ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਜਦੋਂ ਤੋਂ ਅਮਰੀਕਾ ਦੀ ਸੱਤਾ 'ਤੇ ਬਿਰਾਜਮਾਨ ਹੋਏ ਹਨ, ਉਦੋਂ ਤੋਂ ਹੀ ਕਈ ਗੱਲਾਂ ਨੂੰ ਸੁਰਖ਼ੀਆਂ ਵਿਚ ...
ਵਾਸ਼ਿੰਗਟਨ : ਅਮਰੀਕਾ ਦੇ ਰਾਸ਼ਟਰਪਤੀ ਡੋਨਾਲਡ ਟਰੰਪ ਜਦੋਂ ਤੋਂ ਅਮਰੀਕਾ ਦੀ ਸੱਤਾ 'ਤੇ ਬਿਰਾਜਮਾਨ ਹੋਏ ਹਨ, ਉਦੋਂ ਤੋਂ ਹੀ ਕਈ ਗੱਲਾਂ ਨੂੰ ਸੁਰਖ਼ੀਆਂ ਵਿਚ ਰਹੇ ਹਨ। ਭਾਵੇਂ ਕਿ ਇਹ ਉਹ ਅਪਣੇ ਬਿਆਨਾਂ ਕਰਕੇ ਹੋਣ ਜਾਂ ਫਿਰ ਅਪਣੀਆਂ ਹਰਕਤਾਂ ਦੀ ਵਜ੍ਹਾ ਨਾਲ। ਹੁਣ ਫਿਰ ਕੁੱਝ ਦਿਨ ਪਹਿਲਾਂ ਹੋਏ ਜੀ-7 ਸ਼ਿਖ਼ਰ ਸੰਮੇਲਨ ਵਿਚ ਅਮਰੀਕੀ ਰਾਸ਼ਟਰਪਤੀ ਟਰੰਪ ਦੀ ਇਕ ਅਜ਼ੀਬ ਹਰਕਤ ਸਾਹਮਣੇ ਆਈ ਹੈ, ਜਿਸ ਦੀ ਵਿਸ਼ਵ ਭਰ ਵਿਚ ਆਲੋਚਨਾ ਹੋ ਰਹੀ ਹੈ।
ਪਿਛਲੇ ਦਿਨੀਂ ਹੋਏ ਜੀ-7 ਸ਼ਿਖ਼ਰ ਸੰਮੇਲਨ ਦੌਰਾਨ ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਨੇ ਜਰਮਨੀ ਦੀ ਚਾਂਸਲਰ ਏਂਜੇਲਾ ਮਾਰਕਲ ਵੱਲ ਸਟਾਰਬਰੱਸਟ ਕੈਂਡੀਜ਼ (ਟਾਫ਼ੀਆਂ) ਵਗ੍ਹਾ ਕੇ ਮਾਰੀਆਂ। ਇਹ ਸ਼ਿਖ਼ਰ ਸੰਮੇਲਨ ਕੈਨੇਡਾ ਵਿਚ ਕਰਵਾਇਆ ਗਿਆ ਸੀ ਅਤੇ ਇਸ ਵਿਚ ਅਮਰੀਕਾ ਅਤੇ ਯੂਰਪੀ ਦੇਸ਼ਾਂ ਵਿਚਕਾਰ ਚੱਲ ਰਹੀ ਵਪਾਰਕ ਲੜਾਈ ਬਾਰੇ ਗੱਲਬਾਤ ਹੋ ਰਹੀ ਸੀ।
ਯੂਰੇਸ਼ੀਆ ਗਰੁੱਪ ਨਾਂ ਦੀ ਫ਼ਰਮ ਦੇ ਰਾਜਨੀਤਕ ਰਿਸਕ ਸਲਾਹਕਾਰ ਪ੍ਰਧਾਨ ਇਆਨ ਬ੍ਰੈਮਰ ਨੇ ਦਾਅਵਾ ਕੀਤਾ ਕਿ ਸੰਮੇਲਨ ਦੇ ਅਖ਼ੀਰ 'ਤੇ ਹੋਰਨਾਂ ਨੇਤਾਵਾਂ ਨੇ ਰਾਸ਼ਟਰਪਤੀ ਟਰੰਪ ਨੂੰ ਸਾਂਝੇ ਬਿਆਨ 'ਤੇ ਦਸਤਖ਼ਤ ਕਰਨ ਲਈ ਕਿਹਾ ਸੀ। ਅਮਰੀਕੀ ਰਾਸ਼ਟਰਪਤੀ ਡੋਨਾਲਡ ਟਰੰਪ ਸਮਝੌਤੇ 'ਤੇ ਹਸਤਾਖ਼ਰ ਕਰਨ ਲਈ ਰਾਜ਼ੀ ਵੀ ਹੋ ਗਏ ਸਨ ਪਰ ਇਸ ਤੋਂ ਪਹਿਲਾਂ ਉਨ੍ਹਾਂ ਅਤੇ ਜਰਮਨੀ ਦੀ ਚਾਂਸਲਰ ਏਂਜੇਲਾ ਮਾਰਕਲ ਵਿਚਕਾਰ ਹੋਰ ਤਣਾਅ ਪੈਦਾ ਹੋ ਗਿਆ।
ਮਿਸਟਰ ਬ੍ਰੈਮਰ ਨੇ ਕਿਹਾ ਕਿ ਟਰੰਪ ਉੱਥੇ ਬੈਠੇ ਹੋਏ ਸਨ ਅਤੇ ਉਨ੍ਹਾਂ ਉਨ੍ਹਾਂ ਨੂੰ ਇੰਝ ਮਹਿਸੂਸ ਹੋ ਰਿਹਾ ਸੀ ਕਿ ਜਿਵੇਂ ਉਨ੍ਹਾਂ ਦੇ ਵਿਰੁਧ ਗੈਂਗ ਬਣ ਰਿਹਾ ਹੋਵੇ। ਟਰੰਪ ਨੂੰ ਪਸੰਦ ਨਹੀਂ ਆਇਆ। ਹਾਲਾਂਕਿ ਉਹ ਆਖਰਕਾਰ ਇਸ 'ਤੇ ਦਸਤਖ਼ਤ ਕਰਨ ਲਈ ਰਾਜ਼ੀ ਹੋ ਗਏ ਸਨ। ਬ੍ਰੈਮਰ ਨੇ ਦਸਿਆ “ਇਸ ਤੋਂ ਬਾਅਦ ਟਰੰਪ ਖੜ੍ਹੇ ਹੋਏ, ਉਨ੍ਹਾਂ ਨੇ ਅਪਣਾ ਹੱਥ ਆਪਣੀ ਜੇਬ ਵਿਚ ਪਾਇਆ ਅਤੇ ਉਨ੍ਹਾਂ ਨੇ ਦੋ ਸਟਾਰਬਰੱਸ ਕੈਂਡੀਜ਼ ਬਾਹਰ ਕੱਢੀਆਂ ਤੇ ਮੇਜ਼ 'ਤੇ ਸੁੱਟ ਦਿਤੀਆਂ ਅਤੇ ਕਿਹਾ '' ਏਂਜੇਲਾ ਇੱਥੇ ਇਹ ਨਾ ਕਹੋ ਕਿ ਮੈਂ ਤੁਹਾਨੂੰ ਕਦੇ ਵੀ ਕੁਝ ਨਹੀਂ ਦਿਤਾ।'' ਜਦਕਿ ਮਿਸਟਰ ਟਰੰਪ ਨੇ ਅਜਿਹੀ ਕਿਸੇ ਗੱਲ ਤੋਂ ਇਨਕਾਰ ਕੀਤਾ ਹੈ।