ਤਾਇਵਾਨ ਆਪਣੀਆਂ 99 ਫ਼ੀਸਦੀ ਟੈਰਿਫ਼ ਪਾਬੰਦੀਆਂ ਨੂੰ ਹਟਾਉਣ ਜਾਂ ਘੱਟ ਕਰਨ ’ਤੇ ਹੋਇਆ ਸਹਿਮਤ
ਵਾਸ਼ਿੰਗਟਨ: ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਪ੍ਰਸ਼ਾਸਨ ਨੇ ਤਾਇਵਾਨ ਨਾਲ ਇਕ ਵਪਾਰ ਸਮਝੌਤਾ ਕੀਤਾ ਹੈ। ਇਸ ਤਹਿਤ ਤਾਇਵਾਨ ਅਪਣੀਆਂ 99 ਫ਼ੀ ਸਦੀ ਟੈਰਿਫ਼ ਪਾਬੰਦੀਆਂ ਨੂੰ ਹਟਾਉਣ ਜਾਂ ਘੱਟ ਕਰਨ ’ਤੇ ਸਹਿਮਤ ਹੋਇਆ ਹੈ। ਇਹ ਜਾਣਕਾਰੀ ਅਮਰੀਕਾ ਦੀਆਂ ਵਪਾਰ ਪਾਬੰਦੀ ਦਫ਼ਤਰ ਨੇ ਦਿਤੀ। ਇਹ ਸਮਝੌਤਾ ਅਜਿਹੇ ਸਮੇਂ ਹੋਇਆ ਹੈ, ਜਦੋਂ ਅਮਰੀਕਾ ਕੰਪਿਊਟਰ ਚਿੱਪ ਦੇ ਉਤਪਾਦਨ ਲਈ ਤਾਇਵਾਨ ਉਤੇ ਕਾਫ਼ੀ ਹੱਦ ਤਕ ਨਿਰਭਰ ਹੈ।
ਸਾਲ 2025 ਦੇ ਪਹਿਲੇ 11 ਮਹੀਨਿਆਂ ’ਚ ਚਿੱਪ ਨਿਰਯਾਤ ਕਾਰਨ ਦੋਹਾਂ ਦੇਸ਼ਾਂ ਵਿਚਕਾਰ ਲਗਭਗ 127 ਅਰਬ ਡਾਲਰ ਦਾ ਵਪਾਰ ਘਾਟਾ ਦਰਜ ਕੀਤਾ ਗਿਆ ਸੀ। ਵਪਾਰ ਪ੍ਰਤੀਨਿਧੀ ਦਫ਼ਤਰ ਨੇ ਦਸਿਆ ਕਿ ਤਾਇਵਾਨ ਤੋਂ ਅਮਰੀਕਾ ਆਉਣ ਵਾਲੇ ਨਿਰਯਾਤ ਉਤੇ 15 ਫ਼ੀ ਸਦੀ ਟੈਰਿਫ਼ ਜਾਂ ਅਮਰੀਕੀ ਸਰਕਾਰ ਦੀ ‘ਸਭ ਤੋਂ ਤਰਜੀਹੀ ਦੇਸ਼’ ਦਰ ਲਾਗੂ ਹੋਵੇਗੀ। ਇਹ 15 ਫ਼ੀ ਸਦੀ ਦਰ ਏਸ਼ੀਆ-ਪ੍ਰਸ਼ਾਂਤ ਖੇਤਰ ਦੇ ਹੋਰ-ਅਮਰੀਕੀ ਵਪਾਰ ਸਾਂਝੇਦਾਰਾਂ ਜਿਵੇਂ ਜਪਾਨ ਅਤੇ ਦਖਣੀ ਕੋਰੀਆ ਉਤੇ ਲਾਗੂ ਦਰ ਦੇ ਬਰਾਬਰ ਹੈ।
ਆਪਸੀ ਸਮਝੌਤੇ ਉਤੇ ਹਸਤਾਖ਼ਰ ਦੌਰਾਨ ਅਮਰੀਕੀ ਵਪਾਰ ਪ੍ਰਤੀਨਿਧੀ ਜੇਮਿਸਨ ਗ੍ਰੀਰ ਵੀ ਮੌਜੂਦ ਰਹੇ। ਇਹ ਹਸਤਾਖ਼ਰ ਤਾਇਵਾਨ ’ਚ ਅਮਰੀਕੀ ਸੰਸਥਾਨ ਅਤੇ ਅਮਰੀਕਾ ’ਚ ਤਾਇਪੇ ਆਰਥਕ ਅਤੇ ਸਭਿਆਚਾਰਕ ਪ੍ਰਤੀਨਿਧੀ ਦਫ਼ਤਰ ਦੀ ਨਿਗਰਾਨੀ ਹੇਠ ਹੋਏ। ਇਸ ਮੌਕੇ ਤਾਇਵਾਨ ਦੇ ਉਪ ਪ੍ਰਧਾਨ ਮੰਤਰੀ ਲੀ-ਚਿਉਨ ਚੇਂਗ ਅਤੇ ਵਿਦੇਸ਼ ਵਪਾਰ ਬਿਊਰੋ ਦੀ ਡਾਇਰੈਕਟਰ ਜਨਰਲ ਜੇਨ-ਨੀ ਯਾਂਗ ਵੀ ਮੌਜੂਦ ਰਹੇ।
ਇਹ ਸਮਝੌਤਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਅਪ੍ਰੈਲ ’ਚ ਪ੍ਰਸਤਾਵਿਤ ਚੀਨ ਯਾਤਰਾ ਤੋਂ ਪਹਿਲਾਂ ਹੋਇਆ ਹੈ। ਇਸ ਨਾਲ ਅਮਰੀਕਾ ਅਤੇ ਤਾਇਵਾਨ ਵਿਚਕਾਰ ਆਰਥਕ ਰਿਸ਼ਿਤਆਂ ਦੇ ਹੋਰ ਗੂੜ੍ਹੇ ਹੋਣ ਦੇ ਸੰਕੇਤ ਮਿਲਦੇ ਹਨ।
