ਤੁਸੀਂ ਵੀ ਅਕਸਰ ਚਾਹੁੰਦੇ ਹੋਵੋਗੇ ਕਿ ਤੁਹਾਨੂੰ ਪਤਾ ਹੋਵੇ ਕਿ ਕਿਸੇ ਦੇ ਦਿਮਾਗ 'ਚ ਕੀ ਚਲ ਰਿਹਾ ਹੈ?
ਟੋਰਾਂਟੋ : ਤੁਸੀਂ ਵੀ ਅਕਸਰ ਚਾਹੁੰਦੇ ਹੋਵੋਗੇ ਕਿ ਤੁਹਾਨੂੰ ਪਤਾ ਹੋਵੇ ਕਿ ਕਿਸੇ ਦੇ ਦਿਮਾਗ 'ਚ ਕੀ ਚਲ ਰਿਹਾ ਹੈ? ਇਸ ਨੂੰ ਦੇਖਦੇ ਹੋਏ ਟੋਰਾਂਟੋ ਯੂਨੀਵਰਸਿਟੀ ਦੇ ਖ਼ੋਜਕਾਰਾਂ ਨੇ ਇਸ ਦਿਸ਼ਾ 'ਚ ਇਕ ਕਦਮ ਹੋਰ ਰਖਦਿਆਂ ਦਿਮਾਗ ਪੜ੍ਹਨ ਦੀ ਨਵੀਂ ਤਕਨੀਕ ਵਿਕਸਿਤ ਕੀਤੀ ਹੈ। ਆਫ਼ ਟੋਰਾਂਟੋ ਦੇ ਖ਼ੋਜਕਾਰਾਂ ਨੇ ਇਲੈਕਟ੍ਰੋਇਨਸੇਫਾਲੋਗ੍ਰਾਫ਼ੀ (ਈਈਜੀ) ਤੇ ਆਰਟੀਫਿਸ਼ਲ ਇੰਟੈਲੀਜੈਂਸ ਦੀ ਵਰਤੋਂ ਨਾਲ ਇਹ ਅਧਿਐਨ ਕੀਤਾ ਹੈ।
ਇਕ ਮਨੋਵਿਗਿਆਨ ਪ੍ਰੋਫ਼ੈਸਰ ਐਡਰੀਅਨ ਨੈਸਟਰ ਤੇ ਪੋਸਟਡਾਕਟਰਲ ਮਾਹਰ ਡਾਨ ਨੇਮਰੋਦੋਵ ਈਈਜੀ ਮਸ਼ੀਨਾਂ ਤੋਂ ਲਈਆਂ ਗਈਆਂ ਤਸਵੀਰਾਂ ਨੂੰ ਡਿਜੀਟਲ ਰੂਪ ਦੇਣ 'ਚ ਯੋਗ ਹੋ ਗਏ ਹਨ।
ਅਧਿਐਨ 'ਚ ਹਿੱਸਾ ਲੈਣ ਵਾਲਿਆਂ ਨੂੰ ਕੰਪਿਊਟਰ ਸਕ੍ਰੀਨ 'ਤੇ ਕਈ ਚਿਹਰੇ ਦਿਖਾਏ ਗਏ ਤੇ ਉਨ੍ਹਾਂ ਦੀ ਦਿਮਾਗੀ ਗਤੀਵਿਧੀ ਨੂੰ ਈਈਜੀ ਮਸ਼ੀਨ ਰਾਹੀਂ ਰਿਕਾਰਡ ਕੀਤਾ ਗਿਆ। ਇਸ ਦੌਰਾਨ ਸਕ੍ਰੀਨ 'ਤੇ ਤਸਵੀਰ ਬਦਲਣ ਦੌਰਾਨ ਚਿਹਰੇ ਦਾ ਹਾਵ-ਭਾਵ ਤੇ ਈਈਜੀ ਰਾਹੀਂ ਡਾਟਾ ਇਕਠਾ ਕੀਤਾ ਗਿਆ। ਨੈਸਟਰ ਨੇ ਇਕ ਪੱਤਰਕਾਰ ਏਜੰਸੀ ਨੂੰ ਦਸਿਆ ਕਿ ਸ਼ੁਰੂਆਤੀ ਅਧਿਐਨ 'ਚ 13 ਲੋਕਾਂ ਨੂੰ ਸ਼ਾਮਲ ਕੀਤਾ ਗਿਆ ਸੀ, ਜਿਸ 'ਚ ਸਕ੍ਰੀਨ 'ਤੇ ਤਸਵੀਰਾਂ ਬਦਲਣ 'ਤੇ ਵਿਅਕਤੀਆਂ ਦੇ ਚਿਹਰੇ 'ਤੇ ਬਦਲਾਅ ਦਰਜ ਕੀਤੇ ਗਏ। ਹਰੇਕ ਵਿਅਕਤੀ ਦੂਜੇ ਤੋਂ ਵੱਖਰਾ ਹੁੰਦਾ ਹੈ ਤੇ ਤਸਵੀਰਾਂ ਬਦਲਣ ਦੌਰਾਨ ਉਨ੍ਹਾਂ ਦੇ ਚਿਹਰੇ ਦੇ ਹਾਵ-ਭਾਵ ਵੀ ਵੱਖਰੇ ਹੁੰਦੇ ਹਨ।
ਖ਼ੋਜਕਾਰਾਂ ਦਾ ਕਹਿਣਾ ਹੈ ਕਿ ਭਵਿੱਖ 'ਚ ਵਿਆਪਕ ਜਨਸੰਖਿਆ ਲਈ ਦਿਮਾਗ ਦੀ ਪੜ੍ਹਾਈ ਇਹ ਤਕਨੀਕ ਲਾਗੂ ਕੀਤੀ ਜਾ ਸਕਦੀ ਹੈ। ਨੈਸਟਰ ਨੇ ਪੱਤਰਕਾਰਾਂ ਨੂੰ ਕਿਹਾ ਕਿ ਸੰਭਾਵਨਾਵਾਂ ਬਹੁਤ ਦਿਲਚਸਪ ਹਨ। ਨੈਸਟਰ ਨੇ ਕਿਹਾ ਕਿ ਇਹ ਤਕਨੀਕ ਭਵਿੱਖ 'ਚ ਅਪਰਾਧਿਕ ਮਾਮਲਿਆਂ 'ਚ ਵੀ ਮਦਦਗਾਰ ਸਾਬਤ ਹੋ ਸਕਦੀ ਹੈ।