ਫਰੇਡੀ ਨੋਕ ਨੇ ਇਕ ਹਵਾ ਵਿਚ ਲਟਕੀ ਕੁਰਸੀ ਵਿਚ 8 ਘੰਟੇ 30 ਮਿੰਟ ਅਤੇ 55 ਸੈਕੰਡ ਲੰਘਾਏ ਅਤੇ ਗਿੰਨੀਜ਼ ਬੁੱਕ ਆਫ ਵਰਲਡ ਰਿਕਾਰਡ ਵਿਚ ਇਕ ਨਵਾਂ ਰਿਕਾਰਡ ਦਰਜ ਕੀਤਾ।
ਸਵਿਟਜ਼ਰਲੈਂਡ, ( ਭਾਸ਼ਾ ) : ਸਵਿਟਰਜ਼ਲੈਂਡ ਦੇ ਇਕ ਜਾਂਬਾਜ਼ ਨੇ ਅਜਿਹਾ ਵਿਸ਼ਵ ਰਿਕਾਰਡ ਕਾਇਮ ਕੀਤਾ ਹੈ ਜਿਸ ਨੂੰ ਤੋੜਨਾ ਕਿਸੇ ਦੇ ਵੱਸ ਦੀ ਗੱਲ ਨਹੀਂ ਹੈ। ਉੱਚੀਆਂ ਤਾਰਾਂ ਦੇ ਕਲਾਕਾਰ ਦੇ ਤੌਰ 'ਤੇ ਦੁਨੀਆ ਭਰ ਵਿਚ ਅਪਣੀ ਪਛਾਣ ਹਾਸਲ ਕਰਨ ਵਾਲੇ ਫਰੇਡੀ ਨੋਕ ਨੇ ਇਕ ਹਵਾ ਵਿਚ ਲਟਕੀ ਕੁਰਸੀ ਵਿਚ 8 ਘੰਟੇ 30 ਮਿੰਟ ਅਤੇ 55 ਸੈਕੰਡ ਲੰਘਾਏ ਅਤੇ ਗਿੰਨੀਜ਼ ਬੁੱਕ ਆਫ ਵਰਲਡ ਰਿਕਾਰਡ ਵਿਚ ਇਕ ਨਵਾਂ ਰਿਕਾਰਡ ਦਰਜ ਕੀਤਾ। ਫਰੇਡੀ ਨੇ ਸੱਭ ਤੋਂ ਲੰਮੇ ਸਮੇਂ ਤੱਕ ਦੋ ਪਾਸਿਆਂ ਤੋਂ ਬੰਨੀ ਗਈ ਰੱਸੀ ਵਿਚ ਰੱਖੀ ਗਈ ਕੁਰਸੀ ਦੇ ਭਾਰ ਦਾ ਸੰਤੁਲਨ ਬਣਾ ਕੇ
ਬੈਠਣ ਵਾਲੇ ਵਿਅਕਤੀ ਦੇ ਤੌਰ 'ਤੇ ਇਹ ਰਿਕਾਰਡ ਅਪਣੇ ਨਾਮ ਕਰ ਲਿਆ ਹੈ। ਇਸ ਦੌਰਾਨ ਜਿਸ ਰੱਸੀ ਦੇ ਸਹਾਰੇ ਲਟਕੀ ਕੁਰਸੀ 'ਤੇ ਫਰੇਡੀ ਬੈਠੇ ਸਨ ਉਹ ਜ਼ਮੀਨ ਤੋਂ 36 ਫੁੱਟ ਉੱਤੇ ਲਟਕੀ ਹੋਈ ਸੀ। ਦੱਸ ਦਈਏ ਕਿ ਫਰੇਡੀ ਨੇ ਇਹ ਰਿਕਾਰਡ ਈਬਿਕਨ ਦੇ ਮਾਲ ਆਫ ਸਵਿਟਜ਼ਰਲੈਂਡ ਵਿਚ ਬਣਾਇਆ ਹੈ। ਦਰਅਸਲ ਮਾਲ ਆਫ ਸਵਿਟਰਜ਼ਲੈਂਡ ਨੇ ਮਾਲ ਦੀ ਪਹਿਲੀ ਵਰ੍ਹੇਗੰਢ ਮਨਾਉਣ ਲਈ ਇਕ ਪ੍ਰੋਗਰਾਮ ਦਾ ਆਯੋਜਨ ਕੀਤਾ ਸੀ। ਜਿਸ ਵਿਚ ਫਰੇਡੀ ਨੇ ਅਪਣੀ ਕਲਾਕਾਰੀ ਨਾਲ ਹਰ ਕਿਸੇ ਨੂੰ ਹੈਰਾਨ ਕਰ ਦਿਤਾ।
ਉਹਨਾਂ ਨੇ ਜਿਵੇਂ ਹੀ ਰੱਸੀ ਤੇ ਰੱਖੀ ਕੁਰਸੀ 'ਤੇ ਬੈਠ ਕੇ ਰਿਕਾਰਡ ਬਣਾਉਣ ਦੀ ਸ਼ੁਰੂਆਤ ਕੀਤੀ ਤਾਂ ਉਹਨਾਂ ਦੇ ਆਲੇ-ਦੁਆਲੇ ਲੋਕਾਂ ਦੀ ਭੀੜ ਇਕੱਠੀ ਹੋਣੀ ਸ਼ੁਰੂ ਹੋ ਗਈ। ਖ਼ਬਰਾਂ ਮੁਤਾਬਕ ਫਰੇਡੀ ਨੇ ਇਸ ਰਿਕਾਰਡ ਨੂੰ ਬਣਾਉਣ ਲਈ ਹਵਾ ਵਿਚ 8 ਘੰਟੇ, 30 ਮਿੰਟ ਅਤੇ 55 ਸੈਕੰਡ ਬਿਤਾਏ। ਉਹਨਾਂ ਨੇ ਰੱਸੀ ਦੇ ਦੂਜੇ ਪਾਸੇ ਪਹੁੰਚ ਕੇ ਅਪਣੇ ਇਸ ਸਟੰਟ ਨੂੰ ਖਤਮ ਕੀਤਾ। ਦੱਸ ਦਈਏ ਕਿ ਫਰੇਡੀ ਨੇ ਇਹ ਸਟੰਟ ਸੁਰੱਖਿਆ ਬੈਲਟ ਜਾਂ
ਸਾਧਨ ਦੀ ਵਰਤੋਂ ਦੇ ਬਿਨਾਂ ਪੂਰਾ ਕੀਤਾ। ਇਸ ਦੌਰਾਨ ਉਹਨਾਂ ਨੇ ਅਪਣੇ ਪੈਰਾਂ 'ਤੇ ਇਕ ਮੋਟਾ ਅਤੇ ਲੰਮਾ ਖੰਭਾ ਰੱਖ ਕੇ ਸੰਤੁਲਨ ਬਣਾਈ ਰੱਖਿਆ। ਸਟੰਟ ਕਰਦੇ ਹੋਏ ਉਹਨਾਂ ਨੇ ਰੋਟੀ ਅਤੇ ਆਈਸਕ੍ਰੀਮ ਦਾ ਵੀ ਆਨੰਦ ਮਾਣਿਆ। ਅਜਿਹਾ ਪਹਿਲੀ ਵਾਰ ਨਹੀਂ ਹੈ ਕਿ ਜਦੋਂ ਫਰੇਡੀ ਦਾ ਨਾਮ ਗਿੰਨੀਜ਼ ਬੁੱਕ ਆਫ ਵਰਲਡ ਰਿਕਾਰਡ ਵਿਚ ਆਇਆ ਹੈ। ਇਸ ਤੋਂ ਪਹਿਲਾਂ 2015 ਵਿਚ ਵੀ ਉਹਨਾਂ ਨੇ 38.06 ਡਿਗਰੀ ਤੇ ਕੱਸੀ ਹੋਈ ਰੱਸੀ 'ਤੇ ਤੁਰ ਕੇ ਵਿਸ਼ਵ ਰਿਕਾਰਡ ਬਣਾਇਆ ਸੀ।