ਕਿਹਾ, ਮੈਂ ਅਜਿਹੇ ਨੇਤਾ ਨਾਲ ਸਹਿਯੋਗ ਕਰਨਾ ਚਾਹੁੰਦੇ ਹਨ ਜੋ ਰਚਨਾਤਮਕ ਵਿਚਾਰਾਂ ਨੂੰ ਮਹੱਤਵ ਦਿੰਦਾ ਹੈ
ਮੁੰਬਈ: ਸਾਬਕਾ ਕੇਂਦਰੀ ਮੰਤਰੀ ਮਿਲਿੰਦ ਦੇਵੜਾ ਨੇ ਕਾਂਗਰਸ ਛੱਡ ਕੇ ਸ਼ਿਵ ਸੈਨਾ ’ਚ ਸ਼ਾਮਲ ਹੋਣ ਦੇ ਅਪਣੇ ਫੈਸਲੇ ਨੂੰ ਜਾਇਜ਼ ਠਹਿਰਾਉਂਦਿਆਂ ਦੋਸ਼ ਲਾਇਆ ਹੈ ਕਿ ਕਾਂਗਰਸ ਅਪਣੀਆਂ ਵਿਚਾਰਧਾਰਕ ਅਤੇ ਸੰਗਠਨਾਤਮਕ ਜੜ੍ਹਾਂ ਤੋਂ ਭਟਕ ਗਈ ਹੈ, ਜਾਤੀ ਆਧਾਰ ’ਤੇ ਵੰਡ ਨੂੰ ਉਤਸ਼ਾਹਤ ਕਰ ਰਹੀ ਹੈ ਅਤੇ ਕਾਰੋਬਾਰੀ ਘਰਾਣਿਆਂ ਨੂੰ ਨਿਸ਼ਾਨਾ ਬਣਾਇਆ ਜਾ ਰਿਹਾ ਹੈ।
ਦੇਵੜਾ ਨੇ ਕਿਹਾ ਕਿ ਉਹ ਇਕ ਅਜਿਹੇ ਨੇਤਾ ਨਾਲ ਸਹਿਯੋਗ ਕਰਨਾ ਚਾਹੁੰਦੇ ਹਨ ਜੋ ਰਚਨਾਤਮਕ ਵਿਚਾਰਾਂ ਨੂੰ ਮਹੱਤਵ ਦਿੰਦਾ ਹੈ ਅਤੇ ਮਹਾਰਾਸ਼ਟਰ ਦੇ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਨੇ ਉਨ੍ਹਾਂ ਦੀ ਸਮਰੱਥਾ ਨੂੰ ਪਛਾਣਿਆ ਹੈ। ਸਾਬਕਾ ਕੇਂਦਰੀ ਮੰਤਰੀ ਮਿਲਿੰਦ ਦੇਵੜਾ ਐਤਵਾਰ ਸਵੇਰੇ ਕਾਂਗਰਸ ਛੱਡ ਕੇ ਸ਼ਿੰਦੇ ਦੀ ਅਗਵਾਈ ਵਾਲੀ ਸ਼ਿਵ ਸੈਨਾ ’ਚ ਸ਼ਾਮਲ ਹੋ ਗਏ ਸਨ। ਇਸ ਦੇ ਨਾਲ ਹੀ ਉਨ੍ਹਾਂ ਦੇ ਪਰਵਾਰ ਦਾ ਕਾਂਗਰਸ ਨਾਲ 55 ਸਾਲ ਪੁਰਾਣਾ ਰਿਸ਼ਤਾ ਖਤਮ ਹੋ ਗਿਆ।
ਦੇਵੜਾ ਨੇ ਬਾਅਦ ’ਚ ਕਾਂਗਰਸ ਛੱਡਣ ਦੇ ਅਪਣੇ ਫੈਸਲੇ ਪਿੱਛੇ ਕਾਰਨਾਂ ਬਾਰੇ ਦੱਸਣ ਲਈ ਸੋਸ਼ਲ ਮੀਡੀਆ ਮੰਚ ‘ਐਕਸ’ ਦਾ ਸਹਾਰਾ ਲਿਆ। ਕਾਂਗਰਸ ਦੇ ਮਰਹੂਮ ਨੇਤਾ ਮੁਰਲੀ ਦੇਵੜਾ ਦੇ ਬੇਟੇ ਮਿਲਿੰਦ ਦੇਵੜਾ ਉਧਵ ਠਾਕਰੇ ਦੀ ਅਗਵਾਈ ਵਾਲੀ ਸ਼ਿਵ ਫ਼ੌਜ (ਯੂ.ਬੀ.ਟੀ.) ਵਲੋਂ ਆਗਾਮੀ ਲੋਕ ਸਭਾ ਚੋਣਾਂ ’ਚ ਮੁੰਬਈ ਦਖਣੀ ਸੀਟ ’ਤੇ ਦਾਅਵਾ ਪੇਸ਼ ਕਰਨ ਤੋਂ ਨਾਰਾਜ਼ ਸਨ।
ਮਿਲਿੰਦ ਦੇਵੜਾ 2004 ਅਤੇ 2009 ’ਚ ਮੁੰਬਈ ਦਖਣੀ ਸੀਟ ਤੋਂ ਚੁਣੇ ਗਏ ਸਨ ਪਰ 2014 ਅਤੇ 2019 ਦੀਆਂ ਲੋਕ ਸਭਾ ਚੋਣਾਂ ’ਚ ਸ਼ਿਵ ਫ਼ੌਜ ਦੇ ਅਰਵਿੰਦ ਸਾਵੰਤ ਤੋਂ ਹਾਰ ਗਏ ਸਨ। ਸਾਵੰਤ ਹੁਣ ਠਾਕਰੇ ਧੜੇ ’ਚ ਹਨ। ਮਿਲਿੰਦ ਦੇਵੜਾ ਨੇ ਮੰਨਿਆ ਕਿ ਕਾਂਗਰਸ ਤੋਂ ਵੱਖ ਹੋਣ ਦਾ ਉਨ੍ਹਾਂ ਦਾ ਫੈਸਲਾ ਬਹੁਤ ਭਾਵਨਾਤਮਕ ਸੀ। ਉਨ੍ਹਾਂ ਇਹ ਵੀ ਕਿਹਾ ਕਿ ਉਹ ਅਜਿਹੇ ਨੇਤਾ ਨਾਲ ਸਹਿਯੋਗ ਕਰਨ ਦੀ ਇੱਛਾ ਰਖਦੇ ਹਨ ਜੋ ਰਚਨਾਤਮਕ ਵਿਚਾਰਾਂ ਨੂੰ ਮਹੱਤਵ ਦਿੰਦਾ ਹੈ, ਉਨ੍ਹਾਂ ਦੀ ਯੋਗਤਾ ਨੂੰ ਪਛਾਣਦਾ ਹੈ ਅਤੇ ਰਾਸ਼ਟਰ ਅਤੇ ਰਾਜ ਦੇ ਵਿਕਾਸ ਲਈ ਸੰਸਦ ਵਿਚ ਉਨ੍ਹਾਂ ਦੀਆਂ ਸਮਰੱਥਾਵਾਂ ਦਾ ਲਾਭ ਉਠਾਉਣਾ ਚਾਹੁੰਦਾ ਹੈ।
