ਸ਼੍ਰੀਲੰਕਾਈ ਕਪਤਾਨ ਦਿਨੇਸ਼ ਚਾਂਦੀਮਲ ਨੇ ਕਿਹਾ ਹੈ ਕਿ ਭਾਰਤ ਵਿਰੁੱਧ ਸ਼ਨੀਵਾਰ ਤੋਂ ਸ਼ੁਰੂ ਹੋ ਰਿਹਾ ਤੀਜਾ ਤੇ ਆਖਰੀ ਟੈਸਟ ਜਿੱਤ ਕੇ ਉਹ ਲੜੀ ਵਿੱਚ ਸਫਾਏ ਤੋਂ ਬਚਣ ਦੀ ਪੂਰੀ
ਸ਼੍ਰੀਲੰਕਾਈ ਕਪਤਾਨ ਦਿਨੇਸ਼ ਚਾਂਦੀਮਲ ਨੇ ਕਿਹਾ ਹੈ ਕਿ ਭਾਰਤ ਵਿਰੁੱਧ ਸ਼ਨੀਵਾਰ ਤੋਂ ਸ਼ੁਰੂ ਹੋ ਰਿਹਾ ਤੀਜਾ ਤੇ ਆਖਰੀ ਟੈਸਟ ਜਿੱਤ ਕੇ ਉਹ ਲੜੀ ਵਿੱਚ ਸਫਾਏ ਤੋਂ ਬਚਣ ਦੀ ਪੂਰੀ ਕੋਸ਼ਿਸ਼ ਕਰਨਗੇ। ਚਾਂਦੀਮਲ ਨੇ ਕਿਹਾ ਕਿ ਲੜੀ ਅਜੇ ਪੂਰੀ ਨਹੀਂ ਹੋਈ ਹੈ, ਬਤੌਰ ਕਪਤਾਨ ਮੈਂ ਹਾਰਨਾ ਨਹੀਂ ਚਾਹੁੰਦਾ।
ਭਾਵੇਂ ਹੀ ਉਹ ਦੁਨੀਆ ਦੀ ਨੰਬਰ ਇਕ ਜਾਂ ਅੱਠਵੇਂ ਨੰਬਰ ਦੀ ਟੀਮ ਹੋਵੇ, ਮੈਂ ਜਿੱਤਣਾ ਚਾਹੁੰਦਾ ਹਾਂ। ਉਸ ਨੇ ਕਿਹਾ ਕਿ ਦਬਾਅ ਤਾਂ ਹਮੇਸ਼ਾ ਹੀ ਰਹਿੰਦਾ ਹੈ। ਅਸੀਂ 0-2 ਨਾਲ ਪਿੱਛੇ ਹਾਂ ਪਰ ਸਾਡੀ ਟੀਮ ਖਰਾਬ ਨਹੀਂ ਹੈ। ਸਾਨੂੰ ਉਮੀਦ ਹੈ ਕਿ ਇਹ ਮੈਚ ਜਿੱਤਾਂਗੇ।
ਚਾਂਦੀਮਲ ਨੇ ਨਾਲ ਹੀ ਕਿਹਾ ਕਿ ਹੇਰਾਥ ਦਾ ਨਾ ਖੇਡਣਾ ਵੱਡਾ ਨੁਕਸਾਨ ਹੈ ਪਰ ਸਾਨੂੰ ਉਸ ਦੇ ਬਿਨਾਂ ਖੇਡਣਾ ਪਵੇਗਾ। ਉਸ ਦੇ ਲੱਕ ਵਿਚ ਦਰਦ ਹੈ, ਲਿਹਾਜ਼ਾ ਉਸ ਨੂੰ ਆਰਾਮ ਦਿੱਤਾ ਗਿਆ ਹੈ। ਲਾਹਿਰੂ ਗਾਮੇਗੇ ਤੇ ਵਿਸ਼ਵ ਫਰਨਾਂਡੋ ਚੰਗੀ ਗੇਂਦਬਾਜ਼ੀ ਕਰ ਰਹੇ ਹਨ। ਉਸ ਨੇ ਕਿਹਾ ਕਿ ਦੋ ਸੀਨੀਅਰ ਗੇਂਦਬਾਜ਼ਾਂ ਦੇ ਨਾ ਖੇਡਣ ਨਾਲ ਨੌਜਵਾਨਾਂ ਲਈ ਆਪਣੀ ਉਪਯੋਗਿਤਾ ਸਾਬਤ ਕਰਨ ਦਾ ਚੰਗਾ ਮੌਕਾ ਹੈ। ਉਮੀਦ ਹੈ ਕਿ ਉਹ ਇਸ ‘ਚ ਖਰੇ ਉਤਰਨਗੇ।
