ਜ਼ੇਲੈਂਸਕੀ ਨੇ ਪਹਿਲੀ ਵਾਰ ਕੁਰਸਕ ਖੇਤਰ ’ਚ ਸ਼ੁਰੂ ਕੀਤੀ ਗਈ ਦਲੇਰ ਮੁਹਿੰਮ ਦਾ ਇਰਾਦਾ ਸਪੱਸ਼ਟ ਤੌਰ ’ਤੇ ਜ਼ਾਹਰ ਕੀਤਾ
Volodymyr Zelenskyy : ਯੂਕਰੇਨ ਦੇ ਰਾਸ਼ਟਰਪਤੀ ਵੋਲੋਡੀਮੀਰ ਜ਼ੇਲੈਂਸਕੀ ਨੇ ਐਤਵਾਰ ਨੂੰ ਕਿਹਾ ਕਿ ਰੂਸ ਦੇ ਕੁਰਸਕ ਖੇਤਰ ਵਿਚ ਯੂਕਰੇਨ ਦੇ ਫੌਜੀਆਂ ਦੇ ਦਾਖਲੇ ਦਾ ਉਦੇਸ਼ ਉਥੇ ਇਕ ‘ਬਫਰ ਜ਼ੋਨ’ ਬਣਾਉਣਾ ਹੈ ਤਾਂ ਜੋ ਮਾਸਕੋ ਨੂੰ ਸਰਹੱਦ ਪਾਰ ਹੋਰ ਹਮਲੇ ਕਰਨ ਤੋਂ ਰੋਕਿਆ ਜਾ ਸਕੇ।
ਜ਼ੇਲੈਂਸਕੀ ਨੇ ਪਹਿਲੀ ਵਾਰ ਕੁਰਸਕ ਖੇਤਰ ’ਚ 6 ਅਗੱਸਤ ਨੂੰ ਸ਼ੁਰੂ ਕੀਤੀ ਗਈ ਇਸ ਦਲੇਰ ਮੁਹਿੰਮ ਦਾ ਇਰਾਦਾ ਸਪੱਸ਼ਟ ਤੌਰ ’ਤੇ ਜ਼ਾਹਰ ਕੀਤਾ ਹੈ। ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ ਕਿਹਾ ਸੀ ਕਿ ਇਸ ਮੁਹਿੰਮ ਦਾ ਉਦੇਸ਼ ਸਰਹੱਦੀ ਸੁਮੀ ਖੇਤਰ ਦੇ ਲੋਕਾਂ ਨੂੰ ਰੂਸ ਵਲੋਂ ਲਗਾਤਾਰ ਕੀਤੀ ਜਾ ਰਹੀ ਗੋਲੀਬਾਰੀ ਤੋਂ ਬਚਾਉਣਾ ਹੈ।
ਜ਼ੇਲੈਂਸਕੀ ਨੇ ਕਿਹਾ, ‘‘ਕੁਲ ਮਿਲਾ ਕੇ ਹੁਣ ਰੱਖਿਆਤਮਕ ਮੁਹਿੰਮਾਂ ਵਿਚ ਸਾਡੀ ਤਰਜੀਹ ਰੂਸ ਦੀ ਜੰਗੀ ਸਮਰੱਥਾ ਨੂੰ ਵੱਧ ਤੋਂ ਵੱਧ ਤਬਾਹ ਕਰਨਾ ਅਤੇ ਵੱਧ ਤੋਂ ਵੱਧ ਜਵਾਬੀ ਕਾਰਵਾਈ ਕਰਨਾ ਹੈ। ਇਸ ’ਚ ਕੁਰਸਕ ਖੇਤਰ ’ਚ ਸਾਡੀ ਕਾਰਵਾਈ ਸ਼ਾਮਲ ਹੈ ਜਿਸ ਦਾ ਉਦੇਸ਼ ਹਮਲਾਵਰ ਦੇ ਖੇਤਰ ’ਚ ਇਕ ‘ਬਫਰ ਜ਼ੋਨ’ ਬਣਾਉਣਾ ਹੈ।’’
ਅਧਿਕਾਰੀਆਂ ਨੇ ਦਸਿਆ ਕਿ ਯੂਕਰੇਨ ਨੇ 6 ਅਗੱਸਤ ਨੂੰ ਸਰਹੱਦ ਪਾਰ ਤੋਂ ਹਮਲਾ ਤੇਜ਼ ਕਰ ਦਿਤਾ ਸੀ, ਜਿਸ ਨਾਲ ਪਿਛਲੇ ਹਫਤੇ ਕੁਰਸਕ ਖੇਤਰ ਵਿਚ ਇਕ ਪ੍ਰਮੁੱਖ ਪੁਲ ਤਬਾਹ ਹੋ ਗਿਆ ਸੀ ਅਤੇ ਨਾਲ ਲਗਦੇ ਪੁਲ ’ਤੇ ਹਮਲਾ ਕੀਤਾ ਗਿਆ ਸੀ, ਜਿਸ ਨਾਲ ਰੂਸ ਨੂੰ ਸਪਲਾਈ ਬੰਦ ਹੋ ਗਈ ਸੀ।
ਫੌਜੀ ਮਾਮਲਿਆਂ ਦੇ ਰੂਸ ਸਮਰਥਕ ਬਲੌਗਰ ਨੇ ਮੰਨਿਆ ਕਿ ਗਲੂਸ਼ਕੋਵੋ ਸ਼ਹਿਰ ਦੇ ਨੇੜੇ ਸੀਮ ਨਦੀ ’ਤੇ ਇਕ ਪੁਲ ਦੇ ਤਬਾਹ ਹੋਣ ਨਾਲ ਯੂਕਰੇਨ ’ਤੇ ਹਮਲੇ ਨਾਲ ਨਜਿੱਠਣ ਲਈ ਰੂਸੀ ਫੌਜ ਦੀ ਸਪਲਾਈ ਵਿਚ ਵਿਘਨ ਪਿਆ, ਹਾਲਾਂਕਿ ਰੂਸ ਅਜੇ ਵੀ ਪੋਂਟੂਨ ਅਤੇ ਛੋਟੇ ਪੁਲਾਂ ਦੀ ਵਰਤੋਂ ਕਰ ਸਕਦਾ ਹੈ।
ਯੂਕਰੇਨ ਦੀ ਹਵਾਈ ਫੌਜ ਦੇ ਮੁਖੀ ਲੈਫਟੀਨੈਂਟ ਜਨਰਲ ਮਾਈਕੋਲਾ ਓਲੇਸ਼ਚੁਕ ਨੇ ਸ਼ੁਕਰਵਾਰ ਨੂੰ ਹਵਾਈ ਹਮਲੇ ਦਾ ਵੀਡੀਉ ਜਾਰੀ ਕੀਤਾ, ਜਿਸ ਵਿਚ ਪੁਲ ਦੇ ਦੋ ਟੁਕੜੇ ਵਿਖਾਈ ਦੇ ਰਹੇ ਹਨ।
ਓਲੇਸ਼ਚੁਕ ਅਤੇ ਰੂਸ ਦੇ ਖੇਤਰੀ ਗਵਰਨਰ ਐਲੇਕਸੀ ਸਮਿਰਨੋਵ ਮੁਤਾਬਕ ਦੋ ਦਿਨਾਂ ਤੋਂ ਵੀ ਘੱਟ ਸਮੇਂ ’ਚ ਯੂਕਰੇਨ ਦੇ ਫੌਜੀਆਂ ਨੇ ਰੂਸ ’ਚ ਇਕ ਦੂਜੇ ਪੁਲ ’ਤੇ ਹਮਲਾ ਕਰ ਦਿਤਾ।
ਯੂਕਰੇਨ ਨੇ ਪਹਿਲਾਂ ਟੈਂਕਾਂ ਅਤੇ ਹੋਰ ਬਖਤਰਬੰਦ ਗੱਡੀਆਂ ਨਾਲ ਰੂਸ ਵਿਚ ਅਪਣੇ ਹਮਲੇ ਦੇ ਦਾਇਰੇ ਅਤੇ ਨਿਸ਼ਾਨਿਆਂ ਬਾਰੇ ਬਹੁਤ ਘੱਟ ਜਾਣਕਾਰੀ ਦਿਤੀ ਸੀ। ਦੂਜੇ ਵਿਸ਼ਵ ਜੰਗ ਤੋਂ ਬਾਅਦ ਰੂਸ ’ਤੇ ਇਹ ਸੱਭ ਤੋਂ ਘਾਤਕ ਹਮਲਾ ਸੀ, ਜਿਸ ਨੇ ਰੂਸ ਨੂੰ ਹੈਰਾਨ ਕਰ ਦਿਤਾ ਸੀ ਅਤੇ ਯੂਕਰੇਨ ਨੇ ਕਈ ਪਿੰਡਾਂ ਅਤੇ ਸੈਂਕੜੇ ਕੈਦੀਆਂ ਨੂੰ ਅਪਣੇ ਕਬਜ਼ੇ ਵਿਚ ਲੈ ਲਿਆ ਸੀ।
ਜ਼ੇਲੈਂਸਕੀ ਨੇ ਕਿਹਾ ਕਿ ਯੂਕਰੇਨ ਦੀ ਫੌਜ ਨੇ ਚੰਗੇ ਅਤੇ ਬਹੁਤ ਲੋੜੀਂਦੇ ਨਤੀਜੇ ਹਾਸਲ ਕੀਤੇ ਹਨ। ਜ਼ੇਲੈਂਸਕੀ ਪਛਮੀ ਦੇਸ਼ਾਂ ਨੂੰ ਅਪੀਲ ਕਰ ਰਹੀ ਹੈ ਕਿ ਉਹ ਰੂਸੀ ਖੇਤਰ ’ਚ ਡੂੰਘੇ ਸਥਿਤ ਨਿਸ਼ਾਨਿਆਂ ਨੂੰ ਨਿਸ਼ਾਨਾ ਬਣਾਉਣ ਲਈ ਉਨ੍ਹਾਂ ਵਲੋਂ ਪ੍ਰਦਾਨ ਕੀਤੇ ਗਏ ਹਥਿਆਰਾਂ ਦੀ ਵਰਤੋਂ ਦੀ ਆਗਿਆ ਦੇਣ।
ਯੂਕਰੇਨ ਦੇ ਰਾਸ਼ਟਰਪਤੀ ਨੇ ਸਨਿਚਰਵਾਰ ਨੂੰ ਕੀਵ ਦੇ ਸਹਿਯੋਗੀਆਂ ਨੂੰ ਕੁਰਸਕ ਸਮੇਤ ਖੇਤਰ ਵਿਚ ਨਿਸ਼ਾਨਾ ਬਣਾਉਣ ਲਈ ਪਛਮੀ ਹਥਿਆਰਾਂ ਦੀ ਵਰਤੋਂ ’ਤੇ ਬਾਕੀ ਪਾਬੰਦੀਆਂ ਹਟਾਉਣ ਦੀ ਅਪੀਲ ਕੀਤੀ। ਉਨ੍ਹਾਂ ਕਿਹਾ ਕਿ ਜੇਕਰ ਯੂਕਰੇਨ ਦੇ ਫੌਜੀ ਲੋੜੀਂਦੀ ਰੇਂਜ ’ਤੇ ਨਿਸ਼ਾਨੇ ਨੂੰ ਨਿਸ਼ਾਨਾ ਬਣਾਉਣ ਦੀ ਸਮਰੱਥਾ ਹਾਸਲ ਕਰ ਲੈਂਦੇ ਹਨ ਤਾਂ ਉਹ ਰੂਸੀ ਫੌਜਾਂ ਨੂੰ ਅੱਗੇ ਵਧਣ ਅਤੇ ਵਾਧੂ ਤਬਾਹੀ ਮਚਾਉਣ ਤੋਂ ਰੋਕ ਸਕਦੇ ਹਨ।
