ਮਹਾਂਮਾਰੀ ਦੇ ਗੰਭੀਰ ਤੇ ਲੰਮੇ ਸਮੇਂ ਤਕ ਹੋਣ ਵਾਲੇ ਅਸਰ ਕਾਰਨ 20 ਕਰੋੜ 70 ਲੱਖ ਲੋਕ ਹੋਣਗੇ ਪ੍ਰਭਾਵਤ
ਸੰਯੁਕਤ ਰਾਸ਼ਟਰ : ਸੰਯੁਕਤ ਰਾਸ਼ਟਰ ਵਿਕਾਸ ਪ੍ਰੋਗਰਾਮ (ਯੂਐਨਡੀਪੀ) ਦੇ ਇਕ ਸਰਵੇਖਣ ਵਿਚ ਸਾਹਮਣੇ ਆਇਆ ਹੈ ਕਿ ਕੋਰੋਨਾ ਮਹਾਂਮਾਰੀ ਦੇ ਲੰਮੇ ਸਮੇਂ ਤਕ ਗੰਭੀਰ ਨਤੀਜਿਆਂ ਕਾਰਨ 2030 ਤਕ 20 ਕਰੋੜ 70 ਲੱਖ ਹੋਰ ਲੋਕ ਘੋਰ ਗ਼ਰੀਬੀ ਵਲ ਜਾ ਸਕਦੇ ਹਨ ਅਤੇ ਜੇਕਰ ਅਜਿਹਾ ਹੋਇਆ ਤਾਂ ਦੁਨੀਆਂ ਭਰ ਵਿਚ ਬੇਹਦ ਗ਼ਰੀਬ ਲੋਕਾਂ ਦੀ ਗਿਣਤੀ ਇਕ ਅਰਬ ਤੋਂ ਪਾਰ ਹੋ ਜਾਵੇਗੀ।
ਖੋਜ ਵਿਚ ਕੋਵਿਡ-19 ਤੋਂ ਠੀਕ ਹੋਣ ਦੇ ਵੱਖ-ਵੱਖ ਪੜਾਵਾਂ ਕਾਰਨ ਵਿਕਾਸ ਟੀਚਿਆਂ (ਐਸਡੀਜੀ) ’ਤੇ ਪੈਣ ਵਾਲੇ ਅਸਰ ਅਤੇ ਮਹਾਂਮਾਰੀ ਕਾਰਨ ਅਗਲੇ ਦਹਾਕਿਆਂ ਤਕ ਪੈਣ ਵਾਲੇ ਪ੍ਰਭਾਵਾਂ ਦਾ ਅੰਦਾਜ਼ਾ ਲਗਾਇਆ ਗਿਆ। ਇਹ ਅਧਿਐਨ ਯੂਐਨਡੀਪੀ ਅਤੇ ਡੇਨਵਰ ਯੂਨੀਵਰਸਿਟੀ ਵਿਚ ‘ਪਾਰਡੀ ਸੈਂਟਰ ਫ਼ਾਰ ਇੰਟਰਨੈਸ਼ਨਲ ਫ਼ਿਊਚਰ’ ਵਿਚਾਲੇ ਲੰਮੇ ਸਮੇਂ ਤੋਂ ਚਲੀ ਆ ਰਹੀ ਸਾਂਝ ਦਾ ਹਿੱਸਾ ਹੈ।
ਖੋਜ ਮੁਤਾਬਕ,‘‘ਕੋਵਿਡ-19 ਮਹਾਂਮਾਰੀ ਦੇ ਗੰਭੀਰ ਤੇ ਲੰਮੇ ਸਮੇਂ ਤਕ ਹੋਣ ਵਾਲੇ ਨਤੀਜਿਆਂ ਕਾਰਨ ਸਾਲ 2030 ਤਕ 20 ਕਰੋੜ 70 ਲੱਖ ਹੋਰ ਲੋਕ ਘੋਰ ਗ਼ਰੀਬੀ ਵਲ ਜਾ ਸਕਦੇ ਹਨ। ਜੇਕਰ ਅਜਿਹਾ ਹੋਇਆ ਤਾਂ ਦੁਨੀਆਂ ਭਰ ਵਿਚ ਬੇਹਦ ਗ਼ਰੀਬ ਲੋਕਾਂ ਦੀ ਗਿਣਤੀ ਇਕ ਅਰਬ ਤੋਂ ਪਾਰ ਹੋ ਸਕਦੀ ਹੈ।’’ ਵਰਤਮਾਨ ਮੌਤ ਦਰ ਅਤੇ ਆਲਮੀ ਖ਼ਜ਼ਾਨਾ (ਆਈਐਮਐਫ਼) ਦੀ ਹਾਲੀਆ ਵਾਧਾ ਦਰ ਅੰਦਾਜ਼ੇ ਦੇ ਆਧਾਰ ’ਤੇ ‘ਬੇਸਲਾਈਨ ਕੋਵਿਡ’ ਦਿ੍ਰਸ਼ ਇਹ ਹੋਵੇਗਾ ਕਿ ਮਹਾਂਮਾਰੀ ਤੋਂ ਪਹਿਲਾਂ ਦੁਨੀਆਂ ਜਿਸ ਵਿਕਾਸ ਰਾਹ ’ਤੇ ਸੀ,
ਉਸ ਦੀ ਤੁਲਨਾ ਵਿਚ ਚਾਰ ਕਰੋੜ 40 ਲੱਖ ਵਾਧੂ ਲੋਕ 2030 ਤਕ ਘੋਰ ਗ਼ਰੀਬੀ ਦੀ ਲਪੇਟ ਵਿਚ ਆ ਜਾਣਗੇ। ਇਸ ਵਿਚ ਕਿਹਾ ਗਿਆ ਹੈ ਕਿ ‘ਹਾਈ ਡੈਮੇਜ’ ਤਹਿਤ ਕੋਵਿਡ-19 ਕਾਰਨ ਸਾਲ 2030 ਤਕ 20 ਕਰੋੜ 70 ਲੱਖ ਹੋਰ ਲੋਕ ਘੋਰ ਗ਼ਰੀਬੀ ਵਲ ਜਾ ਸਕਦੇ ਹਨ।’’ ਯੂਐਨਡੀਪੀ ਦੇ ਪ੍ਰਸ਼ਾਸਕ ਅਚਿਮ ਸਟੀਨਰ ਨੇ ਕਿਹਾ ਕਿ ਨਵੀਂ ਗ਼ਰੀਬੀ ਖੋਜ ਇਹ ਦਿਖਾ ਰਹੀ ਹੈ ਕਿ ਇਸ ਸਮੇਂ ਆਗੂ ਜੋ ਬਦਲ ਚੁਣਨਗੇ, ਉਹ ਦੁਨੀਆਂ ਨੂੰ ਵੱਖ-ਵੱਖ ਦਿਸ਼ਾਵਾਂ ਵਿਚ ਲਿਜਾ ਸਕਦੇ ਹਨ।