ਲਗਾਤਾਰ ਮੀਂਹ ਕਾਰਨ 78 ਘਰ ਨੁਕਸਾਨੇ ਗਏ

ਇਸਲਾਮਾਬਾਦ, 9 ਜੁਲਾਈ : ਪਾਕਿਸਤਾਨ ਇਕ ਪਾਸੇ ਜਿਥੇ ਨਕਦੀ ਦੀ ਤੰਗੀ ਨਾਲ ਜੂਝ ਰਿਹਾ ਹੈ ਉਥੇ ਦੂਜੇ ਪਾਸੇ ਭਾਰੀ ਮੀਂਹ ਨੇ ਤਬਾਹੀ ਮਚਾਈ ਹੋਈ ਹੈ। ਦੇਸ਼ ਵਿਚ ਜੂਨ ਤੋਂ ਜਾਰੀ ਭਾਰੀ ਮੀਂਹ ਕਾਰਨ 76 ਲੋਕਾਂ ਦੀ ਮੌਤ ਹੋ ਚੁਕੀ ਹੈ ਅਤੇ 133 ਲੋਕ ਜ਼ਖਮੀ ਹੋਏ ਹਨ। ਏਆਰਵਾਈ ਨਿਊਜ਼ ਨੇ ਰਾਸ਼ਟਰੀ ਆਫ਼ਤ ਪ੍ਰਬੰਧਨ ਅਥਾਰਟੀ (ਐਨਡੀਐਮਏ) ਦੇ ਹਵਾਲੇ ਨਾਲ ਇਹ ਜਾਣਕਾਰੀ ਦਿਤੀ। 

ਐਨਡੀਐਮਏ ਨੇ ਅਪਣੀ ਰਿਪੋਰਟ ਵਿਚ ਕਿਹਾ ਕਿ ਪਿਛਲੇ 24 ਘੰਟਿਆਂ ਵਿਚ ਦੇਸ਼ ਭਰ ਵਿਚ ਭਾਰੀ ਮੀਂਹ ਵਿਚ 9 ਲੋਕਾਂ ਦੀ ਮੌਤ ਹੋ ਗਈ, ਜਿਸ ਨਾਲ ਮਰਨ ਵਾਲਿਆਂ ਦੀ ਕੁੱਲ ਗਿਣਤੀ 76 ਹੋ ਗਈ ਹੈ। ਪਿਛਲੇ 24 ਘੰਟਿਆਂ ਦੌਰਾਨ 8 ਵਿਅਕਤੀ ਜ਼ਖ਼ਮੀ ਹੋਏ ਹਨ, ਜਿਸ ਨਾਲ ਕੁੱਲ ਜ਼ਖ਼ਮੀਆਂ ਦੀ ਗਿਣਤੀ 133 ਹੋ ਗਈ ਹੈ। ਕੁੱਲ 76 ਮੌਤਾਂ ਅਤੇ 133 ਜ਼ਖ਼ਮੀਆਂ ਦੇ ਅੰਕੜਿਆਂ ’ਚ 15 ਔਰਤਾਂ ਅਤੇ 31 ਬੱਚੇ ਸ਼ਾਮਲ ਹਨ ਜਦਕਿ ਲਗਾਤਾਰ ਮੀਂਹ ਕਾਰਨ 78 ਘਰ ਨੁਕਸਾਨੇ ਗਏ ਹਨ। 

ਐਨਡੀਐਮਏ ਦੀ ਰਿਪੋਰਟ ਵਿਚ ਕਿਹਾ ਗਿਆ ਕਿ ਪੰਜਾਬ ਵਿਚ ਸੱਭ ਤੋਂ ਵੱਧ ਲੋਕਾਂ ਦੀ ਮੌਤ ਹੋਈ ਹੈ ਜਿਥੇ ਭਾਰੀ ਮੀਂਹ ਵਿਚ 48 ਲੋਕ ਮਾਰੇ ਗਏ ਅਤੇ ਖ਼ੈਬਰ ਪਖ਼ਤੂਨਖਵਾ (ਕੇਪੀ) ਵਿਚ 20 ਲੋਕਾਂ ਦੀ ਮੌਤ ਹੋਈ, ਬਲੋਚਿਸਤਾਨ ਵਿਚ ਪੰਜ ਮੌਤਾਂ ਹੋਈਆਂ। ਡਾਨ ਨਿਊਜ਼ ਅਨੁਸਾਰ 6 ਜੁਲਾਈ ਨੂੰ ਪਾਕਿਸਤਾਨ ਦੇ ਪੰਜਾਬ ਵਿਚ 18 ਮੌਤਾਂ ਹੋਈਆਂ ਕਿਉਂਕਿ ਸੂਬੇ ਦੇ ਕੁੱਝ ਹਿੱਸਿਆਂ ਵਿਚ ਮੀਂਹ ਜਾਰੀ ਹੈ। ਪੰਜਾਬ ’ਚ ਪਿਛਲੇ ਦੋ ਦਿਨਾਂ ਦੌਰਾਨ ਮਾਨਸੂਨ ਦੇ ਕਹਿਰ ਕਾਰਨ ਮਰਨ ਵਾਲਿਆਂ ਦੀ ਗਿਣਤੀ 29 ਹੋ ਗਈ ਹੈ। ਸੂਬਾਈ ਰਾਜਧਾਨੀ ਵਿਚ ਚਾਰ ਹੋਰ ਮੌਤਾਂ ਹੋਈਆਂ ਹਨ ਅਤੇ ਪਿਛਲੇ ਦੋ ਦਿਨਾਂ ਵਿਚ ਇਹ ਗਿਣਤੀ 12 ਤਕ ਪਹੁੰਚ ਗਈ ਹੈ।