135 ਦੇਸ਼ਾਂ ’ਚ ਪੁੱਜਾ ਕੋਰੋਨਾ ਦਾ ਡੈਲਟਾ ਰੂਪ
ਸੰਯੁਕਤ ਰਾਸ਼ਟਰ : ਵਿਸ਼ਵ ਸਿਹਤ ਸੰਗਠਨ (ਡਬਲਊ.ਐਚ.ਓ.) ਮੁਤਾਬਕ, ਕੋਵਿਡ-19 ਦਾ ਬਹੁਤ ਹੀ ਛੂਤਕਾਰੀ ‘ਡੈਲਟਾ’ ਰੂਪ ਹੁਣ 135 ਦੇਸ਼ਾਂ ਵਿਚ ਸਾਹਮਣੇ ਆਇਆ ਹੈ ਅਤੇ ਅਗਲੇ ਹਫ਼ਤੇ ਤਕ ਕੋਰੋਨਾ ਵਾਇਰਸ ਦੀ ਲਾਗ ਦੇ ਕੁੱਲ ਵਿਸ਼ਵਿਆਪੀ ਮਾਮਲੇ 20 ਕਰੋੜ ਦੀ ਗਿਣਤੀ ਨੂੰ ਪਾਰ ਕਰ ਜਾਣਗੇ। ਡਬਲਊ.ਐਚ.ਓ. ਦੁਆਰਾ 3 ਅਗੱਸਤ ਨੂੰ ਜਾਰੀ ਕੋਵਿਡ-19 ਗਲੋਬਲ ਮਹਾਂਮਾਰੀ ਵਿਗਿਆਨ ਅਪਡੇਟ ਵਿਚ ਦਸਿਆ ਗਿਆ ਸੀ ਕਿ 132 ਦੇਸ਼ਾਂ ਵਿਚ ‘ਬੀਟਾ’ ਰੂਪ ਅਤੇ 81 ਦੇਸ਼ਾਂ ਵਿਚ ‘ਗਾਮਾ’ ਰੂਪ ਸਾਹਮਣੇ ਆਇਆ ਹੈ।
WHO
ਇਸ ਵਿਚ ਦਸਿਆ ਗਿਆ ਕਿ ਅਲਫ਼ਾ ਰੂਪ 182 ਦੇਸ਼ਾਂ, ਖੇਤਰਾਂ ਜਾਂ ਇਲਾਕਿਆਂ ਵਿਚ ਮਿਲਿਆ ਹੈ, ਜਦੋਂ ਕਿ ਭਾਰਤ ਵਿਚ ਮਿਲੇ ਡੈਲਟਾ ਰੂਪ ਦੇ ਮਾਮਲੇ 135 ਦੇਸ਼ਾਂ ਵਿਚ ਸਾਹਮਣੇ ਆਏ ਹਨ। ਅਪਡੇਟ ਵਿਚ ਦਸਿਆ ਗਿਆ ਕਿ ਨਵੇਂ ਮਾਮਲਿਆਂ ਦੀ ਆਲਮੀ ਗਿਣਤੀ ਦੇ ਵਾਧੇ ਨੂੰ ਇਕ ਮਹੀਨੇ ਤੋਂ ਵੱਧ ਸਮਾਂ ਹੋ ਗਿਆ ਹੈ, ਜਿਸ ਵਿਚ ਪਿਛਲੇ ਹਫ਼ਤੇ 26 ਜੁਲਾਈ ਤੋਂ 1 ਅਗੱਸਤ ਤਕ 40 ਲੱਖ ਤੋਂ ਵੱਧ ਮਾਮਲੇ ਸਾਹਮਣੇ ਆਏ ਹਨ।
Corona Virus
ਇਸ ਨੇ ਕਿਹਾ,“ਮਾਮਲਿਆਂ ਵਿਚ ਇਹ ਵਾਧਾ ਪੂਰਬੀ ਭੂ-ਮੱਧ ਖੇਤਰ ਅਤੇ ਪਛਮੀ ਪ੍ਰਸ਼ਾਂਤ ਖੇਤਰ ਵਿਚ ਮਹੱਤਵਪੂਰਣ ਵਾਧੇ ਦੇ ਕਾਰਨ ਹੈ, ਜਿਸ ਵਿਚ ਪਿਛਲੇ ਹਫ਼ਤੇ ਦੀ ਤੁਲਨਾ ਵਿਚ ਕ੍ਰਮਵਾਰ ਕ੍ਰਮਵਾਰ 37 ਅਤੇ 33 ਫ਼ੀਸਦ ਵਾਧਾ ਹੋਇਆ ਹੈ, ਜਦੋਂ ਕਿ ਦੱਖਣ-ਪੂਰਬੀ ਏਸ਼ੀਆਈ ਖੇਤਰ ਵਿਚ ਮਾਮਲੇ 9 ਫ਼ੀਸਦ ਤਕ ਵਧੇ ਹਨ।’’ ਕੁੱਲ ਮਿਲਾ ਕੇ, ਇਸ ਹਫ਼ਤੇ ਦੁਨੀਆਂ ਭਰ ਵਿਚ ਕੋਵਿਡ-19 ਨਾਲ 64 ਹਜ਼ਾਰ ਮੌਤਾਂ ਹੋਈਆਂ, ਜੋ ਕਿ ਪਿਛਲੇ ਹਫ਼ਤੇ ਦੇ ਮੁਕਾਬਲੇ ਅੱਠ ਫ਼ੀਸਦ ਘੱਟ ਹਨ।
Corona Virus
ਅਪਡੇਟ ਵਿਚ ਦਸਿਆ ਗਿਆ ਕਿ ਦੁਨੀਆਂ ਭਰ ਵਿਚ ਲਾਗ ਦੇ ਕੁੱਲ ਮਾਮਲੇ ਹੁਣ 19.7 ਕਰੋੜ ਤਕ ਪਹੁੰਚ ਗਏ ਹਨ ਅਤੇ ਮੌਤ ਦੇ ਮਾਮਲੇ 42 ਲੱਖ ਦੇ ਨੇੜੇ ਪਹੁੰਚ ਗਏ ਹਨ। ਅਪਡੇਟ ਮੁਤਾਬਕ,“ਜੇਕਰ ਇਹੀ ਰੁਝਾਨ ਜਾਰੀ ਰਿਹਾ, ਤਾਂ ਅਗਲੇ ਹਫ਼ਤੇ ਦੁਨੀਆਂ ਭਰ ਵਿਚ ਲਾਗ ਦੇ ਮਾਮਲੇ 20 ਕਰੋੜ ਤੋਂ ਪਾਰ ਚਲੇ ਜਾਣਗੇ।”
