ਚਿੱਲੀ ਦੇ ਇਕ ਚਿੜੀਆਘਰ ਵਿਚ ਆਤਮ ਹੱਤਿਆ ਦੇ ਇਰਾਦੇ ਨਾਲ ਸ਼ੇਰਾਂ ਦੇ ਵਾੜੇ ਵਿਚ ਗਏ ਨੌਜਵਾਨ ਨੂੰ ਬਚਾਉਣ ਲਈ ਦੋ ਸ਼ੇਰਾਂ ਨੂੰ ਮਾਰ ਦਿੱਤਾ ਗਿਆ।
ਚਿੱਲੀ: ਚਿੱਲੀ ਦੇ ਇਕ ਚਿੜੀਆਘਰ ਵਿਚ ਆਤਮ ਹੱਤਿਆ ਦੇ ਇਰਾਦੇ ਨਾਲ ਸ਼ੇਰਾਂ ਦੇ ਵਾੜੇ ਵਿਚ ਗਏ ਨੌਜਵਾਨ ਨੂੰ ਬਚਾਉਣ ਲਈ ਦੋ ਸ਼ੇਰਾਂ ਨੂੰ ਮਾਰ ਦਿੱਤਾ ਗਿਆ। ਚਿੜੀਆਘਰ ਪ੍ਰਸ਼ਾਸਨ ਨੇ ਅਪਣੇ ਫੇਸਬੁੱਕ ਪੇਜ ‘ਤੇ ਲਿਖਿਆ, ਇਕ ਵਿਅਕਤੀ ਸ਼ੇਰਾਂ ਦੇ ਵਾੜੇ ਦੀ ਛੱਤ ‘ਤੇ ਪਹੁੰਚ ਗਿਆ ਅਤੇ ਚਾਰ ਦਿਵਾਰੀ ਨੂੰ ਤੋੜ ਕੇ ਅੰਦਰ ਚਲਾ ਗਿਆ। ਉਸ ਨੇ ਸ਼ੇਰਾਂ ਕੋਲ ਪਹੁੰਚਣ ਤੋਂ ਪਹਿਲਾਂ ਅਪਣੇ ਕੱਪੜੇ ਉਤਾਰ ਦਿੱਤੇ।
ਇਕ ਟੀਵੀ ਰਿਪੋਰਟ ਮੁਤਾਬਿਕ ਉਹ ਵਿਅਕਤੀ ਆਤਮ ਹੱਤਿਆ ਦੇ ਇਰਾਦੇ ਨਾਲ ਸ਼ੇਰਾਂ ਕੋਲ ਗਿਆ ਸੀ। ਉਸ ਦੇ ਕੋਲੋਂ ਆਤਮ ਹੱਤਿਆ ਦਾ ਨੋਟ ਵੀ ਬਰਾਮਦ ਹੋਇਆ ਹੈ। ਵਾੜੇ ਵਿਚ ਕੁੱਦਣ ਤੋਂ ਬਾਅਦ ਨੌਜਵਾਨ ‘ਤੇ ਦੋਵੇਂ ਸ਼ੇਰਾਂ ਨੇ ਹਮਲਾ ਕਰ ਦਿੱਤਾ। ਇਸ ਤੋਂ ਬਾਅਦ ਚਿੜੀਆਘਰ ਪ੍ਰਸ਼ਾਸਨ ਨੇ ਸ਼ੇਰਾਂ ਨੂੰ ਗੋਲੀ ਮਾਰਨ ਦਾ ਫੈਸਲਾ ਕੀਤਾ।
ਇਕ ਸਥਾਨਕ ਟੀਵੀ ਨੇ ਚਿੜੀਆਘਰ ਦੇ ਅਧਿਕਾਰੀਆਂ ਦੇ ਹਵਾਲੇ ਨਾਲ ਦੱਸਿਆ ਕਿ ਇਹਨਾਂ ਸ਼ੇਰਾਂ ਨੂੰ ਉਹਨਾਂ ਨਾਲ ਰਹਿੰਦਿਆਂ 20 ਸਾਲਾਂ ਤੋਂ ਵੀ ਜ਼ਿਆਦਾ ਸਮਾਂ ਹੋ ਗਿਆ ਸੀ। ਜ਼ਖਮੀ ਨੌਜਵਾਨ ਨੂੰ ਹਸਪਤਾਲ ਵਿਚ ਭਰਤੀ ਕਰਾਇਆ ਗਿਆ ਹੈ, ਜਿੱਥੇ ਉਸ ਦੀ ਹਾਲਤ ਗੰਭੀਰ ਹੈ।