ਆਸਟਰੇਲੀਆ ਨੂੰ ਭਾਰਤੀ ਟੀਮ ਦੇ ਖਿਲਾਫ ਰਾਂਚੀ ਵਿਚ ਸ਼ਨੀਵਾਰ ਨੂੰ ਹੋਣ ਵਾਲੇ ਪਹਿਲੇ ਟੀ-20 ਕੌਮਾਂਤਰੀ ਮੁਕਾਬਲੇ ਤੋਂ ਪਹਿਲਾਂ ਜ਼ੋਰਦਾਰ ਝੱਟਕਾ ਲੱਗਾ ਹੈ। ਵੀਰਵਾਰ ਨੂੰ ਅਭਿਆਸ ਸੈਸ਼ਨ ਦੌਰਾਨ ਆਸਟਰੇਲੀਆਈ ਕਪਤਾਨ ਸਟੀਵ ਸਮਿਥ ਦੇ ਮੋਢੇ 'ਤੇ ਸੱਟ ਲੱਗ ਗਈ ਹੈ। ਸੱਜੇ ਹੱਥ ਦੇ ਬੱਲੇਬਾਜ਼ ਨੂੰ ਨੇੜੇ ਦੇ ਹਸਪਤਾਲ ਵਿਚ ਇਲਾਜ਼ ਲਈ ਲਿਜਾਇਆ ਗਿਆ, ਜਿੱਥੇ ਉਨ੍ਹਾਂ ਦਾ ਐਮ.ਆਰ.ਆਈ. ਸਕੈਨ ਵੀ ਕਰਾਇਆ ਗਿਆ।
ਹਾਲਾਂਕਿ, ਆਸਟਰੇਲੀਆ ਪ੍ਰਬੰਧਨ ਨੂੰ ਰਾਹਤ ਮਹਿਸੂਸ ਹੋਈ ਜਦੋਂ ਡਾਕਟਰ ਨੇ ਸਮਿਥ ਨੂੰ ਫਿਟ ਘੋਸ਼ਿਤ ਕੀਤਾ ਅਤੇ ਪਹਿਲੇ ਟੀ-20 ਵਿਚ ਖੇਡਣ ਲਈ ਹਰੀ ਝੰਡੀ ਦਿੱਤੀ। ਪਰ ਦੱਸ ਦਈਏ ਕਿ ਆਸਟਰੇਲੀਆ ਦੀ ਟੀਮ ਪਹਿਲਾਂ ਹੀ ਸੀਰੀਜ਼ ਗੁਆ ਕੇ ਦਬਾਅ 'ਚ ਹੋਵੇਗੀ ਤਾਂ ਅਜਿਹੇ 'ਚ ਜੇਕਰ ਸਮਿਥ ਵੀ ਬਾਹਰ ਹੋ ਜਾਂਦੇ ਤਾਂ ਆਸਟਰੇਲੀਆ ਨੂੰ ਇਕ ਬਹੁਤ ਵੱਡਾ ਝਟਕਾ ਲੱਗਦਾ।
ਆਸਟਰੇਲਿਆ ਨੂੰ ਹਾਲ ਹੀ ਵਿਚ ਖੇਡੀ ਗਈ 5 ਮੈਚਾਂ ਦੀ ਸੀਰੀਜ਼ ਵਿਚ ਭਾਰਤੀ ਟੀਮ ਖਿਲਾਫ 1-4 ਨਾਲ ਹਾਰ ਝਲਣੀ ਪਈ ਸੀ। ਹੁਣ ਦੋਨਾਂ ਟੀਮਾਂ ਦਰਮਿਆਨ 7 ਅਕਤੂਬਰ ਤੋਂ ਤਿੰਨ ਮੈਚਾਂ ਦੀ ਟੀ-20 ਕੌਮਾਂਤਰੀ ਸੀਰੀਜ਼ ਖੇਡੀ ਜਾਵੇਗੀ। ਸੀਰੀਜ਼ ਦਾ ਪਹਿਲਾ ਮੈਚ ਰਾਂਚੀ ਵਿਚ ਖੇਡਿਆ ਜਾਵੇਗਾ।
