਰੀਆਂ ਨੂੰ ਪਸੰਦ ਕਰਨ ਵਾਲੇ ਫੈਨਸ ਨੂੰ ਭਾਰਤ ਛੱਡਣ ਦੀ ਸਲਾਹ ਦੇਣ ਤੋਂ ਬਾਅਦ ਵਿਰਾਟ ਕੋਹਲੀ ਇਕ ਵਾਰ ਫਿਰ ਵਿਵਾਦ ਵਿਚ ਫਸ ਗਏ ਹਨ।...
ਹੈਦਰਾਬਾਦ : (ਪੀਟੀਆਈ) ਵਿਦੇਸ਼ੀ ਖਿਡਾਰੀਆਂ ਨੂੰ ਪਸੰਦ ਕਰਨ ਵਾਲੇ ਫੈਨਸ ਨੂੰ ਭਾਰਤ ਛੱਡਣ ਦੀ ਸਲਾਹ ਦੇਣ ਤੋਂ ਬਾਅਦ ਵਿਰਾਟ ਕੋਹਲੀ ਇਕ ਵਾਰ ਫਿਰ ਵਿਵਾਦ ਵਿਚ ਫਸ ਗਏ ਹਨ। ਇਸ ਵਾਰ ਕੋਹਲੀ ਅਪਣੇ ਖੇਡ ਨਹੀਂ ਸਗੋਂ ਅਪਣੀ ਐਡ ਨੂੰ ਲੈ ਕੇ ਮੁਸ਼ਕਲਾਂ ਵਿਚ ਫਸ ਗਏ ਹਨ। ਹੀਰੋ ਮੋਟੋ ਕਾਰਪ ਨੂੰ ਅਪਣੀ ਬਾਈਕ Xtreme 200 R ਦਾ ਉਹ ਇਸ਼ਤਿਹਾਰ ਵਾਪਸ ਲੈਣਾ ਪਿਆ ਹੈ ਜਿਸ ਵਿਚ ਖਿਡਾਰੀ ਵਿਰਾਟ ਕੋਹਲੀ ਖਤਰਨਾਕ ਤਰੀਕੇ ਨਾਲ ਬਾਈਕ ਚਲਾਉਂਦੇ ਨਜ਼ਰ ਆ ਰਹੇ ਸਨ। ਇਸ ਇਸ਼ਤਿਹਾਰ ਨੂੰ ਲੈ ਕੇ ਟ੍ਰਾਂਸਪੋਰਟ ਮੰਤਰਾਲਾ ਨੇ ਐਡਵਰਟਾਈਜ਼ਿੰਗ ਸਟੈਂਡਰਡ ਕਾਉਂਸਿਲ ਆਫ ਇੰਡੀਆ ਨੂੰ ਇਸ ਉਤੇ ਰੋਕ ਲਗਾਉਣ ਨੂੰ ਕਿਹਾ ਸੀ।
ਖਬਰਾਂ ਮੁਤਾਬਕ ਹੀਰੋ ਮੋਟੋਕਾਰਪ ਨੇ ਭਾਰਤੀ ਕ੍ਰਿਕੇਟ ਟੀਮ ਦੇ ਕਪਤਾਨ ਵਿਰਾਟ ਕੋਹਲੀ ਨੂੰ ਅਪਣਾ ਨਵਾਂ ਬ੍ਰਾਂਡ ਅੰਬੈਸਡਰ ਬਣਾਇਆ ਸੀ। ਕੰਪਨੀ ਨੇ ਵਿਰਾਟ ਦਾ ਨਾਮ ਹੀਰੋ ਦੇ ਐਡ ਕੈਂਪੇਨ ਵਿਚ ਉਨ੍ਹਾਂ ਨੂੰ ਬਾਈਕ Xtreme 200R ਲਈ ਜੋੜਿਆ। ਇਹ ਬਾਈਕ ਸਤੰਬਰ ਮਹੀਨੇ ਵਿਚ ਲਾਂਚ ਹੋਈ ਸੀ। ਵਿਰਾਟ ਕੋਹਲੀ ਬਰਾਂਡ ਸਮਰਥਨ ਦੇ ਜ਼ਰੀਏ 175 ਕਰੋਡ਼ ਰੁਪਏ ਕਮਾਉਂਦੇ ਹਨ। ਈਐਸਪੀ ਪ੍ਰਾਪਰਟੀਜ਼ ਅਤੇ ਸਪੋਰਟਸ ਪਾਵਰ ਦੀ ਰਿਪੋਰਟ ਦੇ ਮੁਤਾਬਕ ਵਿਰਾਟ ਕੋਹਲੀ 19 ਬਰਾਂਡ ਦੀ ਐਡ ਕਰਦੇ ਹਨ। ਕ੍ਰਿਕੇਟ ਦੇ ਸਮਰਥਨ ਵਿਚ 15.77 ਫ਼ੀ ਸਦੀ ਦਾ ਵਾਧਾ ਹੋਇਆ ਹੈ।
2016 ਵਿਚ ਵਿਰਾਟ ਕੋਹਲੀ 20 ਬ੍ਰਾਂਡ ਦੀ ਐਡ ਕਰਦੇ ਸਨ। ਇਸ ਨਾਲ ਉਨ੍ਹਾਂ ਨੇ 120 ਕਰੋਡ਼ ਰੁਪਏ ਦੀ ਕਮਾਈ ਕੀਤੀ ਸੀ। ਹਾਲਾਂਕਿ, 2017 ਵਿਚ ਉਨ੍ਹਾਂ ਨੇ 19 ਬ੍ਰਾਂਡ ਦੀ ਐਡ ਕੀਤੀ। ਉਨ੍ਹਾਂ ਦੀ ਕਮਾਈ ਵਧ ਕੇ 150 ਕਰੋਡ਼ ਰੁਪਏ ਹੋ ਗਈ ਹੈ। ਟੀਮ ਇੰਡੀਆ ਦੇ ਕਪਤਾਨ ਵਿਰਾਟ ਕੋਹਲੀ ਇਸ ਸਮੇਂ ਦੁਨੀਆਂ ਦੇ ਸੱਭ ਤੋਂ ਵਿਅਸਤ ਖਿਡਾਰੀ ਹਸਤੀਆਂ ਵਿਚੋਂ ਇਕ ਹਨ।
ਇਕ ਪਾਸੇ ਤਾਂ ਉਹ ਲਗਾਤਾਰ ਕ੍ਰਿਕੇਟ ਖੇਡ ਰਹੇ ਹਨ ਤਾਂ ਦੂਜੇ ਪਾਸੇ ਐਡ ਦੀ ਦੁਨੀਆਂ ਵਿਚ ਵੀ ਉਨ੍ਹਾਂ ਦੀ ਹਾਜ਼ਰੀ ਲਗਾਤਾਰ ਵੱਧਦੀ ਜਾ ਰਹੀ ਹੈ। ਇਸ ਵਿਚ ਵਿਰਾਟ ਕੋਹਲੀ ਨੇ ਉਨ੍ਹਾਂ ਵਿਚਾਰਾਂ ਨੂੰ ਖਾਰਿਜ ਕੀਤਾ ਕਿ ਇਸ਼ਤਿਹਾਰਾਂ ਉਤੇ ਜ਼ਿਆਦਾ ਸਮਾਂ ਗੁਜ਼ਾਰਨਾ ਇਕ ਖਿਡਾਰੀ ਲਈ ਧਿਆਨ ਭੰਗ ਕਰਨ ਵਾਲਾ ਹੋ ਸਕਦਾ ਹੈ। ਕੋਹਲੀ ਕਈ ਬ੍ਰਾਂਡ ਦੇ ਐਡ ਕਰਦੇ ਹਨ ਅਤੇ ਕੁੱਝ ਤਾਂ ਉਨ੍ਹਾਂ ਦੇ ਖੁਦ ਦੇ ਇੰਟਰਪ੍ਰਾਈਸ ਹਨ।