ਯੁੱਧ ਪ੍ਰਭਾਵਿਤ ਇਲਾਕੇ ਵਿਚ ਨਹੀਂ ਦੇਣਾ ਚਾਹੁੰਦੀਆਂ ਬੱਚੇ ਨੂੰ ਜਨਮ
ਰੂਸ-ਯੂਕਰੇਨ ਯੁੱਧ ਦਰਮਿਆਨ ਹੁਣ ਤੱਕ 5 ਹਜ਼ਾਰ ਤੋਂ ਵੱਧ ਗਰਭਵਤੀ ਔਰਤਾਂ ਰੂਸ ਤੋਂ ਅਰਜਨਟੀਨਾ ਜਾ ਚੁੱਕੀਆਂ ਹਨ। ਵੀਰਵਾਰ ਨੂੰ ਬਿਊਨਸ ਆਇਰਸ ਪਹੁੰਚੀਆਂ 33 ਔਰਤਾਂ ਗਰਭ ਅਵਸਥਾ ਦੇ ਆਖਰੀ ਹਫਤਿਆਂ 'ਚ ਸਨ। ਅਸਲ 'ਚ ਇਹ ਔਰਤਾਂ ਰੂਸ 'ਚ ਜੰਗ ਦੇ ਵਿਚਕਾਰ ਬੱਚੇ ਨੂੰ ਜਨਮ ਨਹੀਂ ਦੇਣਾ ਚਾਹੁੰਦੀਆਂ। ਦੂਜੇ ਪਾਸੇ ਜੇਕਰ ਉਨ੍ਹਾਂ ਦੇ ਬੱਚੇ ਦਾ ਜਨਮ ਅਰਜਨਟੀਨਾ ਵਿੱਚ ਹੁੰਦਾ ਹੈ ਤਾਂ ਮਾਪਿਆਂ ਲਈ ਨਾਗਰਿਕਤਾ ਹਾਸਲ ਕਰਨਾ ਆਸਾਨ ਹੋ ਜਾਂਦਾ ਹੈ।
ਇਹ ਵੀ ਪੜ੍ਹੋ : ਦਿੱਲੀ ਮੇਅਰ ਚੋਣ ਲਈ ਨਵੀਂ ਤਰੀਕ ਦਾ ਐਲਾਨ, 16 ਫਰਵਰੀ ਨੂੰ ਹੋਵੇਗੀ ਬੈਠਕ
ਇਨ੍ਹਾਂ ਰੂਸੀ ਔਰਤਾਂ ਨੇ ਸ਼ੁਰੂ ਵਿਚ ਅਰਜਨਟੀਨਾ ਵਿਚ ਸੈਲਾਨੀਆਂ ਵਜੋਂ ਜਾਣ ਦੀ ਗੱਲ ਕੀਤੀ ਸੀ। ਹਾਲਾਂਕਿ ਬਾਅਦ 'ਚ ਉਨ੍ਹਾਂ ਨੇ ਮੰਨਿਆ ਕਿ ਉਹ ਆਪਣੇ ਬੱਚਿਆਂ ਦੇ ਬਿਹਤਰ ਭਵਿੱਖ ਲਈ ਅਰਜਨਟੀਨਾ ਦੀ ਨਾਗਰਿਕਤਾ ਲੈਣ ਜਾ ਰਹੀਆਂ ਹਨ। ਇਨ੍ਹਾਂ ਗਰਭਵਤੀ ਔਰਤਾਂ ਦੇ ਕੂਚ ਨੂੰ ਜਨਮ ਯਾਤਰਾ ਦਾ ਨਾਂ ਦਿੱਤਾ ਗਿਆ ਹੈ।
ਵੱਡੀ ਸਮੱਸਿਆ ਇਹ ਹੈ ਕਿ ਔਰਤਾਂ ਅਰਜਨਟੀਨਾ ਵਿੱਚ ਆਪਣੇ ਬੱਚਿਆਂ ਨੂੰ ਰਜਿਸਟਰ ਕਰਾਉਣ ਤੋਂ ਬਾਅਦ ਦੇਸ਼ ਛੱਡ ਰਹੀਆਂ ਹਨ। ਇਹ ਇਸ ਲਈ ਹੈ ਕਿਉਂਕਿ ਇਹ ਰੂਸੀ ਪਾਸਪੋਰਟ ਨਾਲੋਂ ਜ਼ਿਆਦਾ ਆਜ਼ਾਦੀ ਦਿੰਦਾ ਹੈ। ਜਿਨ੍ਹਾਂ ਲੋਕਾਂ ਕੋਲ ਅਰਜਨਟੀਨਾ ਦਾ ਪਾਸਪੋਰਟ ਹੈ, ਉਹ ਵੀਜ਼ਾ-ਮੁਕਤ ਦੁਨੀਆ ਦੇ 171 ਦੇਸ਼ਾਂ ਵਿੱਚ ਦਾਖਲ ਹੋ ਸਕਦੇ ਹਨ। ਜਦੋਂ ਕਿ ਰੂਸੀ ਪਾਸਪੋਰਟ ਰਾਹੀਂ ਸਿਰਫ਼ 87 ਦੇਸ਼ਾਂ ਵਿਚ ਬਿਨਾਂ ਵੀਜ਼ਾ ਦੇ ਜਾ ਸਕਦੇ ਹਨ।
ਇਹ ਵੀ ਪੜ੍ਹੋ : 'ਆਪ੍ਰੇਸ਼ਨ ਦੋਸਤ' ਤਹਿਤ ਭਾਰਤ ਨੇ ਭੂਚਾਲ ਪ੍ਰਭਾਵਿਤ ਤੁਰਕੀ ਅਤੇ ਸੀਰੀਆ ਲਈ ਭੇਜੀ ਰਾਹਤ ਸਮਗਰੀ ਦੀ 7ਵੀਂ ਖੇਪ
ਅਰਜਨਟੀਨਾ ਪੁਲਿਸ ਲਗਾਤਾਰ ਅਜਿਹੇ ਗਿਰੋਹ 'ਤੇ ਛਾਪੇਮਾਰੀ ਕਰ ਰਹੀ ਹੈ ਜੋ ਰੂਸੀ ਔਰਤਾਂ ਨੂੰ ਫਰਜ਼ੀ ਪਾਸਪੋਰਟ ਬਣਾਉਣ ਅਤੇ ਅਰਜਨਟੀਨਾ 'ਚ ਦਾਖਲ ਹੋਣ 'ਚ ਮਦਦ ਕਰਦੇ ਹਨ। ਇਹ ਗੈਂਗ ਆਪਣੀ ਸੇਵਾ ਲਈ ਕਰੀਬ 29 ਲੱਖ ਰੁਪਏ ਫੀਸ ਵਸੂਲਦੇ ਹਨ। ਹਾਲੇ ਤੱਕ ਪੁਲਿਸ ਨੇ ਕਿਸੇ ਮੁਲਜ਼ਮ ਨੂੰ ਗ੍ਰਿਫ਼ਤਾਰ ਨਹੀਂ ਕੀਤਾ ਹੈ ਪਰ ਛਾਪੇਮਾਰੀ ਦੌਰਾਨ ਲੈਪਟਾਪ ਸਮੇਤ ਨਕਦੀ, ਇਮੀਗ੍ਰੇਸ਼ਨ ਦਸਤਾਵੇਜ਼ ਜ਼ਬਤ ਕਰ ਲਏ ਗਏ ਹਨ।
ਜੰਗ ਤੋਂ ਦੂਰ ਹੋਣ ਤੋਂ ਇਲਾਵਾ, ਗਰਭਵਤੀ ਔਰਤਾਂ ਵੀਜ਼ਾ-ਮੁਕਤ ਦਾਖਲੇ ਅਤੇ ਚੰਗੀ ਡਾਕਟਰੀ ਸੇਵਾਵਾਂ ਕਾਰਨ ਅਰਜਨਟੀਨਾ ਵੱਲ ਆਕਰਸ਼ਿਤ ਹੁੰਦੀਆਂ ਹਨ । ਅਰਜਨਟੀਨਾ ਵਿੱਚ ਰਿਹਾਇਸ਼ ਅਤੇ ਬੱਚੇ ਦੀ ਡਿਲੀਵਰੀ ਬਾਰੇ ਪੇਸ਼ਕਸ਼ਾਂ ਲਈ ਰੂਸ ਵਿੱਚ ਇੱਕ ਵੈਬਸਾਈਟ ਵੀ ਹੈ। ਵੈੱਬਸਾਈਟ ਵੱਖ-ਵੱਖ ਪੈਕੇਜਾਂ ਦੀ ਪੇਸ਼ਕਸ਼ ਕਰਦੀ ਹੈ ਜਿਸ ਵਿੱਚ ਵਿਅਕਤੀਗਤ ਜਨਮ ਯੋਜਨਾਵਾਂ, ਏਅਰਪੋਰਟ ਪਿਕ-ਅੱਪ ਦੇ ਨਾਲ-ਨਾਲ ਸਪੈਨਿਸ਼ ਭਾਸ਼ਾ ਦੀਆਂ ਕਲਾਸਾਂ ਅਤੇ ਬਿਊਨਸ ਆਇਰਸ ਦੇ ਸਭ ਤੋਂ ਵਧੀਆ ਹਸਪਤਾਲਾਂ ਵਿੱਚ ਇਲਾਜ ਸ਼ਾਮਲ ਹਨ।
