ਲੋਕਾਂ ਨੇ ਮਦਦ ਲਈ ਚਲਾਈ ਆਨਲਾਈਨ ਮੁਹਿੰਮ
ਖਾਰਤੂਮ: ਸ਼ੇਰ ਜੰਗਲ ਦਾ ਸਭ ਤੋਂ ਸ਼ਕਤੀਸ਼ਾਲੀ ਜਾਨਵਰ ਹੈ, ਜਿਸ ਨੂੰ ਦੇਖ ਕੇ ਵੱਡੇ ਵੱਡਿਆਂ ਦੇ ਪਸੀਨੇ ਛੁੱਟ ਜਾਂਦੇ ਹਨ ਪਰ ਸੂਡਾਨ ਦੀ ਰਾਜਧਾਨੀ ਖਾਰਤੂਮ ਵਿਚ ਇਕ ਪਾਰਕ ਵਿਚ ਮੌਜੂਦ ਸ਼ੇਰ ਇੰਨੇ ਜ਼ਿਆਦਾ ਕਮਜ਼ੋਰ ਹੋ ਗਏ ਹਨ ਕਿ ਉਨ੍ਹਾਂ ਨੂੰ ਦੇਖ ਕੇ ਖ਼ੌਫ਼ ਨਹੀਂ ਬਲਕਿ ਉਨ੍ਹਾਂ 'ਤੇ ਤਰਸ ਆਉਂਦਾ ਹੈ।
Photo
ਕੁਪੋਸ਼ਣ ਦੀ ਵਜ੍ਹਾ ਨਾਲ ਕਮਜ਼ੋਰ ਹੋਏ ਇਨ੍ਹਾਂ ਸ਼ੇਰਾਂ ਨੂੰ ਇਕ ਕੁੱਤਾ ਵੀ ਅਪਣਾ ਸ਼ਿਕਾਰ ਬਣਾ ਸਕਦਾ ਹੈ। ਜਾਣਕਾਰੀ ਅਨੁਸਾਰ ਇਹ ਸ਼ੇਰ ਰਾਜਧਾਨੀ ਖਾਰਤੂਮ ਦੇ ਅਲ ਕੁਰੈਸ਼ੀ ਪਾਰਕ ਵਿਖੇ ਇਕ ਪਿੰਜਰੇ ਵਿੱਚ ਲੋਕਾਂ ਦੇ ਦੇਖਣ ਲਈ ਬੰਦ ਕੀਤੇ ਹੋਏ ਹਨ ਪਰ ਪਿਛਲੇ ਕੁਝ ਹਫ਼ਤਿਆਂ ਵਿੱਚ ਇਨ੍ਹਾਂ ਦੀ ਹਾਲਤ ਬਦ ਤੋਂ ਵੀ ਬਦਤਰ ਹੋ ਗਈ ਹੈ।
Photo
ਭੋਜਨ ਅਤੇ ਦਵਾਈਆਂ ਦੀ ਅਣਹੋਂਦ ਵਿਚ ਇਨ੍ਹਾਂ ਸ਼ੇਰਾਂ ਦੀਆਂ ਪੱਸਲੀਆਂ ਤਕ ਦਿਸਣ ਲੱਗ ਪਈਆਂ ਹਨ, ਜਿਸ ਦੇ ਚਲਦਿਆਂ ਸ਼ੇਰਾਂ ਦੇ ਸਰੀਰ ਦੇ ਭਾਰ ਦਾ ਲਗਭਗ ਦੋ ਤਿਹਾਈ ਹਿੱਸਾ ਘੱਟ ਗਿਆ ਹੈ। ਉਧਰ ਅਲ-ਕੁਰੈਸ਼ੀ ਪਾਰਕ ਦੇ ਮੈਨੇਜਰ ਸੁਮੇਲ ਦਾ ਕਹਿਣਾ ਹੈ ਕਿ ਇਨ੍ਹਾਂ ਲਈ ਭੋਜਨ ਹਮੇਸ਼ਾ ਉਪਲਬਧ ਨਹੀਂ ਹੁੰਦਾ, ਇਸ ਲਈ ਅਕਸਰ ਅਸੀਂ ਇਨ੍ਹਾਂ ਖਾਣਾ ਦੇਣ ਲਈ ਆਪਣੇ ਪੈਸੇ ਨਾਲ ਭੋਜਨ ਖ਼ਰੀਦਦੇ ਹਾਂ।
Photo
ਪਾਰਕ ਦਾ ਪ੍ਰਬੰਧ ਖਰਤੂਮ ਨਗਰ ਪਾਲਿਕਾ ਦੁਆਰਾ ਕੀਤਾ ਜਾਂਦਾ ਹੈ ਅਤੇ ਉੱਥੋਂ ਦੇ ਲੋਕ ਆਪਣੇ ਪੱਧਰ 'ਤੇ ਨਿਗਮ ਦੀ ਸਹਾਇਤਾ ਕਰਦੇ ਹਨ। ਦਰਅਸਲ ਇਸ ਪਾਰਕ ਵਿਚ ਪੰਜ ਅਫ਼ਰੀਕੀ ਸ਼ੇਰ ਬੰਦ ਕੀਤੇ ਹੋਏ ਹਨ। ਉਸਮਾਨ ਸਲੀਹ ਨਾਂਅ ਦੇ ਇਕ ਵਿਅਕਤੀ ਨੇ ਇਨ੍ਹਾਂ ਸ਼ੇਰਾਂ ਦੀਆਂ ਤਸਵੀਰਾਂ ਫੇਸਬੁੱਕ 'ਤੇ ਪਾ ਦਿੱਤੀਆਂ ਅਤੇ ਨਾਲ ਹੀ ਇਨ੍ਹਾਂ ਸ਼ੇਰਾਂ ਦੀ ਮਦਦ ਲਈ ਇਕ ਆਨਲਾਈਨ ਮੁਹਿੰਮ ਦੀ ਸ਼ੁਰੂਆਤ ਕੀਤੀ।
Photo
ਇਸੇ ਮੁਹਿੰਮ ਤਹਿਤ ਲੋਕਾਂ ਵੱਲੋਂ ਇਨ੍ਹਾਂ ਬੇਹੱਦ ਕਮਜ਼ੋਰ ਹੋਏ ਸ਼ੇਰਾਂ ਲਈ ਮਦਦ ਦੀ ਅਪੀਲ ਕੀਤੀ ਜਾ ਰਹੀ ਹੈ ਤਾਂ ਜੋ ਇਹ ਮੁੜ ਤੋਂ ਤੰਦਰੁਸਤ ਹੋ ਸਕਣ। ਦੱਸ ਦਈਏ ਕਿ ਸੂਡਾਨ ਖੁਰਾਕੀ ਕੀਮਤਾਂ ਅਤੇ ਵਿਦੇਸ਼ੀ ਮੁਦਰਾ ਦੀ ਘਾਟ ਕਾਰਨ ਵੱਡੇ ਆਰਥਿਕ ਸੰਕਟ ਨਾਲ ਜੂਝ ਰਿਹਾ ਹੈ।
Photo
ਜਿਸ ਦਾ ਅਸਰ ਹੁਣ ਮਨੁੱਖਾਂ ਅਤੇ ਜਾਨਵਰਾਂ 'ਤੇ ਦੇਖਣ ਨੂੰ ਮਿਲ ਰਿਹਾ ਹੈ। ਕੁੱਝ ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਸ਼ੇਰਾਂ ਦਾ ਸਹੀ ਤਰੀਕੇ ਨਾਲ ਪਾਲਣ ਨਹੀਂ ਕੀਤਾ ਜਾ ਰਿਹਾ ਤਾਂ ਇਨ੍ਹਾਂ ਨੂੰ ਜੰਗਲ ਵਿਚ ਛੱਡ ਦੇਣਾ ਚਾਹੀਦਾ ਸੀ।
