ਚੀਨ ਤੋਂ ਸ਼ੁਰੂ ਹੋਏ ਕੋਰੋਨਾ ਵਾਇਰਸ ਕਾਰਨ ਦੁਨੀਆ ਭਰ ਵਿਚ ਕਈ ਲੋਕਾਂ ਦੀ ਮੌਤ ਹੋ ਗਈ।
ਨਵੀਂ ਦਿੱਲੀ: ਚੀਨ ਤੋਂ ਸ਼ੁਰੂ ਹੋਏ ਕੋਰੋਨਾ ਵਾਇਰਸ ਕਾਰਨ ਦੁਨੀਆ ਭਰ ਵਿਚ ਕਈ ਲੋਕਾਂ ਦੀ ਮੌਤ ਹੋ ਗਈ। ਦੁਨੀਆ ਦੇ ਕਈ ਦੇਸ਼ ਇਸ ਵਾਇਰਸ ਦੀ ਚਪੇਟ ਵਿਚ ਹਨ। ਸਭ ਤੋਂ ਭਿਆਨਕ ਹਾਲਾਤ ਅਮਰੀਕਾ ਦੇ ਹਨ। ਉੱਥੇ ਹੀ ਇਕ ਦੇਸ਼ ਅਜਿਹਾ ਹੈ ਜਿੱਥੇ ਕਮਜ਼ੋਰ ਅਰਥਵਿਵਸਥਾ ਅਤੇ ਕਮਜ਼ੋਰ ਸਿਹਤ ਸਿਸਟਮ ਦੇ ਬਾਵਜੂਦ ਵੀ ਕੋਰੋਨਾ ਸੰਕਰਮਣ ਦਰ ਬਹੁਤ ਘੱਟ ਹੈ।
ਚੀਨ ਦੇ ਨਾਲ ਲੱਗਦੇ ਵਿਯਤਨਾਮ ਵਿਚ ਕੋਰੋਨਾ ਵਾਇਰਸ ਦੇ ਮਰੀਜ਼ਾਂ ਦੀ ਗਿਣਤੀ ਬਹੁਤ ਘੱਟ ਹੈ, ਇੱਥੇ ਹੁਣ ਤੱਕ ਕੋਰੋਨਾ ਵਾਇਰਸ ਨਾਲ ਕੋਈ ਵੀ ਮੌਤ ਦਾ ਮਾਮਲਾ ਸਾਹਮਣੇ ਨਹੀਂ ਆਈ ਹੈ। ਚੀਨ ਦੀ ਸੀਮਾ ਦੇ ਨਾਲ ਹੋਣ ਦੇ ਬਾਵਜੂਦ ਵੀ ਇੱਥੇ ਹੁਣ ਤੱਕ ਸਿਰਫ 270 ਕੋਰੋਨਾ ਦੇ ਮਾਮਲੇ ਆਏ ਹਨ, ਜਿਨ੍ਹਾਂ ਵਿਚ 140 ਠੀਕ ਹੋ ਚੁੱਕੇ ਹਨ।
ਇਸ ਪਿੱਛੇ ਦੇਸ਼ ਦੀ ਸਰਕਾਰੀ ਰਣਨੀਤੀ ਹੈ। ਪਿਛਲੇ ਹਫਤੇ ਵਿਯਤਨਾਮ ਦੀ ਰਾਜਧਾਨੀ ਹਨੋਈ ਦੇ ਬਜ਼ਾਰ ਵਿਚ 1000 ਦੁਕਾਨਦਾਰਾਂ ਦੀ ਕੋਰੋਨਾ ਜਾਂਚ ਹੋਈ। ਇਸ ਦੇ ਨਾਲ ਹੀ 19000 ਵਿਦੇਸ਼ੀਆਂ ਅਤੇ ਟ੍ਰੈਵਲ ਹਿਸਟਰੀ ਵਾਲੇ ਲੋਕਾਂ ਦੀ ਵੀ ਜਾਂਚ ਕੀਤੀ ਗਈ। ਸਾਰਿਆਂ ਦੇ ਨਤੀਜੇ ਨੈਗੇਟਿਵ ਰਹੇ।
ਕੁਝ ਸਮਾਂ ਪਹਿਲਾਂ ਇਸ ਦੇਸ਼ ਨੇ ਅਮਰੀਕਾ ਦੇ ਟੈਕਸਾਸ ਵਿਚ ਪ੍ਰੋਟੈਕਟਿਵ ਸੂਟ ਵੀ ਭੇਜੇ ਸਨ। ਲਗਭਗ ਸਾਢੇ 9 ਕਰੋੜ ਦੀ ਅਬਾਦੀ ਵਾਲੇ ਦੇਸ਼ ਨੇ ਚੀਨ ਵਿਚ ਕੋਰੋਨਾ ਦੀ ਸ਼ੁਰੂਆਤ ਦੇ ਨਾਲ ਹੀ ਸਾਵਧਾਨੀ ਵਰਤਣੀ ਸ਼ੁਰੂ ਕਰ ਦਿੱਤੀ ਸੀ। ਇਸ ਦੇਸ਼ ਵਿਚ ਨਾ ਹੀ ਜਾਂਚ ਦੀ ਸਹੂਲਤ ਹੈ ਤੇ ਨਾ ਹੀ ਵੱਡੇ ਹਸਪਤਾਲ।
ਇਸ ਦੇ ਬਾਵਜੂਦ ਵੀ ਸ਼ੁਰੂਆਤੀ ਦੌਰ ਵਿਚ ਹੀ ਸਹੀ ਤਰੀਕੇ ਅਪਣਾ ਕੇ ਇਸ ਦੇਸ਼ ਨੇ ਕੋਰੋਨਾ ਵਾਇਰਸ ਦਾ ਹਮਲਾ ਵਧਣ ਨਹੀਂ ਦਿੱਤਾ। ਮੀਡੀਆ ਰਿਪੋਰਟਾਂ ਅਨੁਸਾਰ ਸ਼ੁਰੂਆਤ ਵਿਚ ਹੀ ਇੱਥੇ ਵੱਖ-ਵੱਖ ਥਾਵਾਂ 'ਤੇ ਟੈਸਟਿੰਗ ਜ਼ੋਨ ਬਣਾਏ ਗਏ ਸੀ, ਜਿੱਥੇ ਬਹੁਤ ਘੱਟ ਕੀਮਤ ਵਿਚ ਟੈਸਟ ਹੁੰਦੇ ਸੀ। ਇਸ ਦੇ ਨਾਲ ਹੀ ਦੇਸ਼ ਵਿਚ ਲੌਕਡਾਊਨ ਦੀ ਸਖਤੀ ਨਾਲ ਪਾਲਣਾ ਕੀਤੀ ਗਈ।