ਡਚੇਜ਼ ਆਫ਼ ਕੈਂਬ੍ਰਿਜ ਕੇਟ ਮਿਡਲਟਨ ਨੇ ਸੋਮਵਾਰ ਸਵੇਰੇ 11 ਵਜੇ ਲੰਦਨ ਦੇ ਸੇਂਟ ਮੈਰੀ ਹਸਪਤਾਲ 'ਚ ਬੇਟੇ ਨੂੰ ਜਨਮ ਦਿਤਾ।
ਬ੍ਰਿਟੇਨ ਦੇ ਸ਼ਾਹੀ ਪਰਵਾਰ ਲਈ ਇਕ ਹੋਰ ਖ਼ੁਸ਼ੀ ਦਾ ਮੌਕਾ ਆ ਗਿਆ ਹੈ। ਡਚੇਜ਼ ਆਫ਼ ਕੈਂਬ੍ਰਿਜ ਕੇਟ ਮਿਡਲਟਨ ਨੇ ਸੋਮਵਾਰ ਸਵੇਰੇ 11 ਵਜੇ ਲੰਦਨ ਦੇ ਸੇਂਟ ਮੈਰੀ ਹਸਪਤਾਲ 'ਚ ਬੇਟੇ ਨੂੰ ਜਨਮ ਦਿਤਾ। ਇਹ ਕੇਟ ਅਤੇ ਪ੍ਰਿੰਸ ਵਿਲੀਅਮ ਦਾ ਤੀਜਾ ਬੱਚਾ ਹੈ।ਪ੍ਰਿੰਸ ਵਿਲੀਅਮ ਬੇਟੇ ਦੇ ਜਨਮ ਸਮੇਂ ਹਸਪਤਾਲ 'ਚ ਹੀ ਮੌਜੂਦ ਸਨ। ਬੱਚੇ ਦਾ ਭਾਰ 3.8 ਕਿਲੋ ਹੈ। ਜ਼ਿਕਰਯੋਗ ਹੈ ਕਿ ਇਸ ਤੋਂ ਪਹਿਲਾਂ ਕੇਟ ਅਤੇ ਵਿਲੀਅਮ ਦੇ ਇਕ ਬੇਟਾ ਅਤੇ ਇਕ ਬੇਟੀ ਹਨ।
ਚਾਰ ਸਾਲਾ ਪ੍ਰਿੰਸ ਜੋਰਜ ਅਪਣੇ ਛੋਟੇ ਭਰਾ ਦੇ ਜਨਮ ਸਮੇਂ ਸਕੂਲ 'ਚ ਸਨ। ਉਥੇ ਹੀ ਤਿੰਨ ਸਾਲਾ ਛੋਟੀ ਭੈਣ ਕਵੀਨ ਸ਼ਾਲੋਰਟ ਕੈਸਿੰਗਟਨ ਪੈਲੇਸ 'ਚ ਸੀ। ਕੈਸਿੰਗਟਨ ਪੈਲੇਸ ਵਲੋਂ ਦਸਿਆ ਗਿਆ ਕਿ ਬੱਚੇ ਦਾ ਨਾਂ ਛੇਤੀ ਹੀ ਐਲਾਨਿਆ ਜਾਵੇਗਾ। ਜ਼ਿਕਰਯੋਗ ਹੈ ਕਿ ਪ੍ਰਿੰਸ ਜੋਰਜ ਅਤੇ ਕਵੀਨ ਸ਼ਾਲੋਰਟ ਦਾ ਜਨਮ ਵੀ ਇਸੇ ਹਸਪਤਾਲ 'ਚ ਹੋਇਆ ਸੀ। ਕੇਟ ਨੂੰ ਸੋਮਵਾਰ ਸਵੇਰੇ 6 ਵਜੇ ਹਸਪਤਾਲ ਵਿਚ ਦਾਖ਼ਲ ਕਰਵਾਇਆ ਗਿਆ ਸੀ।
(ਪੀਟੀਆਈ)